Read Medumba Netume 3 Bible Online

Netume 3 - Medumba bible

Netume 3

¹Mosé lo ke mbéb nyàm ntse i Yétro, z'a be ngale'te Madian nà. A be num mo' lé'njù nèn nyàm tà njam tshwèt, nzin tà nkum num mbat Nsi, Horéb.

²Angél Tshùaben ṅwag yi ntùm mo' lambwôg z'a ke ntum tèt mo' tswe'tù là. Mosé lôte, tswe'tù là nke nge'e, là ke nkù.

³Mosé tshob ndù: M'a' Kù'te nèn ndôte yen kuni ju li, ndèn ju z'a ghù tswe'tù ke ke nkù là.

⁴Tshùaben yen mb'a tshwèt nkù'te nèn lôte là; Nsi tsin tèt tswe'tù ntsiaṅ Mosé ndù: Mosé! Mosé! A bùnte ndù: Me li:

⁵Nsi tshob yi ndù: Kà se' nsen ni. Sô nketo' nku mu, nummbe dù' tsha' z'o tsin bwe là b'a dù' tsha' nelàne.

⁶A bèn ntshob ndù: Me b'a Nsi tàan Abraham, Nsi Isak, mba Nsi Yakob. Mosé lem se i, ke bam nelôte Nsi.

⁷Tshùaben tshob ndù: Me yen nge' yàm nzwit mèn be ntùm bwe Egipto là, nju' kua' tse ghaghùtni yub be nke ngù bo nkua' là. Me lèn kua' nge' a be ntùm bwe là.

⁸Ndùlala me swe' num netshu' yub bu ngô Egipto, mba ndù bo ko' ntùm yen ngô li nèn ntùm mbwô ngô nezi, ntùm ngô ze mbùn nyàm be nswe' bwe bo ṅwa' là, ntùm dù' ze ba Kanaan, ba Hétia, ba Amor, ba Férésia, ba Hévia boa ba Yébusia be ntswe là.

⁹Ndonni nkua' bon Israél ko' tà nse' nkum mbaṅ àm. Me yen nge' ze ba Egipto tshwèt njab num bo là.

¹⁰Nène, me tum o mbaṅ mfen Faraon ndù o sô bon Israél, yàm nzwit mèn mà Egipto.

¹¹Mosé tshob Nsi ndù: Me b'a we kà nèn tèt Faraon sô Israél Egipto à?

¹²Nsi bùnte ndù: Bag wù nsi ke be; tshù keki z'a tshwèt nda'te mbe me bèn ntum o li: Ndùs'o nsi ghù nzwit mèn àm tum Egipto là, bin à bo nsi ghamt'àm num yen mbat li.

¹³Mosé tshob Nsi ndù: A be ndùlala mba me nsi nèn tèt bon Israél tshob bo ndù: Nsi tà tsin tum àm mbaṅ bin. A be ze bo bètt'àm lén so là mba me nsi bùnte bo à ndùke?

¹⁴Nsi tshob Mosé ndù: Me b'a mèn ze me be là. A bèn ntshob Mosé ndù: Tshù ju z'o nsi bùnte bon Israél li: Mèn z'a be là bèn ntum àm mbaṅ bin.

¹⁵Nsi bèn ntshob Mosé ndù: O nsi tshob bon Israél ndù: Tshùaben Nsi tà tsine, Nsi Abraham, Nsi Isak, Nsi Yakob bèn ntum àm mbaṅ bin. Tshù lén sàm nà num njoṅ zwiaṅ njù fa, a mba bo nsi tù' ke ntsiaṅ àm nà.

¹⁶Nène, o nsi tse'te njoṅ tse ghakwé mbwe ba Israél fa tshob bo ndù: Tshùaben Nsi tà tsin lo ṅwag me, yi Nsi Abraham, Isak mba Yakob, ntshob me ndù: Me lo se' lôte zine, njen ju ze bo tshwèt ngù bin Egipto là;

¹⁷ndùlala me tshob ndù: Me nsi ghù bin tum ndà kuan bin be bwe Egipto là, nèn ntùm ngô ba Kanaan, ba Hétia, ba Amor, ba Férésia, ba Hévia boa ba Yébusia, ngô ze mbùn nyàm be nswe' bwe bo ṅwa' là.

¹⁸Bo nsi ju' ntshu o, bin à bo nèn ntèt mfen Egipto ntshob yi ndù: Tshùaben Nsi ba Héber ṅwag bag. Bam bag ndù bag zin lé'njù tat, nèn num kônkwa, mfà jule'te Tshùaben Nsi yag!

¹⁹Me lèn kua' ndù mfen Egipto ke nsi faṅ bin nène, k'a ke be ndù mo' bu neta lo nsi num bwe.

²⁰Là, me nsi nyit bu àm, lo' nsà tse me nsi ghù là lab Egipto yi, nsà tse me nsi ghù netèl i là ghù a ta' zine.

²¹Me nsi ghù bin be ghafen num miag ngô Egipto, a be ndùse bin nsi nène, bin be tum ke b'a mbu ndaṅe!

²²Mba zit mènnzwi lo nsi lon tshu silba bo gol nshun i ke mèn z'a tshwèt ntswe ndà i lo, lon nzwe ts'a ma' num tse nshum boa tse ngon nà. A nsi tshùa ndùlala bin sô tshu bu ba Egipto.