Read Medumba Netume 40 Bible Online

Netume 40 - Medumba bible

Netume 40

¹Tshùaben tshob Mosé ndù:

²Num mbwe lé'njù ntùm mbwe maṅwù, o nsi ke kut dù'ntswe, kut ndà mbumte.

³O nsi te Koṅ Kàn ntùm bwe, lo' nzwe kabt'é yi.

⁴O nsi se' téblé bwe, te i nka. O nsi se' ju neghette nka' bwe, nabte ndambo ghette bwe.

⁵O nsi te tômbwôg gol, se labinda mbwe Koṅ Kàn, taṅ nzwe nzendà nze dù'ntswe.

⁶O nsi te tômbwôg neton ba nyàm yi mbwe nze dù'ntswe bo ndà mbumte.

⁷O nsi te kab tshaṅ netèt ndà mbumte bo tômbwôge, naṅ ntse ntùm bwe.

⁸O nsi ghù bam ntshundà diaṅ bume, taṅte nzwe nzendà nze bam ntshundà.

⁹O nsi lo' mfèt yo' dù'ntswe yi bo mba ke lo z'a ntùm bwe là, lànt'é boa tshundà tse fa, ndù a tù' nelàne.

¹⁰O nsi yo' tômbwôg neton ba nyàm bwe boa njoṅ tshundà tse fa, ghù tômbwôg tù' nelàne. Tômbwôg nsi làn neshu.

¹¹O nsi yo' kab tshaṅ bo tun i, ghù a tù' nelàne.

¹²O nsi tshob Aron boa nshumnshum tse kù' nèn nzendà ndà mbumte, o sôg yub ntse.

¹³O nsi ma' nzwe ts'a làn nà num Aron, yo' i, a tù' nelàne, ndùlala mbe ntùm fa' sàm, nke mfa' me.

¹⁴O nsi ghù nshumnshum Aron se' mbaṅ o, o ma' ba nkum num bo,

¹⁵njo' yub kua' mb'o na' njo' tà yub là, ndùlala ndù bo be ntùm fa' sàm, nke mfa' me. Yen neyo' là nsi ghù bo tù' ghafa' tshàm matmat netèt yub nzwit mèn.

¹⁶Mosé ghù mba ke lo ze Tshùaben tshob yi là; nju' ntshu.

¹⁷Num mbwe lé'njù ntùm mbwe maṅwù ntùm mbatte ngu'njù bàa mba bo tum Egipto là bo kut dù'ntswe.

¹⁸Mosé kut dù'ntswe; a ma' tun i, nte ntù nsi, ma' mbwoṅ, nte ntom tù.

¹⁹A te ntàb num dù'ntswe, njab nkabte ntàb mfe num tù, kua' mba Tshùaben na' ntshob Mosé là.

²⁰A ket Kàn njab ntùm Koṅ, njab ba mbwoṅ num Koṅ, njab kabte mfe num bwe.

²¹A lo' Koṅ nèn yi ntùm dù'ntswe, njab nzwe fagte bwe num nekabte Koṅ Kàn yi mba Tshùaben na' ntshob yi là.

²²A te téblé ntùm ndà mbumte, num bag dù'ntswe z'a tu là, njam njù, njam nzwe;

²³a yab ta' nka ntu' bàn bwe, mbwe Tshùaben, kua' mba Tshùaben na' ntshob yi là.

²⁴A te ju neghette nka' bwe ntùm ntàb mbumte, mbwe téblé, num bag i z'a be se dù'ntswe là;

²⁵a nabte ndambo mbwe Tshùaben, kua' mb'a na' ntshob Mosé ze tu wut là.

²⁶A te tômbwôg gol ntùm ntàb mbumte, mbwe nzwe;

²⁷nton labinda nelamte bwe kua' mba Tshùaben na' ntshob yi là.

²⁸A taṅ nzwe nzendà nze dù'ntswe.

²⁹A te tômbwôg neton ba nyàm yi nze dù'ntswe, nze ndà mbumte; a ton nyàm bwe, mfà ju bwôntù kua' mba Tshùaben na' ntshob yi là.

³⁰A te kab tshaṅ netèt ntàb mbumte bo tômbwôge, naṅ ntse bwe num neke nsôg mbu yi;

³¹Mosé, Aron mba nshumnshum tse lo ke nsôg mbu boa nku bwe;

³²Ndùse bo tshwèt ntsho ntàb mbumte, nke ngebte mbaṅ tômbwôg là. Bo nke nsôg ntùm bwe mba Tshùaben na' ntshob Mosé là.

³³A kut bam ntshundà ndiaṅ dù'ntswe yi bo tômbwôg mbume, ntaṅ nzwe nzendà nze bam ntshundà. Tshù mba Mosé na' miagte fa' là.

³⁴Ndùlala ndot kabte ndà mbumte, nkuni Tshùaben dun ntùm dù'ntswe.

³⁵Mosé ke ku'ni netsho ntùm ntàb mbumte, nummbe ndot lo ke' à be num bwe, mba ndù nkuni Tshùaben lo dun ntùm dù'ntswe.

³⁶Num njoṅ ngelaṅ fa ze bon Israél ke nzin nà, bo nke nzin à bam ndot z'a be mfe num dù'ntswe là.

³⁷Bo lo ke ghù nenèn mbwe, a be ze ndot ke' lo là. Bo lo ke mbébe, tà nkum ndùs'a lo là.

³⁸Ndot Tshùaben lo ke mbe mfe num dù'ntswe mbwôgtshù, mbwôg nke mbe mfe num bwe tèttswe', kua' A nke mbe ndùlala njoṅ ngelaṅ fa bo ke nzin nà.