Read Medumba Netume 17 Bible Online

Netume 17 - Medumba bible

Netume 17

¹Njoṅ tunndà bon Israél fa lo kônkwa Sin, nke nkù' ntsin mba Tshùaben tshob bo là. Bo te mbàn Refidim. Nda' ndù ngô ke ghù ntse mi bo nu là.

²Ngô kam Mosé ntanta ntshob ndù: Fà ntse bag nu. Mosé tshob bo ndù: Bin kam àm ntanta numke? Numke bin nke ndaṅte Tshùaben à?

³Nzi ntse ya ngô bwe, bo tshobte tun ntô num Mosé ntshob ndù: O na' ngù bag ko' mà Egipto a numke? Neghù ndù bag bon tshàm kwù nzi ntse nsen ni mba nyàm tshàm ké?

⁴Mosé bu' mbu Tshùaben ntshob ndù: M'a' ghù à ndùke bag yen nzwit mèn ni à? A tù' mén nda'nda' bo tamt'àm ndoṅ.

⁵Tshùaben tshob Mosé ndù: Tshùa mbwe ngô, ndo' tsemo' ghakwé mbwe ntùm ngô bin à bo be. Lo' kôg s'o na' ndab ta'ntse yi là ntshùb bu o nène.

⁶Tu wul àm nsi tsin mbwe o, num sen gho din, Horéb. O nsi lab gho ntse tum bwe ngô nu. Mosé ghù ndùlala num miag ghakwé mbwe bon Israél.

⁷A tsiaṅ lén yen dù' là Masa bo Mériba nummbe bon Israél lo ghù ntanta bwe, mbèn ndaṅte Tshùaben bwe ntshob ndù: Tshùaben num netèt bag ké? Ṅ, ke nga à?

⁸Ndùlala Amalék kam Israél ntsho Refidim.

⁹Mosé tshob Yoshua ndù: Tsho' tse be benntùn ntum nèn nde' Amalék ntsho bin à bo; a nsi be ndamnjù me tshùb kôg Nsi bu àm, nko' nèn mfe ntshùa kô.

¹⁰Yoshua le' Amalék ntsho mba Mosé tshob là, Mosé, Aron bo Hur ko' nèn mfe ntshùa kô.

¹¹A nke mbe ndùse Mosé bù' bu i tù là, Israél ta num ntsho, ndùs'a tshag bu i nsi là, Amalék ta num ntsho.

¹²Mbu Mosé lèt, mbole, bo lo' loṅ ntomte yi bag bag, a tswe nsi. Aron bo Hur tswe mbaṅ i bag bag nke ntomte mbu mi. Ndùlala mbu mi ghô tù ndùlala tà nèn nkum mfetnjù.

¹³Yoshua ton Amalék ntsho boa ben tse, njoṅ yub fa vù num ntshùag ṅwi.

¹⁴Tshùaben tshob Mosé ndù: Kite yen nu là ntùm ta' ṅwa'ni neke nkwimte, ntshob Yoshua ndù me nsi biagte Amalék, bwete lén se tun bam kamànyam.

¹⁵Mosé bom tômbwôg num lén Tshùaben ntswi lén se ndù: Tshùaben b'a mèn ze me num nte miag num i ngelaṅ ntsho là.

¹⁶A tshob ndù: Mba bu mènntùn bù' nsi num kô ntsho Tshùaben nà, ntsho nsi ke be netèt Tshùaben bo Amalék ngu'ngu'.