Read Medumba Netume 16 Bible Online

Netume 16 - Medumba bible

Netume 16

¹Bo lo Elim boa njoṅ tunndà bon Israél fa nzin nkum kônkwa Sin, netèt Elim bo Sinaï. A na' mb'a lé'njù ntshob tàn gham ntùm ṅwù bàa, mba bo tum ntùm ngô Egipto là.

²Tunndà bon Israél tshobte tun ntô num kônkwa, num Mosé bo Aron.

³Bon Israél tshob bo ndù: Bu Tshùaben na' mbe ke zwite yag ntùm ngô Egipto, ndùse bag na' ntswete mbaṅ nkab mbàb, nke njù njwèt là numke? Bin lo lo' yag nse' yi num yen kônkwa li ndù njoṅ yen bwoṅ benntùn ni kwùte.

⁴Tshùaben tshob Mosé ndù: M'a' ghù bàn swe' mfe tù mfètte num bin. Ngô ke ntum nkebnjù ntswitte njoṅ bàn ta' lé'njù. A nsi tshùa ndùlala me laṅt'é njen mbe z'a nsi tshùb nkàn màm nà, ṅ, ke nga lo.

⁵A be mbatte lé'njù ntôge, bo nabte ju ze bo lo ndo' à tôgte mfi' là; yen nà b'a ndù yen jujù là nsi tshùa z'a ke mbe mba sit lé'njù lo là.

⁶Mosé bo Aron tshob njoṅ bon Israél fa ndù: Bin nsi lèn yen mfetnjù li ndù a b'a Tshùaben bèn nsô zin ntùm ngô Egipto;

⁷a nsi be nkebnjù bin yen nkuni Tshùaben, nummb'a ju' mba bin tshobte tun ntô num i là. Mba bag là, bag b'a ba we kà bin nke ntshobte tun ntô num bag à?

⁸Mosé ke ndiag netshob à ndù: Ndùse Tshùaben nsi fà mbàb mfetnjù li bin fèle, fà bàn bin nkebnjù ndamnjù là, mb'a b'a nummbe a ju' mba bin tshobte tun ntô num i là. Mba bag là, bag b'a ba we? Bin ke' tshobte tun ntô à num bag, là bin tshobt'a num Tshùaben.

⁹Mosé tshob Aron ndù: Tshob njoṅ tunndà bon Israél fa ndù bo kù'te nse' mbaṅ Tshùaben, nummb'a ju' mba bo tshobte tun ntô là.

¹⁰Ndùse Aron ke ntshob nu bon Israél là, bo kaṅ wut nke ndôte nze mfe kônkwa. Bo yen nkuni Tshùaben ṅwag ntùm ndot.

¹¹Ndùlala Tshùaben tshob Mosé ndù:

¹²Me ju' mba bon Israél tshobte tun ntô là. Ndùlala tshob bo ndù bo nsi fèt mbàb mfetnjù, a be nkebnjù bo jù bàn njwèle, a tshùa ndùlala bo lèn ndù a b'a me bèn mbe Tshùaben Nsi yub.

¹³A be be num yen mfetnjù là ntem nsaṅ ko' ndo' mbàn fa; a be nkebnjù mo' tu' ndot naṅ ntùm mbàn ndiaṅ mbume, ngù kub i.

¹⁴Tu' ndot là sate, mo' ju be num kônkwa mba nkun nà, ndù a kagte, ndo' dù' fa.

¹⁵Bon Israél be yen yen ju li, nto' nke mbètte bo bo ndù: Yen ni b'a ke li à? Bo lo ke lèn ju mbile. Mosé tshob bo ndù: A b'a bàn ze Tshùaben fà ndù bin jù là.

¹⁶Tshù ju Tshùaben bètte mbe bin ghù li: Bin ṅwat jujù njoṅ z'a ku' là, ta' kesoṅ num ta' mènntùn, ndùlala ndù jujù ku' mba num zit mèn no, nummbe bin yàm neshu. Bin ṅwat jujù num njoṅ benntùn tse bo be ntùm ntàb mba we lo là.

