Read Medumba Esdra 4 Bible Online

Esdra 4 - Medumba bible

Esdra 4

¹Ghakeban Yuda bo Benjamin ju' mbe bon tse bo fe ndà kuan nà tshwèt nkut ta' ba' Tshùaben, Nsi ba Israél.

²Bo se' mbaṅ Zorobabél boa fenfen tunndà, ntshob bo ndù: Bag bin tamte nkut ba'; nummbe bag num ntsiaṅ lén Nsi zin mba zin tu wut là. Bag be mfà tshule'te yi fe ndùse Esar-Haddon mfen Asiria na' ndo' yag nko' nse' yi nsen ni là.

³Là Zorobabél, Yoshua boa tsemo' fenfen tunndà Israél bùnte bo ndù: A ke b'a bag à bin bèn kut ba' Nsi yag; bag nsi kul i Tshùaben Nsi Israél à nda' tù' bag, ndaṅndaṅ mba Kirus mfen Persia na' ntshob bag là.

⁴Ndùlala ba la' kag nyu' num ba Yuda; nkag bwôg ndo' ntshètte yub yi nekut ba'.

⁵Bo lo' nkàb njun ghafà ntag yi ndù bo ghù mfa' bi to'o. Yen nu li tàn ndùlala num ze ngelaṅ yôg Kirus mfen Persia, mbe be ndùlala tà nèn nkum num ze netô Darius mfen Persia.

⁶A lo be num ze ngelaṅ fen Asuérus, ndùs'a to'te netô là ghakeban kite ṅwa'ni nebote ba Yuda boa ba Yérusalém yi.

⁷Num ze ngelaṅ Artasastia, Bislam, Mitredat, Tabéel, boa tshé' shun tshob kite ṅwa'ni Artasastia mfen Persia. Bo kite yen ṅwa'ni là ntùm ntshob Aram mbèn nkit'a num ze mat nekite Aram.

⁸Rehum ngomna bo Shimshai ngakite kite yen ṅwa'ni li mfen Artasastia num Yérusalém ntshob ndù:

⁹Rehum, ngomna, bo Shimshai, ngakite boa tshé' shun tshobe, tse Din, Artasastia, Tarpél, Afaras, Erék, Babilon, Suse, Déha, Elam,

¹⁰boa tsemo' ngô tse mèn ndùb bo kuni Osnappar na' ndo' yub nèn nte ntùm tusô Samaria boa tsemo' dù' yoṅ ta'ntse là.

¹¹Tshù ṅwa'ni ze bo tum mfen Artasastia li: Ghafa' tsho, ben tse bo be yen yoṅ ta'ntse li là.

¹²A bwô mfen lèn ndù ba Yuda tse bo lo mbaṅ i, nkum netèt bag nsen ni Yérusalém nà tshwèt mbèn nkut tusô ghatatu bo se tshùagkèt benntùn. Bo tshwèt mbù'te kàbngô ts'a vùte là, mbèn nke ma' tun ba'.

¹³Ndùlala, a bwô mfen lèn ndù a be ze bo bèn nkut sen tusô là, mbèn mbù'te kàbngô là, mba bo ke bèn nefà ntshub, ke fà tagsi, ke fà nkàb bam ntshùa, a tshùa ndùlala tshunkàb mfen vù nsi.

¹⁴Tshù, mba bag be njù ngwa ntshwèt là, a ndùlala ze bag tum yen tshô li mfen nà. Nummb'a ke' bwô ndù bag yen bo ke ngwag mfen.

¹⁵A bwô ndù bo diag ntùm ṅwa'ni tse tà tsho ke nkite tshob tshu bwe là; o nsi fon tshô sen tusô là bwe, yen ndù a b'a tusô ghatatu, tusô ndù a be ma'ni fenfen boa ngomna, mbèn mbe ndù bo b'a ghatatu tà fe mbwembwe. A ju z'a na' ngù bo sate sen tusô là là.

¹⁶Bag ke nsoṅ mfen à mb'a bam bo kut sen tusô là mbèn mbù'te kàbngô tse, mb'a b'a ke bèn ngù sàm dù' yen yoṅ ta'ntse li.

¹⁷Mbùnte ṅwa'ni mi mfen tum Rehum, ngomna, Shimshai, ngakite boa tshé' shun tshobe, tse bo ke ntswe Samaria mba tsemo' dù' yoṅ ta'ntse li: Tsha'te!

¹⁸Ṅwa'ni ze bin na' ntum bag là, bo siaṅ i kua' mbwe àm.

¹⁹Me lo yoṅ ntshob ndù bo diag tshen nu là; bo diag njen ndù sen tusô là lo ke mbù' tu nsi num fenfen, nke nkam ntanta netum kuan fe tà mbwembwe.

²⁰Tsemo' fenfen neta lo be Yérusalém, nke ntô njoṅ ngô fa z'a yoṅ ta'ntse là. Bo lo ke mfà ntshub bo, mfà tagsi, mbèn nke mfà nkàb bam ntshùa.

²¹Ndùlala, bin ghù ndonni mfa' tshen ben nà tsine; kà bo bèn nekut sen tusô là tà nkum ndùse tu wul àm bèn mbam bo là.

²²Bin bam nà newag yen nu là, mbwôg ndù kà bin ntàn yàm ze njam fenfen.

²³Ndùse ṅwa'ni mfen Artasastia na' nkum mbwe Rehum, Shimshai, ngakite boa shun tshob kà bo siaṅ nà, bo nànte nèn mbaṅ ba Yuda Yérusalém, ndo' fa bo neta ngù mfa' mub tsin.

²⁴Ndùlala bo tsin fa' num Ndà Nsi Yérusalém, fa' tsin ndùlala tà nkum num mbatte ngu'njù bàa mba Darius mfen Persia be num fen nà.