Read Medumba Esdra 9 Bible Online

Esdra 9 - Medumba bible

Esdra 9

¹Yen nà lo be tôge, fenfen kù'te nse' mbaṅ àm, ntshob me ndù: Ngô Israél, ghale'te boa ben Lévi ke' sô wut yub num tshen ba la' li. Bo so wut num tshùaya'nu ba Kanaan, tse ba Hit, tse ba Férésia, tse ba Yébusia, tse ba Ammon, tse ba Moab, tse ba Egipto boa tse ba Amor.

²Bo so ngonngon tshen mfàm nà, mbèn ndiag mba tse bon tshob be bwe. Nzwit mèn nelàn so wul i num tshen ba la' là; fenfen boa ghakeb ntsha na' mbèn mbwôgmbwe nso neta num men mfànnu là.

³Me Esdra yoṅ mbe ju' men ntshob li mfagte kum bo kummbaṅ sàm. Me tsho'te nyiaṅtu tshàm boa nyiaṅ ntshu tshàm mbu, ntam tun àm nsi ntùm nenywine.

⁴Njoṅ benntùn fa tse ntshob Nsi Israél ke nkag bwôg num bo là kùmte mbaṅ àm, num nu mfànnu ben bo fe ndà kuan nà. Tu wul àm tàn nsi ntùm nenywine, tà nkum num ngelaṅ ju bwôntù ze mfetnjù.

⁵A be num ngelaṅ ju bwôntù, me lo nsi ntùm nge' ze me be bwe là, bag nzwe tshàm mba kummbaṅ sàm ndù njoṅ i fa fagte; me te nkekwi' màm nsi, ntshag mbu Tshùaben Nsi àm,

⁶ntshob ndù: Nsi àm, me b'a ntùm tuswe, tuswe nke nko àm me Nsi àm, nebù' se àm nsi ndôt'o. Nummbe mfànnu mag kabte yage, nukebwô yag ko' tà nkum mfe kamànyam.

⁷Neto' num ze ngelaṅ tà tshag tà nse' nkum sènni, bag b'a tonkèt ghavù ntsha. Mfànnu mag na' mbèn ngù kà bag ntù' bu', bag, fenfen tshag boa ghale'te tshage. Bag lo tù' ju ntàn fenfen tsemo' ngô, ntù' ghakwù ṅwi, ntù' kuan, bo lag ntsha' yag, tuswe ko yage, mfim yag tà nse' nkum mba sènni.

⁸Mba tà ndùlala, a ke' ghubte mba Tshùaben Nsi be la'te kondèn i num be ngù metshé' mèn ke' netèt be, mbèn mbam nefà ndàlem be ntùm dù'ntswe i ze nelàn nà. Nsi be na' nke nkô neké' à nelàn i num miag be, mbèn mba' yôg be ndà kuan dù' be be là.

⁹Nummbe be b'a kuan; là Mbom be ke' ghua' be ndà kuan. A lo ghù be tum ghafen mbwe fenfen Persia, a fà yôg s'a tsho nyàm nà be, ndùlala ndù be kut ba' Nsi be mbèn mbù'te ze fam. A lo bù ndàlem be Yuda mba Yérusalém.

¹⁰Wù Nsi yag, be bag bèn ntshob à ndùke ndonni à?

¹¹Bag lo ghua' ntshù' mi o na' ntshùa njam ghafa' tsho ghatshob ntshob Nsi mfà bag là. O lo tshob ndù: Ngô ze bin tshwèt nèn tsho bwe, lo' a tù' zin nà b'a ngô kebwô, nukebwô ts'a ntùm tshen ngô là sagte yube. Tshùaya'nu bo nukebwô dun ntùm bwe nelo mo' taṅ nèn nkum num mo'o.

¹²A ndùlala, kà bin fà ngonngon tsin tshob bon, ke bèn mbètte tshob ngonngon mfà tsin bon. Kà bin lat wut zin mba bo tshwèt nsine, ngù yôg mebwô là. A nsi tshùa ndùlala bin tù' ben neta, ngù mbwô ntàm mi à ntùm yen ngô li là, mbèn ngù mfaṅ ngô là bon tsin mba ntsi' là.

¹³Nu ts'a ghù yag là na' mb'a num mfa' mag mi kebwô, mba num nukebwô tshag tse ndùbndùb. Mba ndùlala, o lo ghua' yage, ntshé'te benntùn netèt bag me Nsi yag, ngù bag ndùlala, ke siaṅte mfi' mba mfànnu mag be yi là.

¹⁴Be bag bèn nke nke' mbagte ntshù' mu, nke nso wut yag num tshen bagkèt benntùn ni à? Mb'o ke nsi ya ntù num bag, kà biagte yag ke bam sàm mèn tum ntshu vùkob ké?

¹⁵Tshùaben Nsi Israél, o b'a mèn netsine, bag tse bag b'a mbwe' vùkob sènni là, tshù bag li mbwe o bag à nukebwô yag. Bag lèn mb'a tshùa num nukebwô bag ke bèn nku'ni netsin mbwe o kà mbe ntùn.