Read Medumba Esdra 1 Bible Online

Esdra 1 - Medumba bible

Esdra 1

¹A lo be tam ngu' mba Kirus mfen Persia be num fen nà, ntshob mi Tshùaben tshùa num ntshu Yérémia ntshob là bumte. Ndùlala Tshùaben kamte ywèt Kirus mfen Persia, a tshob tà tù, mbèn nkite ṅwa'ni ntùm njoṅ ze nufen fa, nsa yen nu là ntshob ndù:

²Tshù ju ze Kirus mfen Persia tshob li: Tshùaben, Nsi Nganeta kamànyam fà njoṅ nufen nsitsha' me fa, mbètt'àm ndù me kut ta' ba' yi Yérusalém, mà Yuda.

³We z'a b'a ze nzwit mèn netèt bin à? A bwô ndù Nsi ng'é be bo yi, a ko' nèn Yérusalém mà Yuda, nkut ta' ba' bwe Tshùaben, Nsi ba Israél. A b'a kua' Nsi là z'a be Yérusalém nà.

⁴Mba yà lo dù' ze tshé' nzwit Tshùaben ke'e, nke nkô nebèn Israél là, mb'a bwô ndù ba yen dù' là fà silba, gol, tshu boa nyàm mba ba nda' num nu ba' Tshùaben z'a be Yérusalém nà.

⁵Fenfen tunndà Yuda boa tse Benjamin, ghale'te boa ben Lévi, njoṅ tshen ben nà fa tse Nsi kamte ywèt tshob là lo nsi num nenèn nkut ba' Tshùaben Yérusalém.

⁶Njoṅ ndùla' tshob fa fà tshu bo, tse silba, gol, tshu, nyàm boa tshu tanjoṅ, ke tùnte ba nda' ntùn bwe. Njoṅ tshen tshu là fa b'a num ba' Tshùaben.

⁷Mfen Kirus ba' ntshundà ndà Tshùaben tse Nébukanetsar ket Yérusalém nèn njab ntùm ndà ze nsi là.

⁸Kirus mfen Persia ghù Mitredat, ngalé' tshunkàb sô tshen tshundà là, mfà Sheshbatsar, z'a be ngomna ba Yuda là.

⁹Tshù njoṅ tshen tshu là li: Ndet bàn silba ntsha' mbùm, mbi ntshob bwe'e ṅam mbàa,

¹⁰ntu' gol ṅam ntat, ntu' silba mén bùm nkù kuà, boa tsemo' tshundà ntsha' mbùm.

¹¹Njoṅ tshu gol boa silba fa lo tamte mbe ntsha' tàn nkù kuà. Sheshbatsar be fe ndà kuan Babilon, ndo' njoṅ i fa mbèn yi Yérusalém.