Read Medumba Netume 39 Bible Online

Netume 39 - Medumba bible

Netume 39

¹Bo lo' nzwe nto'nto' nenàfi, meba, z'a ba nziage là ntam nzwe fa' yi num fa' dù' nelàne, ntam nzwe nelàn Aron yi mba Tshùaben na' ntshob Mosé là.

²Bo lo' gol nke ntam kum nesag se bo ke nkel à num ngelaṅ fa' là yi, ndo' nzwe z'a ba mba tsinkém, nzwe z'a ba, nzwe z'a ba nzwe'nzwe' nziag là, bo mbwô nzwe z'a fùag là kà ntam kum nà yi. A bwô ndù a b'a fa' ta' ngave.

³Bo nsi lo' gol tswe ba mbab tshu yi, tote yub mfémfé, fate mum ba nzwe nto'nto' nenàfi, ts'a ba mba tsinkém nà, ts'a ba nziag là, ts'a ba nzwe'nzwe', mbe mbwô nzwe là. A bwô ndù a b'a fa' ta' ngave.

⁴Bo nabte nkém mi mi a ke ntshùb i là, njoṅt'é num ntôg mi mbàa.

⁵A bwô ndù kob s'a be num kum nà zin bo kum à ntam: A na' mb'a gol, nzwe z'a ba mba tsinkém nà, nzwe meba, nzwe z'a ba nzwe'nzwe' mba nziag là, bo mbwô nzwe z'a fùag là. Bo ghù ndaṅndaṅ mba Tshùaben na' ntshob Mosé là.

⁶Bo lo' ndoṅ onix ndoṅ ntùm gol, ntshebte ndèn nshumnshum Israél num bwe, mba bo num ntshebte ba màkwa là.

⁷Bo yab yub nkém kum nesag se bo ke nkel à num ngelaṅ fa' là, num neke ndo' nkwimte bon Israél yi, ndaṅndaṅ mba Tshùaben na' ntshob Mosé là.

⁸Bo tam kum s'a ke nswe' nkabt'a nda' ntù mèn nà. Bo lo' ve mfa' i yi a be mba kum nesag se bo ke nkel à num ngelaṅ fa' là. A b'a nzwe gol, nzwe z'a ba mba tsinkém, nzwe meba, nzwe z'a ba nzwe'nzwe' nke nziage, bo mbwô nzwe z'a fùag là.

⁹Kum s'a be nswe' nkabt'a nda' ntù mèn nà, na' mb'a ndaṅndaṅ num kum tse kuà fa. Nesag bo bam se na' mb'a njoṅ mfi' z'a be ndo num màdu' mèn nkum num nkét ntu bu i là. A na' mb'a tshub tse bàa.

¹⁰Bo lo' ndoṅ ntshab num bwe nka tse kuà. Mbwe nka: sardonik, topaze, emerode;

¹¹mbatte nka bàa: eskarbukle, safir, tùn ndù a ta neshu mbèn nta neshu;

¹²mbatte nka tat: opale, agate, amétistô;

¹³mbatte nka kuà: loṅ tanjoṅ, onix, yaspi. Bo loṅ men ndoṅ nà ntùm nkwa gol.

¹⁴Njoṅ i fa na' mb'a ntshob bàa gham, mba ndèn nshumnshum Israél be là. Bo tshebte men ndoṅ nà mba ba màkwa là; lén ta' tunndà netèt tse ntshob bàa gham be num ta' loṅ.

¹⁵Bo lo' gol nelàn ntswe ba tshan yi, mba' i mba mvèt là, njab num kum s'a ke nswe' nkabt'a ntù mèn nà.

¹⁶Bo tswe nkwa gol mba bo mbwô gol mbàa, njab mbwô mbàa là num ntôg kum mbàa, kum s'a ke nswe' nkabt'a ntù mèn nà.

¹⁷Bo lo' mvèt bàa là ntôg yi ntùm nkwa mbàa, num ntôg kum mbàa, kum s'a ke nswe' nkabt'a ntù mèn nà.

¹⁸Bo tsin tu mvèt bàa mbwe ntô nkém mi bo te num kum nesag se bo ke nkel à ngelaṅ fa' là.

¹⁹Bo nsi bèn tswe nkwa gol mbàa mi ntôg kum s'a ke nswe' nkabt'a ntù mèn nà. A bwô ndù a b'a num ngoṅ i ze ntùm bwe z'a be njab num kum nesag se bo ke nkel à ngelaṅ fa' là.

