Read Medumba 2 Kronika 4 Bible Online

2 Kronika 4 - Medumba bible

2 Kronika 4

¹A nabte tômbwôg tùn fôgtab, a ghù mbu gham num njoṅ kum tse fa, ngù mbu ntàn nenèn tù.

²A lo' tùn mbom dibantse yi. Nelo mo' kaṅ dibantse nèn nkum mo' ghù mbu ntàn. Njoṅ i fa lo diaṅ mbume, netsho nsi be mbu mbàa kam; ta' nkù z'a ghù mbu ntshob tàn gham nà lo ke ndiaṅ i mbume.

³Ba netshaṅ se nyàmna' lo diaṅ ngoṅ i mbume, nke ntôg mbu mbàa kam i be, mbe ndùlala ndiaṅ dibantse mbume; ba nyàmna' na' mbe ndùlal'a nka bàa; bo nabte dibantse boa nyàmna' à ntàm ndùlala.

⁴Bo na' nte dibantse l'a num netshaṅ nyàmna' ntshob bàa gham. Tse tat nke ndôte tu, tse tat nke ndôte mbinyam, tse tat nke ndôte ntèn, tse tat nke ndôte ntumnyam. Dibantse na' mb'a num bo, ntshu tun tshob kaṅ ntshù à netèt bwe.

⁵Kub tùn dibantse lo be nguan ta' kam bu, bo nabte ngoṅ i a be mba ta' ntu' là, ndù bo nabt'a mba ntoṅ nsàmtù là. Ntse lo ke ntsho bwe nguan lita bon tàn nkù, ke mban ntse ntshob tàn ṅam nkuà lo.

⁶A bom ndet gham, nte mi ntàn bu zwim, nte mi ntàn bu kwéb, ndù bo ke nsôg bwe: Bo na' nke nsôg njoṅ dù' nyàm fa tse bo ton à bwe. Dibantse lo ke njwimte ghafà tshule'te num nesôge.

⁷A nabte tshu neghette ndambo bwe gham ts'a b'a tse gol là, nabt'a num mat bo na' ntshob ndù bo nabte là; a tete yub ntùm ndà Nsi, tse tàn num bag bu zwim, tse tàn num bag bu kwéb.

⁸A nabte ntéblé gham, ntete ntùm Ndà Nsi, mi ntàn bag bu zwim, mi ntàn bag bu kwéb. A nabte ntu' gol nkù.

⁹A ghù bam ntshundà ghafà tshule'te, ngù bam ntshundà ndùb boa nzendà tse, ndo' ntse tùn fôgtab bo na là njo' ngabndà yi.

¹⁰A te dibantse num bag bu zwim nze tun ntèn ntumnyam.

¹¹Huram nabte ba ntsi bwembwôge, nsofa' boa ntu' bwe. Tshù mba Huram miagte fa' se mfen Salomon bètte ndù a fa' ntùm Ndà Nsi là:

¹²Ntom mbàa, boa tu tse mbàa mba netàm ts'a fim tu ntom nà;

¹³ntàm tshu nkù kuà ts'a be num tu ba ntom nà; ntàm tshu là be nka bàa mba num zit tu ntom no, num nekabte ba netàm tu ba ntom mfe num tu bwe;

¹⁴bon miag mi gham boa ndet gham;

¹⁵dibantse, boa nyàmna' ntshob bàa gham tse bo be bam dibantse là;

¹⁶ntsi bwembwôge, nsofa' boa ndu'sob. Tshen tshundà là tse mfen Salomon ghù Huram-Abi nabte num Ndà Nsi là, a lo' à tùn fôgtab se kwite nabte yi.

¹⁷Mfen lo ghù bo na men ntùn nà tômbo' Yordan, ntùm tsha' neṅabe, netèt Sukkot bo Tseréda.

¹⁸Salomon nabte tshen tshundà l'a yàm neshu kà bo ke bèn ndôte njoṅ ze tùn fôgtab lèt yi là.

¹⁹Salomon bèn nabte njoṅ tsemo' tshundà fa mum Ndà Nsi: Tômbwôg gol; ntéblé mi bo ke njab bàn le'te bwe là;

²⁰tshu neghette ndambo bwe boa ndambo, njoṅ i fa be ndù bo lo' à gol nelàn nabte yi. A bwô neke nte mbwôg bwe mbwe dù' nelàn mba ntshù' là;

²¹a nabte ba nsàmtù, ba ndambo, boa nsisasi gol, gol z'a làn ntshùate là;

²²mbi, ba ntu', ba nkob boa ndet gol nelàne; ngabndà gol num nzendà ntùm bwe, ntùm Ndà Nsi, nze z'a be ntsho dù' nelàn ntshùate là, mba num nzendà z'a be ntsho Ndà Nsi là.