Read Medumba Netume 34 Bible Online

Netume 34 - Medumba bible

Netume 34

¹Tshùaben tshob Mosé ndù: Tshua'te ntafèt ndoṅ mbàa yu tu wut ndaṅndaṅ mba mi a be mbwe là. M'a' kite ntshob mi a be num mbwe ntafèt mi o tsit là num bwe, be kua' ndaṅndaṅ.

²A bwô o ghù ndùlala num ndamnjù nkebnjù. O nsi ko' mà nkebnjù num mbat Sinaï tsin mbwe àm, mfe num ntshùa mbale.

³Kà ko' à bin sàm mèn; kà bo yen sàm mèn num mbat mba yà lo. A ke' bwô ndù mbwe ke nyàmna' lo fèt mbaṅ yen mbat là.

⁴Mosé tshua'te ndoṅ mbàa mba mi mbwe là, ndo nsi mà nkebnjù mba Tshùaben tshob yi là nko' num mbat Sinaï, ndù a tshùb ntafèt ndoṅ nà bu i.

⁵Tshùaben swe' ntùm ndot, ntsin mbaṅ Mosé, ntsiaṅ lén se Tshùaben.

⁶Tshùaben tôg mbwe Mosé ntshob ndù: Tshùaben, Tshùaben, Nsi mbétni mbe ngatshàmndèn, o num ndèt wut num yantù, mbe ndù o dun nkôni bo nenùne.

⁷O num mfà nkôni num zwiaṅ ntsha'ntsha', nke mfènte nukebwô, tatu bo kebwô. Là, o ke' be faṅ mfànnu ndùlala. O num nso ntsha i tu bon tshob nèn nkum zwiaṅ ben tat bo zwiaṅ kuà.

⁸Be ndùse Mosé vù nsi, nte nkekwi' mi nsi,

⁹ntshob ndù: Tshùaben, a be ze me fon kondèn num miag mu là, mb'a bwô ndù wù Tshùaben zin netèt bag, nummbe nzwit ghatatu li, mèn ni b'a ze kekol i sag là. Lagte mfànnu mag boa nukebwô tshage, ndo' yag mba yu ju ntsi' là.

¹⁰Tshùaben bùnte ndù: Tshù, m'a' wat ta' kàn. M'a' ghù tshu nekuni mbwe ngô o, lèn ts'a ke' to' be num nsitsha' mba ntùm sàm ta' ngô là. Ngô ts'a diaṅ o mbum nà nsi yen fa' sàm, me Tshùaben. Me nsi tshùa njam o kà ghù tshen tshu là bumte. A nsi b'a tshu nekuni.

¹¹Zete num ju ze me nsi tshob wù sènni là. M'a' ta' ba Amor, ba Kanaan, ba Hétia, ba Férésia, ba Hévia boa ba Yébusia mbwe o.

¹²Zete newat kàn bin à ba la' z'o nsi tsho ntùm ngô yub là, mbwôg ndù kà tshen ben nà tù' ywi' wù.

¹³Là, bin nsi sate ntômbwôg mube, ndoṅ la' mube, be'te njoṅ i fa. Bin be'te njoṅ bebun tshob fa, ntshu' i fa naṅ nsi.

¹⁴O ke nsi te nkekwi' mu mbwe mo' nsi nummbe lén Tshùaben b'a ndànghe'e, a b'a ta' Nsi z'a num ndàn ghe' là.

¹⁵Kà wat kàn bin à ba la', mbwôg ndù kà bo be kat boa nsi tshobe, mfà tshule'te bo, ntsiaṅ o bin à bo jù tshule'te tshobe.

¹⁶A be z'o bètte ngonngon tshob mfà tsho bon nà, mba bo a' be kat boa nsi tshob nsoṅte bon tsho mba bo kat yub boa nsi tshobe.

¹⁷Kà lo' tùn nabte ta' nsi yi.

