Read Medumba Néhémi 6 Bible Online

Néhémi 6 - Medumba bible

Néhémi 6

¹Sanballat, Tobiya, Guéshem ze Arab boa tsemo' ghakeban tshag ju' mbe me bèn nkut kàbngô kà sàm fa ke bèn mbe bwe. Mba ndùlala, a lo be be me ke yoṅ nso nzendà.

²Bo tum mèn, mbètt'àm ndù bag à bo bumte ntùm mo' ngô mà tômbo' Ono, ntshobte bwe. Bo lo ghù nkwate nelem àm.

³Me tum ntum, a tshob bo ndù: Fa' num me nsi neshu, be me ke swe' nkum nsen nà. Me ke' ghù kua' ju z'a be me kag fa' nsi nswe' nse' bag bin tshob là.

⁴Bo bètt'àm ndùlala yoṅ tse kuà, tu wul àm nke mfà be mbùn ntshob ntshù' bo mba zit yoṅ i lo.

⁵Num mbatte yoṅ tàn, Sanballat bèn mbètt'àm, ntum ngafa' i ndù a tshùb ta' ṅwa'ni bu i, ndù bo kite ke fim,

⁶ndù bo kite ntùm bwe ndù: Bo tshwèt ntshob netèt ngôngô ndù a be z'o bèn nkut kàbngô là, mba tu wul o bin à ba Yuda nsi kam tatu. Mba Gashmu tshwèt mbam yen nu là. Bo tshob mb'a be ndùlala mb'o nsi tù' mfen.

⁷A tswe mba ndù o yà yab ghatshob ntshob Nsi tse bo nsi lo' o ghù mfen Yuda yi Yérusalém nà. Men ntshob là nsi tam toṅ mfen kà ke tag. Ndùlala, a bwô ndù o se' be tshobte.

⁸Me bùnte yi ndù: sàm nenùn ke ntùm nu z'o tshwèt ntshob là. O bèn ntàmte yen nu là be kua' tu o.

⁹Tshen ben ni na' nke ndiag nekag à nyu' num bag. Bo lo ke ntshob bo bo ndù: Mbu mub nsi yube, fa' tsine. Nsi àm, a bwô ndonni ndù o so tànntù ntù àm.

¹⁰Me nèn ju Shemaéya nshum Delaya, nshum Mehétabel. A lo be be ndù a fùn wul i ndà. A tshob me ndù: Be nèn Ndà Nsi ku ntshù', nèn netèt Ndà Nsi mfùn nzendà. Tshù, bo tshwèt nse' zwi o, bo nsi se' à tèttswe'.

¹¹Me bùnte ndù: Mènntùn mba me là kù ké? A zit mèn mba me là ghù netsho ntùm Ndà Nsi kà njôg à? Me ke nsi tsho bwe.

¹²Me lo lèn mb'a ke' b'a Nsi bèn ntum i. A na' ntshob men ntshob ngatshob ntshob Nsi li num àm à nummbe Sanballat bo Tobiya lo lo' nkàb njunt'é yi.

¹³Bo lo be ghù ndùlala nke nkwate mbe m'a' bwôg, nzin a mb'a tshob là, ntshùa ndùlala ngù nukebwô, bo tshùa bwe ntam tuswe num lén sàm se neju'ni.

¹⁴Nsi àm, kà tsho' lag num Sanballat bo Tobiya mba num mfa' mube! Kà lagte mba Noadia, ngale'te ze mènnzwi boa tsemo' ghale'te tse bo ke ndiag nekag nyu' num àm nà.

¹⁵Bo miagte nekut kàbngô mum lé'njù ntshob tàn ṅam mbàa ntùm ṅwù Elul, mum lé'njù ntshob bàa ṅam ntàn.

¹⁶Ndùse ghakeban tshag ju' yen nu là là, njoṅ ngô fa tse bo diaṅ yag mbum nà b'a ntùm bwôg, mo' mà tuswe ndùb ghom yube, tu wut tshob lèn mbe sen fa' là b'a mba Nsi yag bèn nkô là.

¹⁷Tsemo' ben ndùbndùb netèt ba Yuda lo ke nkite ṅwa'ni Tobiya yen ngelaṅ nà, mbèn nke nkwé ṅwa'ni ts'a fe yi là.

¹⁸Nummbe ben yàm netèt ba Yuda lo lat num i njam nkàn mfe, mba ndù a na' mbèn nso ngon Shekania, nshum Arak, mba ndù nshum i Yohanan lo so ngon Meshullam, nshum Bérékia.

¹⁹Bo lo ke ntshob mebwô num i mba kua' mbwe àm, mbèn nke nsoṅ i ntshob mi a tum ntshu àm nà. Tobiya lo ke ntum ṅwa'ni me, nelo' nkag bwôg yi num àm be yoṅ yàme.