Read Medumba 2 Kronika 35 Bible Online

2 Kronika 35 - Medumba bible

2 Kronika 35

¹Yosias jù Pasa num lén Tshùaben Yérusalém. Bo wat njùmbwe Pasa num mbatte lé'njù ntshob kuà gham ntùm mbwe ṅwù.

²A te ghafà tshule'te ntùm mub mfa', mfà ntag bo ndù bo fèn ntù ntùm fa' ndà Tshùaben.

³A tshob ben Lévi tse bo ke ntswite ba Israél, mbe ndù bo lo yo' yub mfà Tshùaben nà ndù: Bin te Koṅ nelàn ntùm ba' ze Salomon nshum David mfen Israél na' nkut là; kà bin bèn nekel i num nkembe' bin. Bin fa' Tshùaben Nsi zin ndonni, mbèn mfa' ze nzwit mèn.

⁴Bin be tswe nke mbébe, ntsin à mba tsin tunndà tà be yi là, ntsin mba bo ghabte zin yi nkamnkam nà, ndaṅndaṅ mba David mfen Israél bo nshum i Salomon na' nabte mbèn nkite là.

⁵Bin tsin num tsin dù' ntùm dù' nelàne, kua' mba nzenze tunndà tà fèt tsin be yi là, fèt tsin tse bo be bon ngô là, ntsin à mba bo lo' ngabte tse tunndà tà ben Lévi yi là.

⁶Bin wat njùmbwe Pasa, ndànte wut tsine, bin nabte Pasa fèt tsine, ngù kua' mba Tshùaben na' ntshùa num ntshu Mosé ntshob là.

⁷Yosias fà njùmbwe boa mbwe ntsha' ṅam ntat ba la' mba ben tse bo be Yérusalém nà, mfà njoṅ i fa à num Pasa. A fà mba nyàmna' ntsha' tat. Bo lo' tshen njoṅ i fa là num tshu mfen.

⁸Tse fenfen bèn mfà tshu ngô mb'a ko' ntù bo là, mfà mba tse ghafà tshule'te boa tse ben Lévi. Hilkija, Sakaria bo Yéhiél kamkam Ndà Nsi, fà njùmbwe ntshob ntôg ntsha' bàa boa nyàmna' nkù tat ghafà tshule'te num Pasa.

⁹Konania, Shemaéya bo Netanéel, fèt tse Hashabia, Yeiél bo Yozabad, fenfen ben Lévi fà njùmbwe ntsha' tàn boa nyàmna' nkù tàn ben Lévi num Pasa.

¹⁰Bo tsiagte fa', ghafà tshule'te boa ben Lévi lo' yub dù', mba bo lo' ngabte yub yi là, kua' mba mfen tshob là.

¹¹Bo wat njùmbwe Pasa; ghafà tshule'te naṅ lem tse bo kwé mba ben Lévi là nsi. Ben Lévi fét nyàm tse bo wat là.

¹²Bo sô nyàm tse bo nsi ton nà, tse bo nsi ghabte nzenze tunndà tà bon la' là, ndùlala ndù bo fà Tshùaben, kua' mba bo kite ntùm ṅwa'ni Mosé là. Bo ghù be ndaṅndaṅ num ba nyàmna'.

¹³Bo ton njùmbwe Pasa à netone mb'a be ntùm kàn nà; na tshu nelàn ntùm ba mba, ntùm ba ntshaṅ, ntùm ba nkab; bo nànte neghabte tshen tshu là ngô.

¹⁴Yen nà be tôg bo nabte yub jujù mba ze ghafà tshule'te, nummbe tshen ben ni, tse nshum Aron lo fa' tà nkum tèttswe', neke nton nyàm boa nzile; a ndùlala ze ben Lévi nabte yub mbàb boa ze tse nshum Aron nà.

¹⁵Ghayobkwi, tse nshum Asaf lo be num yub dù'; kua' mba David, Asaf, Héman bo Yédutun ze ngayente mfen na' ntete yub là. Ghabéb nzendà lo ke mbe mba zit nzendà lo; bo ke be kaṅ ku num sob fa', nummbe fèt tshob ben Lévi lo ke nabte njoṅ i fa bo.

¹⁶Tshù mba bo tsiagte fa' Tshùaben sen lé'njù là là. Bo jù Pasa mbèn nton ba nyàm num tômbwôg Tshùaben, kua' mba mfen Yosias tshob là.

¹⁷Bon Israél tse bo be bwe là jù Pasa yen ngelaṅ nà bo jùa bàn ke te ywibte se mum lé'njù sammbàa.

¹⁸Fe num sen lé'njù ngatshob ntshob Nsi Samuél, bo lo ke to' jù Pasa mba ntshù' a fute sen nà ntùm ngô Israél. Sàm mfen mba ntshù' netèt fenfen Israél lo ke to' jù Pasa a fute sen Pasa se Yosias, ghafà tshule'te boa ben Lévi, ba Yuda boa ba Israél tse bo be bwe, mba ba Yérusalém na' njù sen lé'njù là là.

¹⁹Bo jù Pasa l'a ndùse Yosias kum num fen ngu'njù ntshob fom gham nà.

²⁰Tshen tshu là lo tôge, mfen be miagte nenabte ndà Tshùaben, Néko mfen Egipto ko' nkam ntsho Karkémish z'a be num ta'ntse Efrat là. Yosias ko' nèn mbumte bo yi.

²¹Néko tum benntùn bo nèn ntshob yi ndù: Mfen Yuda, a yàm nu ke bag we à? Me ke ko' nse' tshàm à num o sènni; me nèn à num mo' tunndà ze bag yi be tshwèt ntsho là. Nsi tshob me ndù me nànte. Kà ta tu Nsi, nummbe bag yi bèn mbe, mbwôg ndù k'a sat'o.

²²Là, Yosias ke bam nelo njam i, a kaṅ wul i nkam Néko ntsho, ke ju' ntshob Néko mi à na' ntum à kua' ntshu tu wut Nsi là. A swe' nèn ma' ntsho ntùm tômbo' Megiddo.

²³Ghama' nkét tam mfen Yosias, ndùlal'a tshob tse ben ndù: Bin kel àm nèn yi, tshù bo lem àm kua' kebwô.

²⁴Ben tse sô i ntùm kalig se, njab i ntùm semo' kalig se ndo' i nèn yi Yérusalém, a tsho bwe nkwù. Bo tshoṅ i ntùm mi mfi tà tse. Njoṅ ba Yuda fa boa ba Yérusalém làn Yosias.

²⁵Yérémia nabte kwi nsivù num Yosias; njoṅ ghayob tshu fa tse bandum mba tse bènnzwi fa num ntsi lén Yosias ntùm nkwi mub tà nse' nkum sènni. Bo te yen ju là k'a tù' matnu Israél. Bo kite men nkwi là ntùm ṅwa'ni nkwi nsivù.

²⁶Tshé' mfa' Yosias, mfa' bamntù i, ndaṅndaṅ mba bo kite ntùm ntshù' Tshùaben nà,

²⁷mi mbwe mfa' boa mi njam, bo kite ntùm ṅwa'ni fenfen Israél boa tse Yuda.