Read Medumba 2 Kronika 33 Bible Online

2 Kronika 33 - Medumba bible

2 Kronika 33

¹Manasé lo be jù fen ndù a ghù ngu'njù ntshob bàa gham. A tô num ngu'njù ntshob tàn ṅam ntàn, nke ntswe Yérusalém.

²A ghù ju z'a ke' bwô là num miag Tshùaben, mfi'te tshùaya'nu ngôngô tse Tshùaben na' nta' yub mbwe bon Israél là.

³A bèn nabte mbwe' tse tàab Ezékia na' nsate là; a bom ntômbwôg Baal, nkom ba neto Astarté, ngwù nsi mbwe ntshu ntsho z'a mfe kamànyam nà, nke mfa' yi.

⁴A bom ntômbwôg ntùm ndà Tshùaben, yen ndà là ze Tshùaben na' ntshob nu num bwe ndù: Me nsi te lén sàm à mà Yérusalém matmat là.

⁵A bom ntômbwôg ntshu ntsho mfe kamànyam ntùm bam ntshundà ndà Tshùaben mbàa;

⁶nton kua' ko' tse nshum mbwôge, ntùm tômbo' tse nshum Hinnom; a fà wul i num nu ghalèn nsa, num nu ngàme, a te nu ghasab nsôgmbu, ghatshaṅ ka, njab benntùn tse bo ghù mbètte ywèt fe ben nu là. A ghù tshu ts'a ke' bwô là Tshùaben kua' mà yàm yàme, ndo' nkamte yantù i yi.

⁷A lo' neto Astarté z'a na' nkom nà nte ntùm ndà Tshùaben, ndà ze Tshùaben na' ntshob David bo nshum i Salomon ndù: Me nsi te lén sàm matmal à ntùm yen ndà li, ntùm sen tusô Yérusalém ni se me tsho' netèt njoṅ tunndà Israél fa là.

⁸Me ke nsi bèn ghù bon Israél ke ntsha nèn njam ntshundà. Bo nsi ghô ntùm ngô ze me na' mfà tà tsin nà, a be ze bo ze njoṅ tshu fa me tshob bo, kua' mb'a be ntùm ntag boa nkàn mi Mosé na' nkite là.

⁹Là, Manasé tènte Yuda boa ba Yérusalém bo fàn nze, ngù nukebwô ntshùa mba ngôngô tse Tshùaben na' mbiagte yub mbwe bon Israél là.

¹⁰Tshùaben tshob nu Manasé mba ben tse, nda' ndù yen nà ke tshob sàm ju bo mba metsili.

¹¹Ndùlala Tshùaben ghù fenfen ntshu ntsho mfen Asiria se', ngom Manasé, ma' ntùn bu i; bo lo' tshan ntùn meba nkul i yi, ndo' i nèn yi Babilon.

¹²Ndùs'a be ntùm ntobni là, a tsiaṅ Tshùaben Nsi i, mfà wul i kua' nsi mbwe Nsi tà tse.

¹³A ma' mbu ntùm tse le'te; Tshùaben ju', nkôgte yantù i, mbam le'te tse, ndo' i mbèn yi Yérusalém ntùm fen se. Manasé yôg ndèn ndù Tshùaben b'a Nsi.

¹⁴Yen nà lo be tôg a kut mo' kumba' njam tusô David, nze mbinyam bag Guihon, ntùm tômbo'o, kumba' là sag nèn nkum num nzendà ba ngontse, nsag nèn tù kua' yàme; a yab fenfen soyé ntùm njoṅ ntusô Yuda fa mi bo kut ntsham ntsiag là.

¹⁵A biagte nsi ba tum ts'a be ndà Tshùaben nà bo neto, nsate njoṅ ntômbwôg fa mi a kut num mbat ba' Tshùaben mba Yérusalém nà. A sô njoṅ i fa ma' njam tusô.

¹⁶A bèn nabte tômbwôg Tshùaben, mfà tshule'te tse nenyàmte bo tse nelèn numebwô, ntshob Yuda nke mfa' Tshùaben Nsi Israél.

¹⁷Ngô lo ke nke' mfà tshule'te mbwe', là, njôg mb'a num lén Tshùaben Nsi i.

¹⁸Tshé' mfa' Manasé, le'te z'a le'te Nsi yi là, ntshob ba ghatshob ntshob Nsi tse bo tshob nu yi num lén Tshùaben Nsi Israél là, bo kite ntùm ṅwa'ni mfa' fenfen Israél.

¹⁹Le'te z'a le'te bo mat Nsi bam le't'é là, nukebwô tse boa tse tatu, dù' ts'a kut ba mbwe' bwe boa ba neto mba tshu nekom ts'a ghù kà njôg mfà wul i nsi là, bo kite ntùm ṅwa'ni Hozai.

²⁰Manasé nèn ntèt tà tse, bo tshoṅ i ntùm ndà i. Nshum i Ammon tô num ze dù'.

²¹Ammon lo be jù fen ndù a ghù ngu'njù ntshob bàa ṅam mbàa. A tô num ngu'njù bàa, nke ntswe Yérusalém.

²²A ghù ju z'a ke' bwô là num miag Tshùaben, kua' mba tàab Manasé na' ngù là; a fà tshule'te njoṅ neto nekom fa tse tàab Manasé na' nkom nà, nke mfa' bo.

²³A ke fà wut nsi mbwe Tshùaben, mba tàab Manasé na' mfà là, nummbe Ammon lo ke mfàn tse nu nèn yi à be mbwe.

²⁴Ghafa' tse ze ntsham i, nzwi i ntùm ndà i.

²⁵Là ngô ya ntù nzwite njoṅ benntùn fa bo ze ntsham mfen Ammon nà; ngô te Yosias num fen num ze dù'. A na' mb'a nshum mfen Ammon.