Read Medumba Esdra 8 Bible Online

Esdra 8 - Medumba bible

Esdra 8

¹Tshù ndèn fenfen tunndà boa ngùt ben tse bag à bo ko' Babilon num ze ngelaṅ fen mfen Artasastia li.

²Guershom tum netèt tse nshum Finéas; Daniel tum netèt tse nshum Itamar; Hattush z'a tum num Shekania là tum netèt tse nshum David;

³Sakaria boa bandum bon tàn nkù tse bo kite ndèn mub ntùm ṅwa'ni tunndà là tum netèt tse nshum Pareosh;

⁴Eljoénai nshum Zérakia boa bon bandum nkù bàa tum netèt nshum Pakat-Moab;

⁵nshum Yakaziél boa bon bandum nkù tat netèt tse nshum Shekania;

⁶Abéd nshum Yonatan boa bon bandum ṅam ntàn tum netèt tse nshum Adin;

⁷Esaya nshum Atalia boa bon bandum ṅam sammbàa tum netèt tse nshum Elam;

⁸Zébadia nshum Mikaél boa bon bandum ṅam fom tum netèt tse nshum Shéfatia;

⁹Abdia nshum Yéhiél boa bon bandum ntshob fom mén bùm nkù tum netèt tse nshum Yoab;

¹⁰Yosifia nshum i boa bon bandum bon ntôg nkù tum netèt tse nshum Shelomit;

¹¹Sakaria nshum Bébai boa bon bandum ntshob fom ṅam mbàa tum netèt tse nshum Bébai;

¹²Yohanan nshum Hakkatan boa bon bandum mén bùm nkù tum netèt tse nshum Azgad;

¹³miagte bon Adonikam, Elifélét, Yeiél, bo Shemaéya boa bon bandum ṅam ntôg tum yub netèt tse nshum Adonikam;

¹⁴Utai bo Zubbud boa bon bandum ṅam sammbàa tum yub netèt tse nshum Bigvai.

¹⁵Me Esdra tse'te yub mbaṅ ta'ntse mi a be ntèn nèn nze Ahava là. Bag te mbàn bwe num lé'njù tat. Ndùse me lôte ngô boa ghale'te là, me ke yen sàm nshum Lévi netèt bo.

¹⁶Ndùlala me tum bo tsiaṅ Eliézer, Ariél, Shemaéya, Elnatan, Yarib, Elnatan, Natan, Sakaria bo Meshullam, mba Yoyarib bo Elnatan ngalèn ntshù'.

¹⁷Me tum yub mbaṅ mfen Iddo z'a ke ntswe Kasifia là, nso ntshob mi bo nsi tshob Iddo boa fèt tse ba Nétinia là ntshu bo; bo ke ntswe à Kasifia. Bo nèn mbètte yub ndù bo lo' ghafa' nse' yi ntùm Ndà Nsi be.

¹⁸Mba bu Nsi be ze ntùn be nkabte be là, bo nsi lo' Shérébia, nzenu netèt tse nshum Makli, nshum Lévi, nshum Israél se' yi, boa fèt tse, benntùn ntshob fom gham;

¹⁹lo' Haahabia bo Esaya netèt tse nshum Mérari, fèt tse nshumnshum tshobe, benntùn ṅam mbàa;

²⁰lo' benntùn netèt ba Nétinia tse David boa fenfen na' njab yub num fa' ben Lévi là ntu nkù bàa, ntsiaṅ yub ndèn mube.

²¹Me ghù bag tswe nziku' mbaṅ ta'ntse Ahava, ndùlala ndù bag fà wut nsi mbwe Nsi yag, ndù a ghù yag nkatte tôg kua' mebwô num bag, num bon tshage, mba num njoṅ tshu tshag fa.

²²Tuswe lo ghù neko àm, a be ze me na' mbètte mfen ndù a fà ba soyé boa ghako' nyàm ndù bo kabte yag num manze là. Nummbe bag lo tshob yi ndù: Bu Nsi yag be njwimte njoṅ benntùn fa tse bo be ndiag i là, là neta i bo yantù i be nkab mbu num njoṅ ben fa tse bo ghua' i là.

²³Tshù ju z'a na' ngù bag tswe nziku'u, ntsiaṅ lén Nsi yag là. A lo ne nju' nze yag.

²⁴Me tsho' fenfen ghale'te ntshob bàa gham, Shérébia bo Hashabia mba fèt tshob ntu gham.

²⁵Me fi' silba, gol boa tshundà tse mfen, ghafà ntag tse, fenfen tse boa njoṅ bon Israél fa na' mfà là mbwe bo. Bo na' mfà tshen tshu là fa à num ndà Nsi yag.

²⁶Ndùlala me fi', mfà silba bo kilô 23 000, mfà tshundà bo ndù a lèt 3 450, mfà gol ntùn bo kilô 3 450,

²⁷ntu' gol ntùn me fà bo là be ndù ta' i lèt nguan kilô 8, mba memo' nkab mbàa ndù bo lo' à mbwô tùn mbom yi, tùn s'a tanjoṅ mbe mba gol ntùn nà.

²⁸Me fà bo ndùlala, ntshob bo ndù: Bin tù' à ben nelàn mbwe Tshùaben. Bo yab tshen tshundà li njam num lén se. Yen silba bo yen gol li b'a ju bwôntù ze bo fà Tshùaben, Nsi tà tsin nà.

²⁹Bin lé' tshen tshu là kua' mebwô tà nkum ndùse bin nsi fi' mbwe fenfen ghale'te boa ben Lévi, mba mbwe fenfen tunndà Israél Yérusalém, ntùm nto'ndà ndà Tshùaben nà.

³⁰Ndùlala ghale'te boa ben Lévi kwé silba, gol boa tshundà tse bo fi' mfà bo là, num nelo' nèn yi Yérusalém ntùm ndà Nsi yag.

³¹Bag lo mbaṅ ta'ntse Ahava nenèn Yérusalém num lé'njù ntshob bàa gham ntùm mbwe maṅwù. Bu Mbom yag kabte yage, njôg yag mum mbu ghakeban mba num nkù tse bo bùn yag yi num manze là.

³²Bag kum Yérusalém, mfite num lé'njù tat.

³³A be mbatte lé'njù kuà, bo fi' silba, gol boa tshundà ntùm ndà Nsi yag, bag fà Mérémot ngale'te Nsi, nshum Uria; a na' mb'a bo Eléazar nshum Finéas, mbèn ngù ben Lévi tse boa bo be là, a na' mb'a: Yozabad nshum Yoshua bo Noadia nshum Binnui.

³⁴Bo siaṅ njoṅ i fa, mfi'i, nkite njoṅ mb'a lèt là ntùm ṅwa'ni.

³⁵Be num yen ngelaṅ nà, ben tse bo fe ndà kuan, ndù bo bwe yub à bwe là fà tshule'te, nton mfot mfô ntshob bàa gham Nsi Israél num tu njoṅ ba Israél fa. Nton nkomnjù ntshob ntôg ṅam bwe'e, njùmbwe ntshob sammbàa ṅam sammbàa, ngù mfot mbwe ntshob bàa gham num nukebwô, nton njoṅ i fa Tshùaben à be netone.

³⁶Bo fà ntshù' mfen, kamkam boa ngomna tse bo be mo' yoṅ ta'ntse là. Tshen ben ni nke ntomte ngô, mbèn nke ntomte ndà Nsi.