Read Medumba Esdra 5 Bible Online

Esdra 5 - Medumba bible

Esdra 5

¹Là, ngatshob ntshob Nsi Hagai bo ngatshob ntshob Nsi Sakaria, nshum Iddo, tshob ntshob ghatshob ntshob Nsi, ntshob nu ba Yuda tse bo be Yuda bo Yérusalém nà num Ndà Nsi Israél.

²Ndùlala Zorobabél nshum Shealtiel bo Yoshua nshum Yotsadak lo nsi, nto' nekut Ndà Nsi Yérusalém. Bo na' mb'a boa ghatshob ntshob Nsi tse bo ke ntomte yub là.

³Be num yen ngelaṅ nà Tatnai, ngomna yen yoṅ ta'ntse là, Shetar-Boznai boa shun tshob nèn mbaṅ bo ntshob bo ndù: We z'a bam bin ndù bin kut yen ba' li mbèn mbù'te tshen kàbngô li à?

⁴Bo bèn ntshob bo ndù: Ndèn ben tse bo tshwèt nkut yen ba' li b'a ba we?

⁵Nda' ndù lag Nsi ke tsho' num tse ghakwé mbwe ba Yuda. Bo faṅ ba Yuda nke nèn mfa' mbwe ndùse bo ke nkite tshô tum Darius là tà nkum ndùse bo kwé mbùnte ṅwa'ni num bwe là.

⁶Tshù ṅwa'ni ze Tatnai, ngomna yen yoṅ ta'ntse li, Shetar-Boznai boa shun tshob Afarsak tse bo ke ntswe yen yoṅ ta'ntse li kite Darius li.

⁷Bo kite yen tshô li yi ndù: Fite be mfen Darius!

⁸Mfen lèn ndù bag lo nèn ntaṅ ngô Yuda num neyen ba' Nsi ndùb. Bo ke ndo' à ndoṅ netshua'te nkut ba' là yi, nke njab ntù num kum tse; fa' tshwèt nzin à kua' ndende, nke ntshùa mum mbu mub mebwô.

⁹Bag lo bètte ghakwé mbwe ntshob bo ndù: We z'a bam bin ndù bin kut yen ba' li, mbèn mbù'te kum tse à?

¹⁰Bag lo bètte yub mba ndèn mube, nkite wù ndù o lèn ndèn ben tse bo be tu netèt bo là.

¹¹Tshù mbùn ntshob mi bo fà bag li: Bag b'a ghafa' Nsi z'a ghù kamànyam bo tsha' là, bag ke mbèn nkul à ba' ze bo na' nkule, a ndonni ngu'njù yàm nà; mo' mfen ndùb ntùm ngô Israél lo kul i tà miagte.

¹²Là, ndùse tà tshag na' nkag yantù ntù Nsi z'a ghù kamànyam nà, a swèn yub mum mbu Nébukanetsar, mfen Babilon z'a be ze Kaldéa là; a sate yen ba' là ndo' ngô nèn yi ndà kuan Babilon.

¹³Mba tà ndùlala, a be num ze mbwe ngu'njù fen Kirus mfen Babilon, mfen Kirus tshob ndù bo bèn nkut yen ba' Nsi là.

¹⁴Mfen Kirus sô mba tshunkàb gol bo silba tse Nébukanetsar na' nket Ndà Nsi Yérusalém nèn njab ntùm ndà ze nsi Babilon nà, mfà Sheshbatsar ndo' i ngù ngomna yi ntshob ndù:

¹⁵Lo' tshen tshundà li nèn njab Ndà Nsi Yérusalém, bo bèn nkut Ndà Nsi kua' num dù' z'a na' mbe là.

¹⁶Yen Sheshbatsar li se', ma' tun ba' Ndà Nsi Yérusalém; fe yen ngelaṅ nà, bo tshwèt nke' nkut ba', a ke' yoṅ mi.

¹⁷Ndonni, a be ze mfen kô là, bo diag ntùm ndà bo num ndé' tse ṅwa'ni mfen Babilon bwe là njene, a be ze mfen Kirus na' mbe ke tshob ze tu wut ndù bo kut yen ba' Nsi li Yérusalém nà. Yen nà nsi be tôg mfen soṅ yag mb'a yen ze là num yen nu li.