Read Medumba 2 Kronika 30 Bible Online

2 Kronika 30 - Medumba bible

2 Kronika 30

¹Ezékia tshag ntum ntùm ngô Israél bo ba Yuda fa; a kite ba ṅwa'ni Efraim bo Manasé, ntsiaṅ yub ndù bo se' Ndà Nsi Yérusalém, njù Pasa bwe, ndo' ngamte Tshùaben Nsi Israél yi.

²Mfen boa fenfen tse mba mbumte fa Yérusalém lo nabte mb'a bwô nejù Pasa num mbatte ṅwù bàa là.

³Bo lo ke jù Pasa num ngelaṅ i, nummbe ghafà tshule'te lo ke yoṅ ndànte wut tshob njoṅ z'a ku' là, mba nummbe ngô lo ke yoṅ mbumte Yérusalém.

⁴Mfen bo mbumte yen ndùlal'a bwô yube;

⁵bo nabte ndù a bwô netswi nkùn ntùm ngô Israél, neto' Ber-Shéba nèn nkum Dan, ndù benntùn se' Yérusalém njù Pasa bwe ndo' ngamte Tshùaben Nsi Israél yi. Nummb'a lo be be bo ke bèn nejù Pasa bwoṅntu mba bo na' nkite là.

⁶Ghakùnde nèn boa ṅwa'ni mfen mba fenfen tse ntùm ngô Israél mba Yuda. Bo nke ntshob mba mfen na' ntshob là ndù: Bon Israél, bin bèn njam nse' ntèt Tshùaben, Nsi Abraham, Isak bo Israél, ndù tu wul i bèn nse' bin, bin tshen nà tse bin tum mum mbu mfen Asiria là.

⁷Kà bin be mba tà tsine, mba fèt tsine, tse bo na' ngù nukebwô num Tshùaben Nsi tà tsin nà. A lo swèn yub bu nsobni 1mba bin tshwèt njen nà.

⁸A ke' bwô bin bam ndù kekot zin sage, mba tà tsin nà. Bin tshag bu zin Tshùaben, bin se' ntùm dù' i ze nelàn z'a lànt'é matmat là. Bin fa' Tshùaben Nsi zin, ndùlala ndù tonte yantù lo num bin.

⁹A be ze bin bèn njam ntèt Tshùaben nà, mba fèt tsin boa nshum tsin a' ghù kondèn mba ben tse bo lo' yub nèn yi ndà kuan nà, bèn njam ntùm ngô li. Nummbe Tshùaben Nsi zin b'a ngakondèn mba ngatshàmndèn. A ke nsi tsho' lag num bin, a be ze bin bèn njam ntèl i là.

¹⁰Ndùlala ghakùnde nèn ntùm ntusô fa mi à ngô Efraim, Manasé là, tà nèn nkum Zabulon. Là, bo nke nzwi yube, nke ntshabte yube.

¹¹Mba tà ndùlala, tsemo' bon ndô ben Aser, tse Manasé bo Zabulon fà wut nsi, mbèn njam Yérusalém.

¹²Bu Nsi lo nsi, ba Yuda, mfà be ntù ntshù', ngù bo zwiagte ntshob mi mfen boa fenfen tse tshobe, mb'a be ntùm ntshob Tshùaben nà.

¹³Mo' bwoṅ benntùn tse'te Yérusalém num nejù jùa bàn ke te ywibte se. A na' mb'a mbatte ṅwù bàa. Yen mbumte là lo yàm neshu.

¹⁴Bo lo nsi, mbiagte ntômbwôg mi bo ke mfà tshule'te bwe Yérusalém nà, boa memo' fa mi bo ke mfà ba labinda bwe là, ṅwat njoṅ i fa nèn naṅ ntùm fub Kédron.

¹⁵Bo jù Pasa num mbatte lé'njù ntshob kuà gham ntùm mbatte ṅwù bàa. Tuswe ghom ghafà tshule'te boa ben Lévi, bo lànte wut tshobe, nke nton ba nyàm ntùm ndà Tshùaben.

¹⁶Bo lo' yub z'a be yub là, ndaṅndaṅ mba Mosé mèn Nsi na' ntshob ntùm ntshù' là. Ghafà tshule'te nke nsate lem tse bo kwé mbu ben Lévi là.

¹⁷Mba tsemo' ben yàm ntùm mbumte na' mbe ke yoṅ ndànte wut là, ben Lévi lo' fa' nezwite mbwe Pasa num ze tu njoṅ benntùn fa bo ke' làn nà, ndùlala ndù bo fà yub Tshùaben.

¹⁸Nummbe mo' bag ngô yàme, ben Efraim, tse Manasé, tse Isakar boa tse Zabulon lo ke lànte wut, njù Pasa ke zin à mba bo kite là. Là, Ezékia le'te Nsi num yub tu ntshob ndù: Tshùaben, a bwô ndù o bame, wù ngabwôntù,

¹⁹nelagte njoṅ benntùn fa tse bo yab ntù bo nediag Nsi, Tshùaben, Nsi tà tshob là, mba mba bo ke' ze ntshù' nelànte wut nelàn nà.

²⁰Tshùaben bam mba Ezékia bètte là, ndagte ngô.

²¹Ndùlala bon Israél tse bo be Yérusalém num jùa là, jù bàn ke te ywibte se ntùm tsiaṅte ndùb mum lé'njù sammbàa. Ghafà tshule'te boa ben Lévi nke ngamte Tshùaben boa tshu nebu' ju yi.

²²Ezékia tshob nu ntùm ntù njoṅ ben Lévi fa tse bo ke nda'te siaṅte yàm ntùm fa' Tshùaben nà. Bo fèt nyàm tse bo zwite là mum lé'njù sammbàa, nke mfà tshule'te tse nenyàmte, nke ngamte Tshùaben, Nsi tà tshobe.

²³Mbumte mbe ntshu ntshù' nebèn njù jùa tsemo' lé'njù sammbàa. Bo jù i num tshen lé'njù sammbàa là kua' ntùm tsiaṅte;

²⁴nummbe Ezékia, mfen Yuda, lo fà mfot mfô ntsha' sammbàa mbumte, fenfen fà mfot mfô ntsha' mbùm boa mbwe ntsha' gham mbumte; ghafà tshule'te yàm lo lànte wut tshobe.

²⁵Mbumte fa Yuda, ghafà tshule'te boa ben Lévi, ngô fa z'a fe Israél là boa ghùn tse bo fe ngô Israél, ke tse bo te Yuda lo fà wut ntùm tsiaṅte fa.

²⁶Tsiaṅte yàm lo be Yérusalém. Fe num ze ngelaṅ Salomon nshum David, mfen Israél, lèn yen tsiaṅte là lo ke bèn njoṅ mbe Yérusalém.

²⁷Ghafà tshule'te boa ben Lévi lo nsi naṅ mbotni mum ngô, nze yub tum tù, le'te yub zin tà nkum kamànyam, nzin tà nkum ntùm dù'ntswe Tshùaben z'a làn nà.