Read Medumba Esta 2 Bible Online

Esta 2 - Medumba bible

Esta 2

¹Yen nà lo be tôge, yantù mfen Asuérus kôgte, a bèn nkwimte Vasti, nkwimte ju z'a na' ngù bo ntshob mi bo tshob num Vasti là.

²Ndùlala ben tse bo be njam mfen, nke mfa' yi là tshob ndù: A bwô ndù bo diag ngonngon ntùn tse bo ke' tàbte yube, bo bèn mbwô num se yub là mfen.

³A bwô ndù mfen yab ghafa' ntùm njoṅ ntaṅ ngô ze nufen fa. Tshen ben ni kùmte njoṅ ngonngon ntùn tse bo ke' tàbte yube, bo bèn mbwô num se yub là Suse, ntùm tètla' ngô, ntùm ndà bènnzwi. Hégai z'a be mbantshù' mfen nà nsi ke lôte yube. A nke ndôte yube, nke mfà bon tshu nenabte wut yi bo.

⁴Ménngon z'a nsi bwô mfen nà nsi tù' màbwengub num ze dù' Vasti. Mfen bam yen nkwate là, ngù be ndaṅndaṅ.

⁵Tshù, mo' ze Yuda lo be Suse lén se Mardokai, mbe nshum Yair, nshum Shiméi, nshum Kis, mèn ntùm tunndà Benjamin.

⁶Bo na' ndo' Mardokai à netèt kuan ntsho tse bo ghom Yérusalém boa Yékonia mfen Yuda là. Nébukanetsar mfen Babilon na' mbèn ngom yub ndùlala.

⁷Mardokai na' mbèn nke nkwiagte Hadasa z'a be Esta là. Esta na' mb'a ngon mo' tà Mardokai. Tà Esta bo màab lo yà kwù. Ménngon ni lo bwô num se i kua' neshu. Ndùse tà Esta bo màab kwù là, Mardokai kwiagt'é mba ngon i là.

⁸Ndùse bo na' njoṅ ntshob ntshù' mfen nà, bo yoṅ nkùmte mbe' yàm ngonngon Suse, tètla' ngô, Hégai nke ndôte yube. Bo lo' mba Esta ze nèn yi ntshwèt mfen, Hégai ngalôte bènnzwi nke mbéb yube.

⁹Nu metshab ngon li bwô i neshu, a yab ntù num i. A nànte mfà bon tshu ts'a bwô ndù a ghù num nenabte wut yi là mba nelo' ntshab wul i yi là. A yab Esta boa ghafa' tse tse bènnzwi à ntùm mo' to'ndà mebwô ntùm ba' bènnzwi ntshwèt.

¹⁰Esta ke ghù bo lèn nzwit z'a tum bwe là, ke tunndà i lo. Nummbe Mardokai lo tagt'é ndù k'a tshob sàm nu.

¹¹Là, Mardokai lo ke nse' ntshundà, ntshwèt bènnzwi mba sit lé'njù lo nke nkatte, nke ndiag nelèn mba Esta lo' ntswe yi là bo mb'a lo' mbe yi num i là.

¹²Mba zit ménngon lo lo ke nto't'a num ntshù' ze bo kite bènnzwi là, ngù ndùlala num ṅwù ntshob bàa gham. Yen nà b'a njoṅ ngelaṅ ze bo na' njab bo num neke nabte wut yi là. Bo lo ke ndo' ṅwù ntôg nke mbé'te be mfèt nelamte, mi mire; mo' ṅwù ntôg be neke mbé'te memo' tshaṅ mfèt nelamte mi bènnzwi be nke ndo' nabte wut yub yi là.

¹³Ndùse yen ni tôg là, ze ngelaṅ mèn ku' netsho ndà mfen nà, mb'a ku'ni nebètte mba ke lo z'a kô là kà bo mbam a nèn mbaṅ Asuérus, nelo ndà mènnzwi nèn ntshwèt mfen.

¹⁴Ndùse mènnzwi tsho bwe mfetnjù là, a nèn ntùm mo' ntshwèt bènnzwi nkebnjù. Shashgaz mbantshù' mfen bèn mbe ngalôte màndà mfen yen dù' là. Ndùs'a tum nà, a ke bèn njam ndà mfen ke be ndù mfen bèn ndiag i, nkù ntù num i kà ntsiaṅ i à lén se.

¹⁵Se lé'njù Esta nenèn mbwe mfen lo te nsi, Esta bètt'a nda' ju ze Hégai mbantshù' mfen, ngalôte bènnzwi na' ntshob yi là. Esta lo ghù fen, nke ndo' ntù mba we lo z'a yen i là. Esta b'a ngon Abishail mo' tà Mardokai. Mardokai na' mbèn nkwiagte Esta.

¹⁶Bo lo' Esta nèn yi mbwe mfen Asuérus, ntùm ntshwèt fen. A na' mb'a mbatte ṅwù gham z'a be ṅwù Tébet là. A lo be be ndù mfen tswe num fen ngu'njù sammbàa.

¹⁷Mfen kô Esta, njab ntù num i ntshùa tsemo' bènnzwi fa. Esta tum mènfen mbwe mfen ntshùa tsemo' ngonngon fa. Ndùlala mfen yab kétmbùm tu i ndo' i ngù màbwengub yi num ze dù' Vasti.

¹⁸Mfen ghù ta' jùa ndùb, jùa Esta; a ghù sen jùa là njoṅ kamkam tse boa njoṅ ghafa' tse fa. A kôgte ntshub tu ntaṅ ngô, ngù nzenze tshu ts'a ku'ni num ta' kwatum nà.

¹⁹Tshù, ndùse bo ke nkùmte ngonngon num mbatte yoṅ bàa là, Mardokai be ntshundà mfen ndù a tswe nsi.

²⁰Esta ke ghù bo lèn tunndà ke nzwit z'a tum bwe lo là, nummb'a ke nzin à num ntag mi Mardokai fà yi là. Esta nke nzin à be kua' mba Mardokai tshob là, ngù à mb'a ke' à kua' metsit mén njam i là.

²¹Ngelaṅ Mardokai be ntshundà mfen ndù a tswe nsi là, Bigtan bo Téresh tse mbantshù' mfen tse bo ke mbéb ntshufe' là, ghù nkwate kebwô ntù bo num mfen Asuérus, njù' ntù bo nekab mbu num mfen nzwi i.

²²Mardokai lèn yen nu là ze bo tàmte là, nte bu num màbwengub Esta, a soṅ mfen yen nu là num ze ntshu Mardokai.

²³Bo lôte nu num yen nu là, a tum be kua' ndaṅndaṅ, ndùlala bo taṅ tshen ghafànnu bàa li tù. Bo kite yen nu là ntùm ṅwa'ni Kronika mbwe mfen.