Read Medumba Esta 3 Bible Online

Esta 3 - Medumba bible

Esta 3

¹Tshen nu là lo be tôge, mfen Asuérus ko'te se diaṅ Haman nshum Hammedata ze mèn Agag. A so lén Haman, nko'te diaṅ se a tshùa se njoṅ fenfen fa bo ke mbe mbaṅ i là.

²Njoṅ tshe' mfen fa tse bo ke ntsinte nzendà mfen nà lo ke njab bu ntshu bo kà ndab Haman. Nummb'a b'a ju ze mfen tshob ndù bo ke ngù mbwe Haman nà. Là Mardokai ke be yab bu ntshu i, ke bèn nke ndab Haman.

³Tshe' mfen tse bo ke ntsinte nzendà mfen nà nke ntshob Mardokai ndù: numk'o nke mfàn ntshù' mfen à?

⁴Mba bo ke nkwimte yi njoṅ lé'njù fa, a ke kô neju' là, bo soṅ Haman yen nu là, nke ndiag neyen a be ze Mardokai saṅlaṅ ntùm nkwatenu mi là; a lo ke ntshob bo ndù a b'a ze Yuda.

⁵Haman yen ndù Mardokai ke' be yab bu ntshu i, ke bèn nke ndab i. Ndùlal'a ya ntù neshu.

⁶A wag nekab mbu nda' num Mardokai tù' i, nummbe bo lo soṅ nzwit mèn ze Mardokai tum bwe là. Ndùlal'a jù' mb'a nsi biagte nzwit ze Mardokai tum bwe là, mbiagte njoṅ ba Yuda fa tse bo be ntùm ze nufen Asuérus là.

⁷A na' mb'a mbwe maṅwù, z'a b'a ṅwù Nisan nà. Mbe mbatte ngu'njù ntshob bàa gham mba mfen Asuérus be num fen nà. Bo ma' mbùm nsi, yen nà bagt'à ndù mbùm tô, mbwe Haman. Bo ma' i mba num sit lé'njù lo boa mba zit ṅwù lo, tà nèn nkum num ṅwù ntshob bàa gham z'a b'a ṅwù Adar là.

⁸Ndùlala Haman tshob mfen Asuérus ndù: mo' nzwit mèn num ntùm njoṅ ntaṅ ngô yu nufen fa, nke njôg yub à tù' bo. Mub ntshù' ke' fute mi tsemo' ben, bo bèn nke nsô wut yub num neke nze mi ntshù' mfen. A ywimte ke ndù mfen faṅ tshen ben nà ndù bo zwiag à?

⁹A be ze mfen bam nà, mba bo nsi kite ta' ntshù ndù bo biagte yube; a be ndùlala mba me nsi fi' talaṅto silba ntsha' gham fà mum mbu ghafa', bo so ntùm tshunkàb mfen.

¹⁰Mfen sô kwa se se màkwa i be bwe là bu i mfà Haman nshum Hammedata mèn Agag z'a b'a ngakeban ba Yuda là.

¹¹Mfen tshob Haman ndù: bo fà silba wù bo yen nzwit mèn nà. Ghù mb'o kô là num bwe.

¹²Bo tsiaṅ tse ghakite mfen num lé'njù ntshob tat gham ntùm mbwe ṅwù. Bo kite kamkam mfen boa ngomna ndaṅndaṅ mba Haman tshob là, nkite mba tse zit taṅ ngô lo, nkite mba mfen zit ngô lo, nkite mba zit taṅ ngô lo à num ze mat nekite mba zit ngô lo à ntùm mi ntshobe. Bo kit'a num se lén Asuérus, ndo' ze màkwa mfen nte num bwe.

¹³Bo tshag ṅwa'ni ntùm njoṅ mi ntaṅ ngô mfen fa, ntshob ntùm bwe ndù bo sate, nzwite mbèn mbiagte njoṅ ba Yuda fa: nguanmèn bo njwèn mèn, bontsit bon boa bènnzwi num ta' lé'njù ntshù'. A na' mb'a num lé'njù ntshob tat gham ntùm maṅwù ntshob bàa gham, z'a b'a ṅwù Adar là. Ṅwa'ni tshen nà bèn ntshob ndù bo ṅwat njoṅ tshu tshob fa ndag ntsha' yi.

¹⁴Ntshù' ze bo kite là lo be ntùm tshen ṅwa'ni là. A bwô ndù bo sa yen ntshù' là mba ntùm zit taṅ ngô lo, ngù njoṅ ngô fa nabte wut yub num sen lé'njù là.

¹⁵Tshen ṅwa'ni là nèn à be ndende mba mfen na' ntshob là. Bo sa yen ntshù' là mba Suse z'a be tètla' diba là; ngô tswe à ntùm nenywin bo bwôg ndùse mfen bo Haman ke nu tshob ndu' là.