Read Medumba Esdra 3 Bible Online

Esdra 3 - Medumba bible

Esdra 3

¹Ṅwù sammbàa be ku' ndù bon Israél yà be ntùm ntusô mube. Ndùlala bo kùmte Yérusalém mba ta' mènntùn ntshù' là.

²Yoshua nshum Yotsadak boa fèt tse ghale'te mba Zorobabél nshum Shealtiel boa fèt tse lo nsi, nkut tômbwôg Nsi Israél, neke nton nyàm bwe, mba bo kite ntùm ntshù' Mosé, mèn Nsi là.

³Bo bèn nkut tômbwôg num tse i, mba mba bo ke mbwôg ba ntùm ngô là, nke nton nyàm bwe Tshùaben, nkebnjù bo mfetnjù.

⁴Bo jù jùa ntàb, mba bo kite là, nke nton nyàm njoṅ ze bo tshob là mba num sit lé'njù lo.

⁵Yen nà be tôge, bo ton nyàm num ntshùa ṅwù, boa njoṅ njùa fa mi bo na' mfà Tshùaben nà; bo bèn nton mba nyàm tse ben bo ke mfà ju bwôntù, nke mfà njoṅ ndù fa là Tshùaben.

⁶Bo to' nke nton nyàm Tshùaben fe num mbwe lé'njù ntùm ṅwù sammbàa. Là, mba ndùlala bo ke yoṅ ma' tun ba' Ndà Tshùaben.

⁷Bo fà nkàb ghatshua'te ndoṅ boa ghalo' tuba'; mfà jujù, ndu' bo mfèt ba Sidon boa ba Tiro ndù bo tum ntù sédra Liban bo ntùm dibantse k'a se' nkum Yafo. Nummbe mfen Kirus, mfen Persia bam ndùlala.

⁸A lo be kum ngu'njù bàa mba bo kum ntùm Ndà Nsi Yérusalém nà, num mbatte ṅwù bàa, bo to'te fa'. Tshù ben bo be tshwèt fa' li: Zorobabél, nshum Shealtiel, Yoshua, nshum Yotsadak boa tshé' fèt tshob ghale'te, boa ben Lévi, mba njoṅ benntùn fa tse bo fe ndà kuan nse' Yérusalém nà. Bo yab ben Lévi tse bo ghù ngu' ṅam mbàa, ke tse bo tôg ndùlala lo ndù bo ke ndôte fa' ndà Tshùaben.

⁹Yoshua boa tse nshum mba fèt tse, Kadmiél boa tse nshum, tse nshum Hodavia, tse Hénadad boa tshob nshum mba fèt tshob ben Lévi, tamte nabte neke ndôte Ndà Nsi ku ntshù'.

¹⁰Ndùse ghafa' ma' tun ba' Ndà Nsi là, bo ghù ghale'te ket nzwe fa' mbe bwe, boa nta mba ben Lévi bon Asaf boa kekwale. Bo nsi ghamte Tshùaben mb'a be ntùm ntshù' David mfen Israél là.

¹¹Bo nke njob kwi, ngamte, nyàmte Tshùaben ntùm men ntshob li ndù: Tshù, Tshùaben b'a mèn mebwô, kondèn i num Israél ghô matmat! Njoṅ ngô fa nke ntshag nze yub tù ntùm tsiaṅte ngamte Tshùaben nummbe bo tshwèt ma' tun ba' Ndà Nsi.

¹²Là, ben yàm netèt ghale'te ben Lévi boa fenfen tunndà tse bo ywèn, mbe ndù bo lo yen mbwe ba' nke ndàne, nke ntshu'te ndùse bo ke ma' tun yen ba' num miag mub là. Tsemo' benntùn yàm bèn nke ntshu'te ntùm tsiaṅte,

¹³kà mèn ke ku'ni nelèn tshu'te tsiaṅte ke ze ntsenyà lo netèt ngô. Tshù, ngô lo ke ntshag nz'é tù kà bo nke nju' tà ngùanesà.