²⁰Bo bèn nabte memo' nkwa gol mbàa, njab num tun nkém kum nesag se bo ke nkel à ngelaṅ fa' là, bo yab à mbwe bwe, num ngelaṅ dù' ze yoṅ i be là; a b'a mfe tu kob kum nesag se bo ke nkel à ngelaṅ fa' là.

²¹Bo lo' mvèt num mi nkwa kum s'a ke nswe' nkabt'a ntù mèn nà, à tsho ntùm mi nkwa kum nesag se bo ke nkel à ngelaṅ fa' là. Tun mbwe kum tsin tu kob mbatte kum, ngô bwe ndùlala, ke fiag num mo'o.

²²Bo tam kum nesag se bo ke nkel à ngelaṅ fa' là, ndù bo lo' à ndeb nenàfi mba' nzwe i fa yi.

²³Tô dù' netshag tu be netèt bwe, ndù bo tam ngoṅ i, a tswe à mba ngaba' nzwe bèn mba' là, ndùlala ndù kà kum nà fagte.

²⁴Bo taṅte memo' ntàm tshu num ngoṅ kum tun nsi, men ntàm tshu là b'a nenàfi, mbe meba, mba nzwe'nzwe', ngù ndeb mbwô nzwe nefùage.

²⁵Bo tswe ba ṅwa gol, taṅ tàm ju ntaṅ ta' ṅwa, ngù ndùlala ndiaṅ mbume, num ngoṅ kum fa:

²⁶Bo taṅ ṅwa, ntaṅ ta' tàm ju, ndo' ndiaṅ ngoṅ kum yi mbume. Yen nà b'a num fa', mb'a ndaṅndaṅ mba Tshùaben na' ntshob Mosé là.

²⁷Bo lo' nzwe mebwô ntam nkum yi, mba' men nkum n'a num Aron boa nshumnshum tse;

²⁸ndo' nzwe mebwô ntam tshe' bo memo' ntshé' be mi nzwe mebwô num neke nkwi wut yi. Bo lo' nzwe mebwô là ntam ba kut mba yi, tshen nzwe mebwô là b'a fùag tse.

²⁹Bo lo' mbwô fùag nzwe ntam nkob yi, vène, ndeb i b'a nenàfi, mba, mba nzwe'nzwe', kua' mba Tshùaben na' ntshob Mosé là.

³⁰Bo lo' gol nelàn ntswe ta' bàb ju yi, a be mbwô nelàne, ndù bo kite bwe mba bo num ntshebte ta' màkwa là ndù: Tshùaben b'a Nelàne.

³¹Bo lo' nkù z'a be nenàfi là ntaṅ i yi num tshe', mfe tu mba Tshùaben na' ntshob Mosé là.

³²Bo miagte njoṅ mfa' fa num dù'ntswe, mba num ntàb mbumte. Bon Israél ghù tshu fa tse Tshùaben na' ntshob Mosé là.

³³Bo lo' dù'ntswe nèn yi mbwe Mosé: Ntàb boa njoṅ tshundà tse fa, ba ngub, ba ntù, ba mbwoṅ, ba ntom boa ba tun tse;

³⁴ngub nkomnjù tse bo se' a ba là boa ngub mbeloṅ tse nekabte na' mbèn mbe nzwe fagte.

³⁵Koṅ Kàn boa mbwoṅ tse, bo kabte;

³⁶téblé, njoṅ bon tshu tse fa, bo bàn ju bwôntù;

³⁷ju neghette nka' bwe z'a b'a gol nelàn nà, boa ndambo mi, ndambo mi bo nabte là, njoṅ bon tshundà tse fa, bo mfèt mi nema' ntùm ndambo;

³⁸tômbwôg gol, mfèt yo', labinda ze bo ton nà bo nzwe nzendà z'a ntshu ntàb là;

³⁹tômbwôg tùn meba, ke'te ze tùn meba, mbwoṅ tse boa tshundà tse fa; kab tshaṅ bo tun i, nzwe bam ntshundà, ntom tse, tun tse;

⁴⁰nzwe nzendà bam ntshundà, mvèt tse, nsaṅ mi boa njoṅ tshundà tse fa, num neke mfa' yi ntùm dù'ntswe, ntùm ndà mbumte, ba nzwe neke mfa' yi ntùm dù' nelàne,

⁴¹ba nzwe nelàn tse ngafà tshule'te, Aron ghù nket là, boa nzwe nshumnshum tse num neke mfa' fa' sàm yi.

⁴²Bon Israél fa' men mfa' là fa, ngù kua' mba Tshùaben na' ntshob Mosé ndù bo fa' là.

⁴³Mosé lôte fa', njen ndù bo fa'a, mfa' kua' mba Tshùaben na' ntshob là. Mosé naṅ mbotni num bo.