Read Medumba Netume 32 Bible Online

Netume 32 - Medumba bible

Netume 32

¹Ngô yen mba Mosé ke' swe' mfe num mbat là, nkùmte mbaṅ Aron ntshob yi ndù: Lo nsi be nabte ta' nsi z'a ke nzin mbwe be là. Nummbe Mosé, mèn nà z'a sô be mà Egipto là, bag ke' lèn mb'a be num i là.

²Aron tshob bo ndù: Bin sô mba' ntoṅ gol mi a toṅ zwi tsine, nshumnshum tsin boa ngonngon tsin nà nse' mfà me.

³Ngô sô mba'ntoṅ gol mi a be ntoṅ bo là nèn mfà Aron.

⁴A kwé mum mbu mube, ma' ntùm kab lam, na ndo' nabte mfô tùn yi. Bo nke ntshob ndù: Israél, tshù nsi o z'a sô o mà Egipto li.

⁵Aron be yen i, mbom ta' tômbwôg mbwe i, nkua' ntshob ndù: Jùa nenyàmte Tshùaben nsi be ndamnjù.

⁶Njù yoṅ ntshag mbe làne, bo lo nsi kua' mà nkebnjù, nton ba nyàm, mfà tshule'te tse nenyàmte. Ngô tswe nsi njù mbèn nu; yen nà be tôg bo lo nsi nke ntsiaṅte.

⁷Tshùaben tshob Mosé ndù: Swe' là ndonni, nummbe yu nzwit mèn tù' mbagte wul i. Me dù à nzwit mèn z'o sô yub mà Egipto là.

⁸Bo nànte nkag manze ze me na' ntswite bo là. Bo nabte mfô tùne, ngwù nsi mbwe i, mfà tshule'te yi nke ntshob ndù: Israél, tshù nsi o z'a sô o mà Egipto li.

⁹Tshùaben tshob Mosé ndù: Me yen mbe yen nzwit mèn nà, b'a nzwit ghatatu ndù kekol i sage.

¹⁰Ndonni faṅ àm nà. Yantù àm a' kam num bo. Me nsi biagte yube. Là me nsi lo' o ghù mà zi ngô ndùb yi.

¹¹Mosé zin kam mbwe Nsi i, ntshob ndù: Tshùaben, yantù o ghù nekam num yu nzwit mèn z'o sô mà Egipto l'a numke? Tshù, o na' ndo' ngù' o ze ndùb bo bu ze neta ngù yi ndùlala.

¹²A be ndùlala mba ba Egipto nsi tshob ndù: A sô yub neghù bo yen à nge', num nezwite yub num tu ba mbale, mbiagte yub num nsitsha'a. Ndùlala, me le't'o ndù tonte yantù o kôge, fém num nukebwô z'o lo nke nkô neghù yu nzwit mèn nà.

¹³Kwimte Abraham, Isak bo Israél, ghafa' tsho ts'o na' ndo' tu wul o nsaṅlaṅ yi, ntshob ndù: M'a' ghù nzwit zin yàm mba nsà mi a kamànyam nà. O lo bèn ntshob mba ndù: Me nsi fà njoṅ ngô fa me na' ntshob là tunndà o, a tù' yub ju matmat.

¹⁴Tshùaben fém num nukebwô z'a jù' neghù ze nzwit mèn nà.

¹⁵Mosé bèn njam, nswe' mfe tu mbale, ndù a tshùb ntafèt mbàa mi bo kite kàn bwe là bu i. Bo na' nkite ntafèt l'a njam bàa, num njoṅ dù' tse fa.

¹⁶Ntafèt là Nsi bèn nabte. Nekite z'a be num bwe là, Nsi bèn nkite ndù a tshebt'é num ntafèt là.

¹⁷Yoshua be ju' mba ngô tshwèt ntshu'te là, ntshob Mosé ndù: Tshù tshu'te ntsho là ntùm mbàn!

¹⁸Mosé bùnte ndù: A ke' b'a tshu'te ghayob ngu'u, ke ne mbe ze ben bo vù ntsho là. Tu wul àm ke nju' a tshu'te nkwi.

¹⁹Là, ndùs'a ke ngebte mbàn nà, a yen mfô boa tshu nenyiaṅe. Ndùlala yantù Mosé kam, a tshag ntafèt mi a be mbu i là ma' nsi, ntsit yub tun mbale.

²⁰A lo' mfô ze bon Israél nabte là nton mbwôge, ntsham fa t'a tù' a bwe tse, a naṅ mum ntse, mfà bon Israél bo nu.

²¹Mosé tshob Aron ndù: Ngô ghù wù à ndùke k'o mbam bo ntsho ntùm lèn yen nukebwô li ndù à?

²²Aron tshob ndù: A ke' bwô ndù tshùaben àm ya ntù; tu wul o lèn mba yen ngô li be ngwù ntùm nukebwô là.

²³Bo lo tshob me ndù: Nabte ta' nsi bag z'a ke nzin mbwe bag là. Nummbe Mosé, mèn nà z'a sô yag mà Egipto là, bag ke' lèn mb'a be num i là.

²⁴Ndùlala me tshob bo ndù: Ben tse bo ghù gol là bo sô mfà me! Bo lo ne mfà me, me ton mbwôge, kà yen mfô li mbe.

²⁵Mosé yen mbe ngô tsho ntùm va' mba ndù Aron lo faṅ yub ntùm yen va' là, a tù' ju tshabte netèt ghakeban tse.

²⁶Ndùlala Mosé tsin ntshu mbàn, ntshob ndù: Tse ben Tshùaben se' ntsin mbaṅ àm. Njoṅ nshumnshum Lévi fa kùmte mbaṅ i.

²⁷A tshob bo ndù: Tshù mba Tshùaben, Nsi Israél tshob li: Mba we lo tam ṅwi mbe' i. Bin tsho ntùm mbàn, ntôg nzendà nzendà, mba we lo zwi mfèl i, nshun, mèn z'a ghebte mbaṅ ndà i là.

²⁸Nshumnshum Lévi zwiagte ntshob Mosé, nzwite nguan benntùn ntsha' tat netèt ngô sen lé'njù là.

²⁹Mosé tshob ndù: Tshùaben ghom zin sènni, mba bin zwi tsin nshum boa fèt tsin nà. Ndùlala b'a ndù Tshùaben tam ntse bin num sen lé'njù li.

³⁰Là, a be nkebnjù Mosé tshob ngô ndù: Bin lo ghù mà gha' nukebwô, là ndonni m'a' ko' nèn mbaṅ Tshùaben, be mo' ndù a tshob me mb'a bwete nukebwô zin.

³¹Mosé bèn mbaṅ Tshùaben ntshob ndù: Tshù là! Yen nzwit mèn ni ghù mà gha' nukebwô. Bo nabte nsi gol.

³²Me le't'o ndù o lagte nukebwô yub, mba me bèn nde't'o ndù o bwete lén sàm ntùm ṅwa'ni z'o kite là.

³³Tshùaben tshob Mosé ndù: M'a' bwet'a lén mèn z'a ghù nukebwô me là ntùm ṅwa'ni àm.

³⁴Ndonni, nène, ndo' ngô nèn yi dù' ze me na' ntshob wù là. A b'a Angél àm bèn zin mbwe o. Là, me nsi naṅ ntsha tu bo num lé'njù yagte mba'a, mb'a num nukebwô yub.

³⁵Tshùaben lab ngô, nummb'a lo nabte mfô, mfô ze Aron nabte là.