Read Medumba Netume 19 Bible Online

Netume 19 - Medumba bible

Netume 19

¹A lo be tshùa mbatte ṅwù tat mba bon Israél tum mà Egipto là, bo zin nkum kônkwa Sinaï kua' sen lé'njù là.

²Bo lo Refidim, nzin nkum kônkwa Sinaï nte mbàn yub bwe. Israél te mbàn nsen ni, mbwe mbale;

³là Mosé ko' nèn mbaṅ Nsi. Tshùaben tsin mfe tu mbat ntsiaṅ i ntshob ndù: O nsi tshob yen nu li tunndà Yakob, ntswite yen ju nezi'te li bon Israél.

⁴Tu wut tsin lo yen ju ze me ghù Egipto là, njen mba me na' nket zin num mbàb ghammàtat, ngù kà bin se' nkum mbaṅ àm nà.

⁵Ndonni, a be ze bin ju' ntshu àm ndé' kàn sàm nà, mba bin nsi be yàm nzwit mèn netèt njoṅ ngôngô fa, nummbe njoṅ njù nsitsha' fa b'a yàm.

⁶Mba bin nsi be ta' nufen ghale'te me, bo ngô nelàne. Tshù ntshob mi o nsi tshob bon Israél là.

⁷Mosé bèn njam, ntsiaṅ ywèn benntùn ntùm ngô ntshob men ntshob mi Tshùaben na' ntshob yi là bo.

⁸Ngô tamte mbùnte ndù: Bag nsi ze njoṅ ju fa ze Tshùaben tshob là. Mosé fà mbùn ntshob mi ngô fà là Tshùaben.

⁹Tshùaben tshob Mosé ndù: M'a' se' ntùm njam ndot, bag wù be tshobte ngô ju', njab ntù num o koṅkoṅ matmat. Mosé fà mbùn ntshob mi ngô fà là Tshùaben.

¹⁰Tshùaben tshob yi ndù: Nèn ntèt ngô, ndànte yub sènni bo ndamnjù. A bwô ngô sôg nzwe tse;

¹¹bo nabte wut tshob num mbatte lé'njù tat, nummb'a nsi be mbatte lé'njù tat Tshùaben swe' num mbat Sinaï nse' mbwe ngô.

¹²Kut ta' kàb mbwe ngô ntshob ndù: Bin zete neko' num mbale, ke nekwag mbaṅ tse lo. Mèn z'a nsi kwag mbat là mba bo a' zwi i.

¹³Sàm mèn ke nsi kwag i bu, bo nsi tamte ng'é ndoṅ ke nkét lo. Nyàm ke mènntùn no ke nsi yôge. Là be bo ko' num mbat ndùse nta nsi tô là.

¹⁴Mosé swe' num mbat nse' mbaṅ ngô. A lànte ngô, bo sôg nzwe tshobe.

¹⁵Mosé tshob ngô ndù: Bin nabte wut tsin num lé'njù tat. Kà mèn tam kunndà bo mènnzwi.

¹⁶Tshù, a be num mbatte lé'njù tat, nkebnjù, tshu'te fambaṅ be, mbeba'mbaṅ mo' ndot tam njam mfe num mbale, nze mo' nta neta be; njoṅ ngô fa vètte ntùm mbàn.

¹⁷Mosé ghù ngô tum mbàn nèn bumte boa Nsi, ntsinte mà tun mbale.

¹⁸Nzembwôg lo lam mfe num mbat Sinaï, nummbe Tshùaben lo swe' ntùm mbwôg nse'e. Nzembwôg mi ko' mba nzembwôg ndùb là. Mbat kumte, mvètte njoṅ dù' tse fa.

¹⁹Nze nta nke nga' be mbu. Mosé nke ntshobte bo Nsi, Nsi nke mbùnte yi ntùm tshu'te fambaṅ.

²⁰Tshùaben swe' nse' num mbat Sinaï, num ntshùa mbale, ntsiaṅ Mosé num ntshùa mbale. Mosé ko' bwe.

²¹Tshùaben tshob Mosé ndù: Swe' ntshob ngô ndù kà bo nànte nse' mbaṅ àm, me Tshùaben, neyene, mbwôg ndù kà tse yàm kwùte.

²²A bwô ndù mba ghale'te tse bo nsi ghebte mbaṅ àm, me Tshùaben nà lànte wut tshobe, mbwôg ndù kà yantù i kam num bo.

²³Mosé Tshob Tshùaben ndù: Be ngô ke ko' num mbat Sinaï, nummb'o lo ya bem yub ntshob ndù: Kut kàb mbwe mbale, ngù a tù' nelàne.

²⁴Tshùaben tshob yi ndù: Bèn nswe'e, mbèn nko' bin Aron num mbale. Mbe se' mba ghale'te boa ngô là, kà bo nànte neko' nèn mbaṅ àm, me Tshùaben, mbwôg ndù kà yantù àm kam num bo.

²⁵Mosé swe' nèn mbaṅ ngô, ntshob nu bo.