¹⁷Ba Israél ghù ndùlala: Mo' mèn ṅwat yàme, mo' ṅwat mo' njoṅ i.

¹⁸Là ndùse bo ke ndo' kesoṅ mfi' yi là, mèn z'a ṅwat yàm nà ke ṅwat ntshùate, mèn z'a ṅwat mo' njoṅ i là ke bwoṅ ju. Mba we lo lo yen mb'a ṅwat njoṅ z'a ku'ni nejù là.

¹⁹Mosé tshob bo ndù: Kà sàm mènntùn lé' ju num ndamnjù.

²⁰Tsemo' ke ju' ntshu Mosé, ndé' tà nèn nkum nkebnjù; l'a bi, ywèt tsho bwe, a nke ndame. Ndùlala Mosé ya ntù num bo.

²¹Bo nke ṅwat njoṅ nkebnjù fa, mba we lo ṅwat mb'a ku' num i là. Ndùse nyam tum nke ndum nà, yen ju là yag.

²²A be mbatte lé'njù ntôge, mba we lo ṅwal a kesoṅ mbàa num tu ta' mènntùn. Njoṅ tà tunndà fa nèn nsoṅ Mosé.

²³A tshob bo ndù: Tshù ju ze Tshùaben tshob li: Ndamnjù b'a Sabbat, lé'njù se bo yab Tshùaben nà. Bin na ju z'a bwô nena là, ntshu'te z'a bwô netshu'te là. Ju z'a tôgte bwe là bin lem num nkebnjù.

²⁴Bo lem mba Mosé tshob là tà nèn nkum nkebnjù. Sàm ju ke lam, ywèt ke bèn mbe bwe.

²⁵Mosé tshob ndù: Bin jù i sènni. Sènni b'a Sabbat Tshùaben. Be bin ke fon sàm ju ntshundà sènni.

²⁶Bin nsi ke ṅwat num lé'njù ntôge, l'a be mbatte lé'njù sammbàa, a be Sabbat. Ju ke nsi be sen lé'njù là.

²⁷L'a lo be num mbatte lé'njù fome, tsemo' benntùn tum ntùm ngô nèn neṅwat jujù, ke fon sàm.

²⁸Tshùaben tshob Mosé ndù: Bin nsi ke gha neze ntag màm boa ntshù' màm tà kum à ndùke?

²⁹Bin yen ndù me Tshùaben na' mbèn mfà Sabbat bin; a bèn mfà mba mbatte lé'njù ntôg bin, mfà bàn lé'njù bàa bin. A bwô ndù mba we lo tswe ze dù'. A ke' bwô ndù mènntùn tum la' i num mbatte lé'njù sammbàa.

³⁰Ndùlala ngô fite wut num mbatte lé'njù sammbàa.

³¹Tunndà Israél tswi lén se ndù mana. A na' mb'a mba miag nkun nà, mfôge, nsén i be mba makela' ze bo lo' ṅwa' nka yi là.

³²Mosé tshob ndù: Tshù ju ze Tshùaben tshob li: A bwô ndù bo lem ta' kesoṅ se, ngù nda'te nzwit zin, ndù bo yen bàn ze me na' nkém zin yi kônkwa, ndùse me na' nsô zin Egipto là.

³³Mosé tshob Aron ndù: Lo' ta' kab nso kesoṅ mana s'a dun nà ntùm bwe, nte mbwe Tshùaben, ndem bwe num neghù nda'te nzwit zin.

³⁴Ndùlala Aron te i mbwe Koṅ ndaṅndaṅ mba Tshùaben na' ntshob Mosé là, ndem i bwe.

³⁵Bon Israél jù mana num ngu'njù ṅam nkuà tà nkum ndùse bo kum num tsha' ntùn, ntswe bwe là. Bo ke njù à mana kà nèn nkum mbaṅ tsha' Kanaan.

³⁶Kesoṅ b'a ta' bag éfa ntshù' num bag tse gham.