Read Medumba 2 Kronika 36 Bible Online

2 Kronika 36 - Medumba bible

2 Kronika 36

¹Ngô lo' Yoakaz nshum Yosias njo' i fen, nte i num dù' tàab mà Yérusalém.

²Yoakaz lo be jù fen ndù a ghù ngu'njù ntshob tat ṅam mbàa. A tô num maṅwù tat, nke ntswe Yérusalém.

³Mfen Egipto sô i num fen Yérusalém, ntam talaṅto silba nkù bo ta' talaṅto gol tu ngô.

⁴Mfen Egipto lo' mfèt Yoakaz ngom i fen Yuda bo Yérusalém. A bate lén se, njab lén se ndù Yoyakim. Néko lo' mfèl i Yoakaz nèn yi Yérusalém.

⁵Yoyakim lo be jù fen ndù a ghù ngu'njù ntshob tàn ṅam mbàa. A tô num ngu'njù ntshob ntshù' gham, nke ntswe Yérusalém. A ghù ju z'a ke' bwô là num miag Tshùaben Nsi i.

⁶Nébukanetsar mfen Babilon ko' nse' num i, nkul i tshan tùn meba, ndo' i nèn yi Babilon.

⁷Nébukanetsar lo' tshundà ndà Tshùaben nèn yi Babilon. A yab tshen tshu là ntùm ntshwèl i Babilon.

⁸Tshé' mfa' Yoyakim, tshùaya'nu ts'a ghù, mba ts'a ke' ntù i là, bo kite ntùm ṅwa'ni fenfen Israél boa tse fenfen Yuda. Nshum i Yoyakin tô num ze dù'.

⁹Yoyakin lo be jù fen ndù a ghù ngu'njù gham, nke ntswe Yérusalém. A ghù ju z'a ke' bwô là num miag Tshùaben.

¹⁰Tamngu' be tôg mfen ghù bo lo' i nèn yi Babilon boa tshundà ndà Tshùaben tse tanjoṅ. A lo' Sédékia mfèt Yoyakin ngom fen yi Yuda mba Yérusalém.

¹¹Sédékia lo be jù fen ndù a ghù ngu'njù ntshob ntshù' ṅam mbàa. A tô num ngu'njù ntshob ntshù' gham, nke ntswe Yérusalém.

¹²A ghù ju z'a ke' bwô là num miag Tshùaben Nsi i. A ke fà wul i nsi mbwe ngatshob ntshob Nsi Yérémia z'a ke ntshob nu yi num ze tu Tshùaben nà.

¹³A ghù tatu mbwe mfen Nébukanetsar z'a na' ngù a lo' lén Nsi nu ngu yi là. A so sagntù ntù i, ngù kekol i ta k'a ke bèn nekô tse nebèn njam ntèt Tshùaben Nsi Israél.

¹⁴Njoṅ fenfen ghafà tshule'te fa bo ngô fàn yub nu nke nèn be mbwe, ngù ba tshùaya'nu mba ngôngô là; ndo' ndà Tshùaben ze tu wut tshob lànte Yérusalém nà mba ju banban nà.

¹⁵Tshùaben Nsi tà tshob tshùa njam ghantum tse nte bu num bo ngelaṅ ntùn, nummb'a lo ke nkô nefaṅ ze nzwit mèn bo kua' ze dù'ntswe.

¹⁶Là, bo tshabte tshob ghantum Nsi, ngwag ntshob mi, nzwi tshob ghatshob ntshob Nsi tse, tà nkum ndùse yantù Tshùaben kam num ze nzwit mèn fu se ke bèn mbe là.

¹⁷Ndùlala Tshùaben ghù mfen ba Kaldéa ko' nse' num bo, ndo' ṅwi ngwatte ghuan benntùn yi ntùm ndà yub dù' nelàne. A ke faṅ sàm ménnshum ke ménngon no, njwèn mèn ke mèn ze tu i fôg lo. Tshùaben swèn yub fa ntùm mbu mi.

¹⁸Nébukanetsar lo' njoṅ tshundà ndà Nsi fa, tse ndùb boa tse nke' nèn yi Babilon, ndo' tshunkàb ndà Tshùaben, tse ndà mfen boa tse ndà fenfen tse.

¹⁹Bo ton ba' Nsi, nsate ba kàbngô Yérusalém, nton mba' fa mi a be ntshwèt là boa njoṅ tshu ntùn fa.

²⁰Nébukanetsar lo' njoṅ benntùn fa tse bo tum ntshu ṅwi là nèn yi Babilon ndà kuan; bo tù' kuan tse, tse nshum tse, tà nkum ndùse ze netô Persia te nsi là,

²¹ndùlala ndù ntshob mi Tshùaben tshùa num ntshu Yérémia ntshob là bumte ndù: Tsha' nsi tù' fam num ngu'njù ṅam sammbàa, tà nkum ndùse tsha' nsi tsiaṅ num tse lé'njù jùa Sabbat là.

²²Ntùm ze mbwe ngu'njù fen Kirus, mfen Persia, a tswi nkùn ntshu, mbèn ngù bo kite ṅwa'ni tshag ntùm ze nufen fa. Yen nà na' mb'a nelo' nzwiagte ntshob mi Tshùaben tshùa num ntshu Yérémia ntshob là.

²³Bo kite ntùm yen ṅwa'ni là ndù: Tshù ju ze Kirus mfen Persia tshob li: Tshùaben Nsi z'a mfe kamànyam nà fà njoṅ nufen fa nsitsha' me. A bètte mbe me kut ta' ba' yi Yérusalém mà Yuda. Mba we lo netèt bin z'a b'a ze nzwit mèn nà, mb'a bwô ndù bo Nsi i be, a bèn njam.