Read Medumba Netume 27 Bible Online

Netume 27 - Medumba bible

Netume 27

¹O nsi bèn lo' ntshwèn tù bù nabte tômbwôg yi. A sag num bu bàa kam, bam se be bu bàa kam. Kum tse fa nsi b'a be ndaṅndaṅ. A nsi nèn tù num ta' bu kam.

²O nsi ghù ndô mi num ntôg mi nkuà, a b'a ntshù' bo tômbwôge. O nsi lo' tùn meba na lo' yo' i yi.

³O nsi nabte bon ntsi num neke ṅwat bwembwôg yi, ba nsofa', ba ntu', ba ngub boa nkab neton tshu nelamte yi. O nsi lo' à tùn meba nabte njoṅ tshen tshu là fa yi.

⁴O nsi lo' tùn meba ba' netàm yi, a be mba ju ke'te là. O nsi ma' kwa mba num zit tôg yen ju ke'te là. Nkwa là nsi b'a mi ntùn meba.

⁵O nsi so netàm nà bam ngoṅ tômbwôge, tun bwe, a ko' tà nkum netèt ntse tômbwôg z'a nèn yi tù là.

⁶O nsi lo' ntshwèn tù bù kom ba fa yi num tômbwôge; lo' tùn meba na ndo' njo' i yi.

⁷Bo nsi sote tshen fa là ntùm nkwa. Ba fa là nsi b'a num mbaṅ tse bàa ndùse bo nsi ket tômbwôg là.

⁸O nsi lo' mbag ntshwèn kom i yi, ghù à tshu. A bwô ndù o ghù a num mat ze me na' nda'te wù mfe num mbat là.

⁹O nsi nabte kàb ntshundà Dù'ntswe. A nsi b'a mà ntèn, shù à nze ntèn. Bo nsi lo' à mbwô nzwe z'a fùag là lo' nabte njam kàb ntshundà yi. A bwô ndù a sag num bu ṅam ntàn num ta' bag i ntshù'.

¹⁰Ntom tse ṅam mbàa nsi ghù tun tse ts'a b'a tùn meba là. Ntùn ntom boa nkôg nzwe tshob nsi b'a silba.

¹¹A b'a be ndaṅndaṅ num bag i z'a tu là. Mbwô nzwe z'a fùag là ghù bu ṅam ntàn, ntom tse be ṅam mbàa, ngù tun tse ts'a b'a tùn meba là ṅam mbàa, ngù ba ngub mi boa nkôg nzwe mi, tse bo nabt'a silba là.

¹²Bam kab ntshundà z'a be bag dibantse là ghù nzwe bu ntshob tàn ṅam mbàa, ntom tse gham ghù tun tse gham.

¹³Bam kab ntshundà z'a be bag ntumnyam nà ghù mbu ntshob tàn ṅam mbàa.

¹⁴Mbu nzwe sammbàa kam be num mo' taṅ i boa ntom tse tat ngù tun tse tat;

¹⁵tsemo' mbu nzwe sammbàa kam bèn mbe num mo' taṅ i boa ntom tse tat ngù tun tse tat.

¹⁶Mbe se' mba kab ntshundà là, a bwô a ghù nzwe mbu gham, z'a ba mba tsinkém, z'a be meba, z'a ba nziag là, mbwô nzwe z'a fùag là, a fa' ngakwitte boa ntom tse kuà mba tun tse kuà.

¹⁷Bo nsi lo' nkôg nzwe latte njoṅ ntom kab ntshundà yi fa, nkôg nzwe b'a silba, ngub mi nsi b'a silba, tun tse be tùn meba.

¹⁸Kab ntshundà nsi sag mbu ṅam ntàn. Bam se be mbu ntshob tàn ṅam mbàa mba zit taṅ i lo. Nesag nèn tù ghù mbu bàa kam, ndù bo nabt'a mbwô nzwe nefùage. Tun tse nsi b'a tùn fôgtab.

¹⁹Num njoṅ bon tshu ndà fa boa njoṅ nsaṅ kab ntshundà fa, a bwô nelo' tùn meba kà nabte yi.

²⁰O nsi tshob mba bon Israél ndù bo ke mfà mfèt wù, mi a làne, bo ke yoṅ mbwete là, num neke nte lambo yi, nummb'a bwô ta' lambo ke mb'a be nekù njoṅ ndù fa.

²¹Aron boa tse nshum nsi ke nabte men mfèt là mbwe kam nzwe z'a kabte Koṅ Kàn nà. Bo nsi ke nabt'é mbwe Tshùaben neto' nkebnjù nkum mfetnjù. A tù' b'a ta' kàn ndùlala ngu'ngu' netèt njoṅ bon Israél tse bandum fa.