Read Medumba Netume 10 Bible Online

Netume 10 - Medumba bible

Netume 10

¹Tshùaben tshob Mosé ndù: Nèn ndà Faraon nummb'a me bèn nkô ndù a ta tu boa ghafa' tse, ndù a tshùa ndùlala me la'te tshàm nsà netèt bo;

²mba ndù tu wul o ghù nsoṅ nshum o boa tse bon nshum o mba me na' ntute ba Egipto boa lèn nsà tse me na' ngù netèt bo là. A nsi tshùa ndùlala bin lèn ndù a b'a me bèn mbe Tshùaben.

³Mosé bo Aron tsho ndà Faraon ntshob yi ndù: Tshù mba Tshùaben Nsi ba Héber tshob li: O nsi ke gha nefà wul o nsi mbwe àm tà nèn kum à ndùke? Faṅ yàm nzwit mèn a nèn mfa' me.

⁴A be z'o ke nke' nga nefaṅ yàm nzwit mèn nèn nà, mba me nsi ghù ngamntàn se' ntùm yu ngô ndamnjù.

⁵Bo nsi kabte ngô kà bo ke bèn neyen i. Bo nsi fèt tshé' ju z'a tum ntshu nywin mbaṅ nà, fèt njoṅ ntù min fa mi a bit mà tshwèt là.

⁶Bo nsi tshote ntùm mba' mu kà dune, ntùm mba' ghafa' tsho boa mi njoṅ ba Egipto fa. A nsi b'a ju ze tà tsho boa tse tà tsho tse ndùb na' mbe ke to' yen fe mba bo be ntùm njù là. Mosé kaṅ wul i, ntum ntùm ndà Faraon.

⁷Ghafa' Faraon tshob yi ndù: Yen mèn nsi ke be ywi' be tà kum à ndùke? Faṅ tshen ben ni nèn mfa' Tshùaben Nsi yub. O ke' yoṅ njen tsho mba Egipto tshwèt mbi ké?

⁸Bo tsiaṅ Mosé bo Aron mbaṅ Faraon, a tshob bo ndù: Bin nèn mfa' Tshùaben Nsi zin. A b'a ba we bèn nèn à?

⁹Mosé tshob ndù: Bag nsi nèn à bag à bon tshage, boa tshag ywèn benntùn; bag nsi nèn à bag à nshumnshum tshage, ngonngon tshage, nyàm tshag tse nke' mba tse ndùb. Nummb'a b'a jùa ndùb se bag nsi ghamte Tshùaben yi là.

¹⁰Faraon tshob ndù: Tshù mba bo tshù njene! A bwô ndù Tshùaben be bin, a be ze me faṅ zin bin nèn bin à bon tsin nà. Bin zete, ndèn ndù nkwate min ke' be mebwô.

¹¹A ke nsi b'a mba bin tshwèt nkwate là. Bin bandum nèn mfa' Tshùaben mba bin tshwèt ndiag là. Bo tshob ndùlala, nta' yub mbwe Faraon.

¹²Ndùlala Tshùaben tshob Mosé ndù: Tshag bu mum ngô Egipto ngamntàn se' bwe. A bwô ndù bo fèt njoṅ nenà fa, njoṅ i fa z'a tum ntshu nywinmbaṅ nà.

¹³Mosé tshag kôg se mum ngô Egipto, Tshùaben ghù mo' fetmbaṅ lo ntumnyam nse' ntùm ngô, num sen lé'njù là, mbwôgtshù bo tèttswe'. Njù làn, bo yen ndù fetmbaṅ ntumnyam lo ndo' ngamntàn nse' yi.

¹⁴Ngamntàn gha' mbu tù, nkabte njoṅ ngô Egipto fa, ntam ntsha', lèn ze mèn ke' yoṅ nto' yen lèn ni, mbe ndù lèn ni ke zi mbèn mbe là.

¹⁵Bo kabte ngô kà dù' tam njame. Bo fèt nenà ntùm ngô boa ntàm njoṅ ntù fa mi bo tum ntshu nywinmbaṅ nà. Sàm ju fi ke bèn mbe num ntù mba num nà ts'a be Egipto là.

¹⁶Faraon nànte ntsiaṅ Mosé bo Aron ntshob ndù: Me fàn nu mbwe Tshùaben Nsi zin mba bin.

¹⁷Ndonni a bwô o bèn ndagte nukebwô àm me mo' yoṅ i. Bin le'te Tshùaben Nsi zin, a tshag yen nge' vùkob li ngùanesà mbaṅ àm.

¹⁸Mosé tum ndà Faraon, nde'te Tshùaben.

¹⁹Tshùaben bate fetmbaṅ, ngù mo' neta fetmbaṅ fe mbinyam nket ngamntàn, ntèn yub nèn yi nze mà dibantse meba. Ndô ngamntàn ke bèn ntù' ntùm ngô Egipto mba ntshù'.

²⁰Là Tshùaben kag sagntù ntù Faraon, a ke faṅ bon Israél nèn.

²¹Tshùaben tshob Mosé ndù: Bù' bu o tù. A bwô ndù njam be ntùm ngô Egipto, njam be tà mènntùn be ke ku'ni nemomte dù' mba nemomte.

²²Mosé tshag bu i tù, njam sèn, dù' tam njam num lé'njù tat mum njoṅ ngô Egipto fa.

²³Num tshen lé'njù tat là sàm mèn lo ke yen mfèl i ke bèn ndo dù' z'a be là. Là bon Israél lo ghù nelàn dù' ze bo ke ntswe là.

²⁴Faraon tsiaṅ Mosé ntshob ndù: Bin nèn mfa' Tshùaben. Là bin nsi faṅ nyàm tsin tse nke' boa tse ndùb. Be bin lo' mba bon tsin bin à bo nèn;

²⁵Mosé tshob ndù: A b'a wù bèn fà tshule'te boa nyàm tse bag ton Tshùaben Nsi yag là ké?

²⁶Bag nsi lo' nyàm tshag nèn yi kà ke faṅ mba ta' i ntshù'. Nummbe bag nsi sô nyàm netèt bwe lo' ghamte Tshùaben Nsi yag yi. A be bag be ke yoṅ nkum bwe là, mb'a be bag ke lèn ju z'a bwô bag fà Tshùaben Nsi yag là.

²⁷Là Tshùaben so sagntù ntù Faraon, a ke kô nefaṅ bo nène.

²⁸Faraon tshob yi ndù: Lo mbaṅ àm nène. Bam nà nezi mbèn nte lag num àm. O nsi kwù lé'njù s'o nsi bèn te lag num àm nà!

²⁹Mosé tshob ndù: Mb'o tshob là, me ke nsi bèn te lag num o.