Read Medumba Néhémi 5 Bible Online

Néhémi 5 - Medumba bible

Néhémi 5

¹Tsemo' bon ntùm ngô boa zwi tshob nke ntshobte tun ntô num fèt tshob ba Yuda kua' kebwô.

²Tsemo' nke ntshob ndù: bag, bon tshag tse bandum boa tse bènnzwi, bag yàm; a bwô nefà ngefet bag, ndù bag jù kà nke njôge.

³Tsemo' bèn nke ntshob yub ndù: Bag num mfà nà tshage, nkùa tshag boa mba' mage, kà ngù ngefet nelo' njôg yi ngelaṅ nziku'u.

⁴Tsemo' bèn nke ntshob ndù: Bag lo' nà tshag boa nkùa tshag mfo nkàb yi num ntshub mfen.

⁵Ndù lem tshag b'a kua' lem fèt tshage, bon tshag b'a kua' bon tshobe. Mba ndùlala bon tshag tse bandum boa tse bènnzwi tù' à kuan tshobe; tsemo' ngonngon tshag tshwèt njen nge' bu bo. Bag ke' bèn ngù mba' ntùm ngô, nà tshag boa nkùa tshag tù' à tse tsemo' ben.

⁶Nu bag àm kua' neshu ndùse men ntshob boa tshen nezwete tun ntô là tam ntoṅ àm nà.

⁷Me jù' ndù m'a' tshobte ben ndùbndùb, ghakeb ntsha, ntshob ndùlala ntshob bo ndù: A ndùke? Bin ke mfo nkàb fèt tsin nkwé bin à? Ndùlala me kùmte mo' bwoṅ benntùn mbaṅ bo, ntshob bo ndù:

⁸Bag lo lo' yag metsit ngù' ze bag ghù là ntshu' fèt tsin ba Yuda yi netèt ngôngô tse bo swènte yub bwe là. Là bin tshwèt nswèn fèt tsine, nke nswèn yub à bag. Bo tswe ntshu mi'i, ke ghù sàm ju netshobe.

⁹Me bèn ntshob ndù: ze bin tshwèt ngù ndùlala ke' bwô. A lo ke bwô ndù bin zin à ntùm nebwôg Nsi be, ndù kà ngôngô tse bo b'a ghakeban be là tute be ké?

¹⁰Mba tu wul àm, fèt tshàm mba ghafa' tshàm, bag lo tshwé' ngefet bo. Ndùlala, a bwô be ghua' yen njo là.

¹¹Neto' sènni, a bwô ndù bin ba' nà tshobe, nkùa tshobe, nten mub boa mba' mub bo. Bin ba' mba njo nkàb, ze ngefele, ze nsa bo ze mfèt, tse bin na' ntshùb nkwé bo là bo.

¹²Bo bùnte ndù: Bag nsi ba' njoṅ i fa bo, ke bèn nebètte yub sàm ju. Bag nsi ghù mb'o tshob là. Me tsiaṅ ghale'te boa nshumnshum tshobe, ngù bo kàn mfe ndù bo nsi ghù à ndùlala.

¹³Ndùlala me tshwètte mbab num kummbaṅ sàm ntshob ndù: A bwô ndù Nsi tshwètte mba we lo z'a ke' tshùb ntshob mi là, nsô i ntùm ze ndà, netèt tshu tse. Mèn ze Nsi tshwètt'é ndùlala là tù' mbu ndaṅe. Njoṅ mbumte fa bùnte ntshob ndù: Amén! Nyàmte Tshùaben. Ngô tshùb ntshob mi kua' mebwô.

¹⁴Fe mum lé'njù se bo na' nso lén ngomna me ntùm ngô Yuda, neto' num mbatte ngu'njù ntshob bàa ṅam mbàa nèn nkum mbatte ngu'njù ṅam ntat mba mfen Artasastia be num fen nà, a be ndonni à ngu'njù ntshob bàa gham. Tu wul àm ke fèt tshàm no, bag ke' to' jù yag bàn ngomna.

¹⁵Ngomna tse bo bwôg be me là lo nyu' ngô, nke nkwé bàn bo ndu' bo, kà mbèn ngù ndô nkàb silba ṅam nkuà; tshé' ghafa' tshob lo bèn nke ngù yub be ndaṅndaṅ, nke mfétte ngô. Tu wul àm me ke' ghù ndùlala, nummbe me tshwèt mbwôg Nsi.

¹⁶Ntôg ndùlala, me lo' fa' num nenabte yen kàbngô li. Bag lo ke jun sàm nà; ghafa' tshàm lo ke mbe tshwèt fa' njoṅ yub fa.

¹⁷Benntùn ntu bon tàn nkù lo ke njù ndà àm, ba Yuda boa ghakeb ntsha, ke siaṅ ben tse bo ke mfe ntùm ngô ts'a diaṅ yag mbum nse' là.

¹⁸Bo lo ke na ta' nyàmna', njùmbwe gham tse ntùn boa ngab ta' lé'njù. Bo ke nkite njoṅ i fa à num sàm lén; a lo ke mbe njoṅ lé'njù fa ntu' ndu' be nsi kua' mà yàme. Mba tà ndùlala, me lo ke bètte bàn ngomna, nummbe fa' lo lèt ngô neshu.

¹⁹Nsi àm, kwimt'àm kua' mebwô num njoṅ nu fa ze me ghù num yen nzwit mèn ni là.