Read Medumba Netume 37 Bible Online

Netume 37 - Medumba bible

Netume 37

¹Betsaléel lo' ntshwèn tù bù nkom Koṅ Kàn yi. Koṅ sag nguan ta' bu kam, bam se be nguan ta' kam bu, nesag nèn tù be be nguan ta' kam bu.

²A lo' gol nelàn njo' i yi njam ntùm bwe, mba njam njù, mbèn ndo' gol mfim ntôg mi yi ndiaṅ mbume.

³A lo' gol ntswe nkwa Koṅ yi nkuà, nte num ntôg mi, mi mbàa mo' bag, memo' mi mbàa be num mo'o.

⁴A lo' ntshwèn tù bù nkom mbwoṅ yi, ndo' gol njo' i yi.

⁵A so tshen mbwoṅ nà ntùm nkwa mi a be mbaṅ Koṅ nà, bo nke ndo' nket Koṅ Kàn yi.

⁶A lo' gol nabte Koṅ yi. Koṅ ghù ta' bu kam nesage, bam se be nguan kam bu.

⁷A lo' gol nabte ba kérubim yi bàa. A tete yub num ntôg kabte Koṅ mbàa.

⁸Nte kérubim mba num sit tôg Koṅ no, nte yub num ntôg mi mbàa. A nabte ba kérubim bo tum à fe tà num kabte Koṅ, neto' num ntôg mi mbàa.

⁹Ba kérubim sette mbàb mub ntshag tù ndo' nke nkabte Koṅ yi. Bo na' mb'a se se, nke kabte Koṅ.

¹⁰A lo' ntshwèn tù bù nkom téblé yi, a sag nguan ta' bu, bam se be kam bu, nesag nèn tu be nguan kam bu.

¹¹A nsi lo' gol nelàn yo' téblé là yi, lo' gol yo' ntôg mi yi.

¹²A kom ngoṅ tse a zi mba ntu bu mènntùn nà, ndo' gol njo' ngoṅ tse yi ndiaṅ mbume.

¹³A tswe nkwa gol nkuà, num ntôg téblé nkuà mi nku mi be bwe là.

¹⁴Nkwa na' mb'a num ngoṅ tse, bo nke nso ba mbwoṅ nebù' téblé yi nsi nkel à ntùm men nkwa là.

¹⁵A lo' ntshwèn tù bù nkom ba mbwoṅ yi, ndo' gol njo' yi. Bo a' ke ndo' tshen mbwoṅ nà ket téblé yi nsi.

¹⁶A lo' gol nelàn nabte tshundà yi tse bo nsi ke te num téblé là: Nka mi, ntu' tse, bon ntu' tse, nkob mi, mi neke naṅ ju nebot dù' yi ntùm bwe.

¹⁷A lo' gol nelàn nabte ju neghette lambo bwe yi. A tswe yen ju l'a netswe. Tun i, mbaṅ i, mbu mi, ndô tse boa nsàmtù mi b'a ntam.

¹⁸Mbu mi nke ntum bag bag, mbe ntôge. Mi ntat mo' bag, memo' mi ntat num mo'o.

¹⁹Ntu' lo be num ta' bu i tat ndù a fute mba mekale, bo tàm se mba nsàmtù, mbèn mbe num mo' ta' bu i ntu' tat ndù a fute mba mekale, bo tàm se mba nsàmtù. A na' mb'a be ndùlala num njoṅ mbu mi ntôg fa mi a tumte num ju neghette nka' bwe là.

²⁰Ntu' kuà lo tumte be kua' num ju là ndù a fute mba mekale, bo tàm se mba nsàmtù.

²¹Ta' nsàmtù bèt tun mbwe mbu mi mbàa, mo' ta' i bèn mbèt tum tun mbatte mbu mi mi mbàa, mo' ta' i bèn mbèt tun mbu mi mi mbàa mi a tù' là. A be be ndùlala num mbu ntôg mi a tumte num ju neghette nka' bwe là.

²²Nsàmtù boa mbu mi na' nko' à kua' num wut ntshù' boa ju neghette nka' bwe. Bo na' ndo' à gol nelàn ntswe njoṅ i fa yi. A b'a kua' ta' i ntshù'.

²³A ghù ndambo mi sammbàa, tshu nefét tshu yi boa ntsi bwembwôge. A lo' à gol nelàn ntswe njoṅ i fa yi.

²⁴A lo' kilô gol nelàn ṅam ntàn ntswe i yi boa njoṅ tshu tse fa.

²⁵A *gi*lo' ntshwèn tù bù nabte tômbwôg labinda yi: Nesag be ta' kam bu, bam se be ta' kam bu, kum tse fa b'a be ndaṅndaṅ. Nesag nèn tù ghù ta' bu. Ndô mi bo wul i na' mb'a ntam.

²⁶A lo' gol nelàn njo' i yi, num i, njam ntùm bwe ndiaṅ mbume boa ndô mi, mbèn ndo' gol ndam ngoṅ i yi mbume.

²⁷A tswe nkwa mi gol, nte bam ngoṅ i, num bag tse bàa, num nsa tse bàa, num neke nso ba mbwoṅ bwe, ndo' nkel i yi nsi.

²⁸A lo' ntshwèn tù bù nkom mbwoṅ yi, ndo' gol njo' i yi.

²⁹A nabte mba mfèt num neyo' ze nelàne, bo labinda nelamte z'a tamt'a mba nganabte labinda là.