Read Medumba Netume 18 Bible Online

Netume 18 - Medumba bible

Netume 18

¹Yétro, ngale'te ze Madian, ntse Mosé, ju' bo nke ntshob nu mfà num ju ze Nsi na' ngù Mosé bo num ze nzwit mèn, Israél là. Tshùaben lo sô Israél Egipto.

²Yétro ntse Mosé lo' Séfora nzwi Mosé z'a na' nta' i là,

³boa bon tse bàa nèn mbaṅ Mosé. Lén mo' nshum i be Guershom nummbe Mosé lo tshob ndù: Me b'a nkùla' ntùm ngô me bwe là.

⁴Lén mo' be Eliézer nummbe Mosé lo tshob ndù: A b'a Nsi tàa bèn njwimt'àm, ntshu' àm num ntshùag ṅwi bu Faraon.

⁵Yétro ntse Mosé, bon Mosé mba nzwi i nèn mbaṅ i num kônkwa dù' z'a te mbàn bwe num mbat Nsi là.

⁶Yétro ghù bo tshob Mosé ndù: A b'a me Yétro ntse o bèn nse' mbaṅ o bag nzwi o mba bon tse bàa.

⁷Mosé tum, nèn mbumte bo ntse i, ngwù nsi mbwe i, ntat'é. Bo tsha'te bo bo, nèn ntsho ntùm ntàb.

⁸Mosé soṅ ntse i ju ze Tshùaben ghù Faraon bo ngô Egipto num nu Israél là; a soṅ i njoṅ nge' fa bo yen manze là bo mba Tshùaben na' ntshu' yub là.

⁹Yétro tsiaṅte num njoṅ mebwô fa ze Tshùaben na' ngù Israél, ntshu' i bu ba Egipto là.

¹⁰Yétro tshob ndù: Ghamte be Tshùaben z'a na' ntshu' zin bu ba Egipto mba bu Faraon, ntshu' mba ngô bu ba Egipto là.

¹¹Ndonni me lèn ndù Tshùaben lo b'a mèn ndùb ntshùa tsemo' nsi fa, nummbe Nsi la'te ndùlala ndùse bo ke ngùtni zin nà.

¹²Yétro ntse Mosé be ze nsi ndùse bo ke nton nyàm nà bo ndùse bo ke mfà tshule'te là. Aron boa njoṅ ghakwé mbwe ba Israél fa lo se' mbwe Nsi mba ntse Mosé njù jujù bwe.

¹³Tshù, njù be làn Mosé tswe nsi, netsho'te ngô, ngô tsin mbwe Mosé neto' nkebnjù nèn nkum mfetnjù.

¹⁴Ntse Mosé yen ju z'a tshwèt ngù ngô là, ntshob ndù: Ke z'o tshwèt ngù ngô ndù à? Numk'o ntswe nsi tù' wù, ngô ntsin mbwe fe nkebnjù nkum mfetnjù à?

¹⁵Mosé tshob ntse i ndù: Ngô se' mbwe àm num nebètt'a Nsi nu.

¹⁶A num mbe ndùse bo ghù ntsha netèt bo là, mba bo a' se' njen àm, me tsho'te yube, ngù bo lèn ntshù' Nsi boa nkàn mi.

¹⁷Ntse Mosé tshob yi ndù: Yu mat neghù ke' bwô.

¹⁸O nsi zwi yu wut bèn zwi yen nzwit mèn ze bin yi be là. Fa' lèt num o tù' wù; b'o ke fa' sen fa' là tù' wù.

¹⁹Ndonni ju' ntag mi me tshob wù là. A bwô ndù Nsi be wù. A bwô ndù o be nganze ngô mbwe Nsi. O nsi ke lo' ntsha nèn yi mbwe Nsi.

²⁰Ke nsoṅ benntùn ntshù' boa nkàn mi a nsi la'te yub manze z'a bwô nezin bwe, bo mb'a bwô yub mat be là.

²¹Yen nà mbe tôge, o lôte ntùm ngô, ntsho' kum benntùn bwe, tse bo be mbwôg Nsi, tse ngô lèn yube, tse be mèn ke fùte yub là, nte yub mum ngô, mo' ke nsa' ben ntsha' mbùm, mo' sa' ben nkù, mo' sa' ben ṅam ntàn, mo' sa' ben gham.

²²Tshen ben ni nsi ke tsho'te ngô njoṅ ndù fa. A be ze nu ta là mba bo nsi se' yi mbwe o. Mbe ze nu fùag là, mba tu wut tshob nsi tsho'te yen nu là. A bwô netsho'te lèt num o. A bwô bin à bo tamte nket yen lèt là.

²³A be z'o ghù ndùlili là, mba Nsi a' fà nkàn mi wù, o ku'ni netshùbe, a tshùa ndùlala ngô bèn njam la' ntùm fite.

²⁴Mosé ju' ju ze ntse i tshob là, ngù mb'a tshob là.

²⁵Mosé tsho' kum benntùn ntùm njoṅ ngô Israél fa, njab yub num tu ngô, mo' num ben ntsha' mbùm, mo' num ben nkù, mo' num ben ṅam ntàn, mo' num ben gham.

²⁶Tshen ben ni nke ntsho'te ngô njoṅ ndù fa. Bo nke ndo' nu ts'a ta là nèn yi mbwe Mosé, nke ntsho'te ts'a fùag là yub tu.

²⁷Mosé lé'te bo ntse i; a bèn njam ntùm ze ngô.