Read Medumba 2 Kronika 7 Bible Online

2 Kronika 7 - Medumba bible

2 Kronika 7

¹Ngelaṅ ze Salomon miagte nele'te Tshùaben nà, mbwôg swe' mfe kamànyam nkù nyàm boa tshule'te fa num tômbwôge, nkuni Tshùaben dun ntùm ndà.

²Ghafà tshule'te lo ke ku'ni netsho ntùm ndà Tshùaben, nummbe nkuni Tshùaben lo dun ntùm ndà Tshùaben.

³Njoṅ bon Israél fa yen mba mbwôg bo nkuni Tshùaben swe' nse' num ba' là; bo vù nsi kabkab num dù' mfémfé ndoṅ, nte nkekwi' mub nsi, nyàmte Tshùaben ntshob ndù: Tshù, Tshùaben b'a ngabwôntù, nummbe kondèn i be ntswe matmat.

⁴Mfen bo ngô fà tshule'te mbwe Tshùaben.

⁵Mfen Salomon wat nyàmna' ntsha' ntshob bàa ṅam mbàa boa mbwe ntsha' bon bàa nkù. Tshù mba mfen bo ngô na' ndo' ntsho' Ndà Nsi yi là.

⁶Ghafà tshule'te lo ke mbe num yub ntshufa', ben Lévi yob boa tshu nebu' ju yi; tshen tshu là b'a tse mfen David na' ngù num kwi neke nyàmte Tshùaben yi là. Yen nà na' mb'a ndùse David ke mfà fa' neghamte Tshùaben bo là. A lo ke ntshob ndù: Nummbe kondèn i tswe matmat! Ghafà tshule'te tô nta ndù bo tsinte se se. Njoṅ ba Israél fa lo be bwe.

⁷Salomon lànte netèt bam ntshundà z'a be mbwe ba' Tshùaben nà; nummb'a lo ton ba nyàm bwe boa nzit tshule'te tse nenyàmte; tômbwôg tùn fôgtab se Salomon nabte là lo ke ku'ni num ba nyàm tse bo ton nà, tshu bwôntù mba ba nzile.

⁸Salomon jù jùa num yen ngelaṅ nà lé'njù sammbàa boa bon Israél fa; bwoṅ benntùn lo fe tà dù' ts'a ghebte Hamat, tà nèn nkum fub s'a Egipto là nse'e.

⁹A be num mbatte lé'njù fom bo ghù mbumte ntam netèt bo; nummbe jùa tômbwôg se bo tsho' là lo tswe lé'njù sammbàa, jùa bèn ntswe be lé'njù sammbàa.

¹⁰A be num mbatte lé'njù ntshob tat ṅam mbàa ntùm ṅwù sammbàa, Salomon lé'te ngô, mba we lo bèn ntùm ze ntàb. Bo bèn à ntù tsiaṅte num mebwô ze Tshùaben na' ngù David, Salomon bo Israél ze nzwit mèn nà.

¹¹Ngelaṅ ze Salomon miagte ba' Tshùaben bo ba' mfen, boa njoṅ tshu fa ts'a ko' ntù i neghù ntùm ndà Tshùaben mba ntùm ndà mfen nà,

¹²Tshùaben ṅwag Salomon ntùm njem tèttswe', ntshob yi ndù: Me bam le't'o, ntsho' yen dù' li, a be ba' ze bo nsi ke fà tshule'te me bwe là.

¹³Ngelaṅ me nsi fùn kamànyam, mbaṅ be ke bèn ndo, ngelaṅ me nsi tshag ngamntàn bo fèt ngô fa, ngelaṅ me nsi tum keya' netèt yàm nzwit mèn nà,

¹⁴a be ze yàm nzwit mèn ze bo be ntsiaṅ lén sàm netèl i fà wut nsi, nde'te, ndiag se àm, nkaṅ mvèn i ntam tse manze kebwô yi là, mba me nsi tsin mfe kamànyam bame, lagte nukebwô i yi, bèn yate ze ngô.

¹⁵Neto' ndonni me nsi te lag, kù' ntoṅ num le'te ze bo le't'àm yi num yen dù' li là.

¹⁶Ndonni me tsho' yen dù' li, me lànte yen ba' li ndù lén sàm tswe bwe matmat, lag sàm bo ntù àm ke nsi tsho' bwe.

¹⁷Tu wul o, a be z'o zin mbwe àm mba tàan David là, nke ngù ju ze me bètte là, nke nze ntshù' màm boa ntag màm nà,

¹⁸mba me nsi ghù diaṅkwa so ghume, so fen taṅ nga, mba me na' nka' tàan David là, nummbe me lo tshob yi ndù: O ke nsi bwoṅ ta' njùndà z'a tô Israél là.

¹⁹Là, a be ze bin kaṅ mvèn zin, a be ze bin ghua' ntshù' màm boa ntag màm mi me na' nkite bin, nèn mfa' tsemo' nsi, ngwù mbwe bo là,

²⁰mba me nsi sô zin ntùm ngô àm ze me na' mfà bin nà, ghua' yen ba' li ngùanesà, ba' ze me lànte num lén sàm nà, lo' i ghù ju komzwi bo tshabte yi netèt ngôngô fa.

²¹Ke yen ba' li be ndù a lo nèn tù be ndùke lo, mba mba we lo z'a nsi tshùa mbaṅ i là nsi tshàme, tshob ndù: Numke Tshùaben ghù num yen ngô li bo yen ba' li ndù à?

²²Bo ke bùnte ndù: Nummbe bo ghua' Tshùaben, Nsi tà tshobe, z'a na' nsô yub ngô Egipto là, mba ndù bo so wut num tsemo' nsi, ngwù nsi mbwe bo mbèn mfa' bo. Tshù ju z'a tshag tshen nge' li fa num bo là.