Read Medumba Netume 21 Bible Online

Netume 21 - Medumba bible

Netume 21

¹Tshù ntshù' mi o nsi fà bo li:

²A be z'o jun mén Héber, a be nkuan o là, mb'a bwô ndù a fa' wù ngu'njù ntôge, a be mbatte ngu'njù sammbàa a tum kuan, ke bèn njun tu wul i.

³A be z'a na' mb'a tù' i là, mb'a bwô ndù a nèn a tù' i. A be z'a na' ngù nzwi i là, mb'a bwô ndù bo nzwi i bèn nèn.

⁴A be ze tà kuan i bèn mfà mènnzwi yi là, mba mènnzwi boa bon ts'a bwe là nsi be tse tà kuan, nkuan nèn tù' i.

⁵Là, a be ze nkuan tshob ndù: Me kô kuan àm, nkô nzwi àm boa bon tshàm, ndùlala me ke tum kuan nà,

⁶mb'a bwô ndù tà kuan lo' i nèn yi mbwe Nsi, mbaṅ mbatndà, mbaṅ nzendà, tà kuan i lo' nto, nto toṅ i yi. Yen nkuan ni nsi ghô ntùm fa' tà kuan i.

⁷A be ze mèn swèn ngon i mba nkuan mèn nà, mb'a b'a ke tum kuan mba tse bandum nà.

⁸A be z'a bag tà nkuan i z'a ke ndiag neso i mo' lé'njù là, mb'a nsi bèn swèn i. Nda' ndù k'a swèn i mfàm, mbwôg ndù k'a tote tun i.

⁹A be z'a fà i nshum i là, mb'a bwô ndù a lo' i à mat ze mèn be ndo' ngonngon tse yi là.

¹⁰A be z'a so mo' mènnzwi là, mb'a ke nsi sô sàm ju num ze nu mbwe mènnzwi, k'a nu ze jujù, ke ze nzwe, ke mi ntswe ndà lo.

¹¹A be ze yen nu nze tat li tsi là, mb'a be mènnzwi tum tse ke fà lèn ju mba nkàb là.

¹²Mèn z'a lab mèn kà nzwi i là, mba bo a' zwi i ze.

¹³Là, a be z'a be ghù ke lèn, mbe ndù Nsi bèn ntshùa num i ngù ndùlala là, mba me nsi la't'o dù' z'a b'a lem bwe là.

¹⁴L'a be ze mèn lo' lamte nke ndiag nezwi mfèl i yi ntùm tshùagntù là, mb'a bwô ndù o fiag i mba num tômbwôg le'te, nzwi i.

¹⁵Mèn z'a lab tàab ke màab lo là bo zwi i.

¹⁶Mèn z'a yi mènntùn nà mb'a bwô ndù bo zwi i; k'a swèn ng'é, ke bo tèl i be bu i lo.

¹⁷Mèn z'a tshabte tàab ke màab lo là mb'a bwô ndù bo zwi ng'é.

¹⁸A be ze benntùn ke nzwe zwe', mo' tam mo' loṅ, ke netsham i nto' lo, ng'é ke kwù, là ngon kà nô kunndà là,

¹⁹mba mèn z'a lab i là tum ntshu ntsha, a be z'a b'a lo nsi, ndo' kôg se ntum njù là. Nda' ndù a nsi fà nkàb yi num ngelaṅ z'a be kun ghon ke ke mfa' là, mbèn ntshwint'é t'a tùnte.

²⁰A be ze mèn lo' kôg ndab nkuan i ze mandum ke ze mènnzwi lo, ndab i k'a kwù bu i là, mb'a bwô neyagte mba' mfe.

²¹L'a be ze ng'é ke' ntùn ta' lé'njù ke lé'njù bàa lo là, mb'a ke' bwô neyagte mba' i, nummb'a tà kuan i bèn ngù i.

²²Ndùse bandum be ghù ntanta ntsho ntèn mènnzwi jùm ntam nsi, a bagte mènntùn, mo' nu ke bèn ntum njam bwe là, mba bo a' fà ju ze ndu mènnzwi bètte là, mfà ndùlal'a mbwe ghatsho'te.

²³L'a be ze tsemo' nu ghua bèn ntôg bwe là, mb'a bwô ndù bo nzwi mèn, bo zwi mèn,

²⁴lag num lag, sô num sô, bu num bu, ku num ku,

²⁵nton mèn mbwôg, bo ton mèn mbwôge, nkag mfaṅ num mèn, bo kag mfaṅ num mèn, ndem mèn, bo lem mèn.

²⁶Ndùse mèn to lag nkuan i ze mandum ke ze mènnzwi lo, mbagt'é là, mb'a nsi kag yub bo nène, ndo' ngù kwibtu lag sub yi.

²⁷Ndùs'a ghù sô nkuan i ze mandum ke ze mènnzwi lo vù nsi là, mb'a nsi kag yub bo nène, ndo' ngù kwibtu sô sub yi.

²⁸A be ze nyàmna' lo' ndô mi ntsham mandum ke mènnzwi yi lo kà bo kwù là, mba bo nsi tamte nyàmna' ndoṅ, ke fèt mbàb i. Là bo ke nsi kùa nga nyàmna' mo' sàm ju.

²⁹L'a be z'a b'a matnu nyàmna' là neke ntsham benntùn, ng'é ke lôte nu bwe ndùse bo tshob yi, nyàmna' là zwi mandum ke mènnzwi lo là, mba bo nsi tamte nyàmna' ndoṅ, là bèn zwi mba nga nyàmna' ze.

³⁰A be ze bo tshob ndù a tshu' wul i là, mb'a nsi fà njoṅ ju fa ze bo bètte yi num nelo' njun tu i yi là.

³¹Ke nyàmna' là tsham a ménnshum ke ménngon no, mb'a bwô ndù bo ghù a be mat ntshù'.

³²A be ze nyàmna' tsham a nkuan ze mandum ke ze mènnzwi lo là, mba bo nsi fà nkàb tà nkuan yub ndô nkàb ṅam ntat, ntamte nyàmna' ndoṅ.

³³Ndùse mèn tswe' tô, ntswe' nte nge ke kabte, nyàmna' ke kekwèn no vù ntùm bwe là,

³⁴mba ngatô nsi fà kwibtu i; a bwô a ba' nkàb fe nyàm nga nyàm, fe nyàm tù' ze.

³⁵A be ze nyàmna' mèn tsham ze mfèl i kà nzwi i là, mb'a bwô bo swèn nyàm z'a be ntùn nà ngabte nkàb i; bo bèn ngabte mba fe nyàm be ndaṅndaṅ.

³⁶L'a be z'a b'a matnu nyàmna' neke ntsham tsemo', ng'é ke lôte nu bwe ndùse bo tshob yi là, mb'a nsi fà ta' nyàmna' lo' ghù kwibtu nyàmna' yi, fe nyàm tù' ze.

³⁷Ngelaṅ ze mèn nsi yi ta' nyàmna' ke ta' njùmbwe lo kà nja zwi ke neswèn no là, mba nsi fà nyàmna' tàn num tu ta' nyàmna' mbèn mfà njùmbwe kuà num tu ta' njùmbwe.