¹⁸O nsi ke ze jùa bàn ke te ywibte se; a bwô a be ndùlala num lé'njù sammbàa, num ngelaṅ i ntùm maṅwù ngefele. O nsi jù bàn ke te ywibte se mba me na' ntshob wù là. Nummb'o na' ntum Egipto à ntùm maṅwù ngefele.

¹⁹Njoṅ mbwe bon bandum fa me bèn ngù, mba kua' mbwe bon nyàm, nyàmna' bo mbwe.

²⁰O nsi lo' mén njùmbwe lo' jun tu mbwe mén kekwèn yi. A be z'o ke' jun tu i là, mb'a bwô ndù o be' ntô mi. A bwô ndù o jun tu mba zit mbwe mén nshumnshum tsho lo. Kà sàm mèn se' mbwe àm mbu mbu.

²¹O nsi ke fa' num lé'njù ntôge, fite wul o num mbatte lé'njù sammbàa. O nsi ke fite mba num ngelaṅ nedù' nà bo ze netsho' tshu.

²²O nsi ke ze jùa ba ngabnjù, se mbwe tshu, netsho' ngefele, bo jùa netsho' tshu num miagte ngu'njù.

²³Njoṅ bandum fa nsi ke nèn mbwe Tshùaben Nsi, Nsi Israél yoṅ tse tat num tamngu'.

²⁴Nummbe m'a' ta' ngôngô mbwe o, nga'te tsho ndùnsi; sàm mèn ke nsi ghe'te ngô o, ndùs'o nsi ko' se' tsin mbwe Tshùaben Nsi o yoṅ tat num tamngu' là.

²⁵Nyàm z'o nsi wat me là, o ke nsi se' yi mbwe àm à bo bàn ze bo te ywibte se là. Jule'te ze jùa ke nsi zi ndà kà tèt nkebnjù.

²⁶O nsi lo' kua' mbwe ntàm mi a tum ntùm nà o là nèn yi ntùm ndà Tshùaben Nsi o. A ke' bwô ndù o na mén mbwe ntùm mbùn màab.

²⁷Tshùaben tshob Mosé ndù: Kite men ntshob li; nummbe me nsi tsin num men ntshob là kà wat kàn bag wù mba Israél.

²⁸Mosé tswe bo Tshùaben bwe lé'njù ṅam nkuà, mbwôgtshù bo tèttswe', ke jù bàn ke bèn nu ntse, nkite ntshob kàn num ntafèt, ntshob là b'a gham.

²⁹Mosé swe' num mbat Sinaï ndù a tshùb ntafèt ntshù' mbàa bu i ndùs'a ke mfe num mbat là. A lo ke lèn ndù ngub se i tshwèt nziag mb'a tshobte bo Tshùaben nà.

³⁰Aron boa njoṅ bon Israél fa lôte Mosé, njen ndù ngub se i tshwèt nziage, bo bwôg neghebte num i.

³¹Mosé tsiaṅ yube. Aron boa njoṅ ghakwé mbwe fa ntùm mbumte nèn mbaṅ Mosé, a tshob nu bo.

³²Yen ni be tôge, njoṅ bon Israél fa ghebte, Mosé fà ntshob mi Tshùaben tshob yi num mbat Sinaï là bo.

³³Ndùse Mosé miagte netshob nu bo là, a ma' kam nzwe num se i.

³⁴Mosé lo ke mbù' kam nzwe se i ndùs'a tsho mbwe Tshùaben netshob nu yi là, tà nkum ndùs'a tum bwe là. Ngelaṅ z'a tum nà, a soṅ bon Israél ju ze Tshùaben tshob yi là.

³⁵Bon Israél lo ke ndôte se Mosé, njen ngub se i nke nziage; ndùlala Mosé nke ma' kam nzwe se i tà nkum ndùs'a tsho mbwe Tshùaben tshobte bo yi là.