Read Medumba 2 Kronika 3 Bible Online

2 Kronika 3 - Medumba bible

2 Kronika 3

¹Salomon to' nekut ba' Tshùaben Yérusalém, num mbat Morija, dù' ze bo la'te tàab David là. David lo nabte yen dù' là num dù' netsham nsa Ornan ze Yébusia.

²Salomon to' nekut ba' à num mbatte lé'njù bàa ntùm ṅwù bàa. A lo be be ndù a ghù ngu'njù kuà num fen.

³Tshù tun ba' ze Salomon kut ba' Nsi num bwe li. Ba' lo sag num njwèn mfi' mbu ṅam ntat, ngù bam se mbu gham.

⁴Nzendà z'a be mbwe bwe là ghù mbu gham nesage, num njoṅ ze bam ba' be yi là, ngù mbu ṅam ntôg nenèn tù; Salomon lo' gol nelàn njo' i yi njam ntùm bwe.

⁵A lo' ntshwèn tù bù mbatte ba' ndùb yi, ndo' gol nelàn njo' o, ntshebte ba tshaten boa ntshan num bwe.

⁶A batte ndoṅ tanjoṅ num ba', nso ngùa yi num bwe; gol na' mb'a z'a fe Parvaim nà.

⁷A lo' gol njo' ba' yi, ba nsaṅ, ba nkù'ndà, ba mbatndà boa ghabndà, ngù bo tshebte ba kérubim num ba mbatndà.

⁸A kut ba' dù' nelàn ntshùate; yen ba' là ghù mbu gham nesage, mbe njoṅ ze bam ba' sag yi là, ngù mbu gham mba num bam se. A lo' gol nelàn njo' i yi, njoṅ i fa be talaṅto nkù ntôge;

⁹gol ze bo tswe ntùn (nkekùt) yi là be ndô nkàb ṅam ntàn. A lo' gol njo' mba nto'ndà mi à be tù là yi.

¹⁰A ghù bo tshebte kérubim mbàa ntùm dù' nelàn ntshùate, ndo' gol njo' i yi.

¹¹Mbàb ba kérubim lo ghù mbu gham nesage. Bàb mbwe kérubim s'a sag mbu mbàa kam nà lo ke nkwag kumba'; mo' bàb se s'a sag mbu mbàa kam nà kwag num bàb mbatte kérubim bàa.

¹²Bàb mbatte kérubim bàa sag mum mbu mbàa, nke nkwag kumba'; mo' bàb se s'a sag mbu mbàa kam nà nke nte num bàb mbwe kérubim.

¹³Mbàb tshen kérubim nà lo ke nyitte ngù mbu gham. Bo lo ke ntsin tù num nku mube, nke ndôte nze dù' ba' be là.

¹⁴A ghù kam nzwe nenàfi, ze meba bo z'a ba mba tsinkém nà, z'a b'a ze bisus là. A vèn ba kérubim num nzwe là.

¹⁵A ghù ntom mbàa mbwe ba' ndù a sag nèn tù nguan mbu ntshob sammbàa gham bo tu ntom ndù a ghù mbu mbàa kam mfe num tu tshobe.

¹⁶A ghù ba ntshan bwe mba mi a be ntùm dù' nelàn nà, ngette yub num tu ba ntom. A nabte memo' ntàmntàm tshu nkù, nsote num ba ntshane.

¹⁷A tete ba ntom mbwe Ndà Nsi, mo' ta' be bu zwim, mo' be bu kwéb; a tswi lén z'a be bu zwim nà ndù Yakin, ntswi lén z'a be bu kwéb là ndù Boaze.