Read Medumba Netume 6 Bible Online

Netume 6 - Medumba bible

Netume 6

¹Tshùaben tshob Mosé ndù: Ndonni, tu wul o nsi yen ju ze me nsi ghù Faraon nà. Bu neta nsi nànt'é a faṅ yub bo nène, bu neta nsi nànt'é a ta' yub ntùm ze ngô.

²Nsi tshob nu Mosé, ntshob ndù: Me b'a Tshùaben.

³Me lo ṅwag Abraham, ṅwag Isak, ṅwag Yakob mba Nsi Nganeta Ntshùate là; nda' ndù bo lo ke lèn àm lén sàm s'a be Tshùaben nà.

⁴Me lo bèn ngwat kàn bag à bo, num nefà ngô Kanaan, ngô ze bo be kù ntswe ntùm bwe, ndù bo lo tswe ntùm bwe là.

⁵Me ju' mba bon Israél tshwèt ntsham zwe ntùm ngùtni ze ba Egipto taṅ yub bwe ndà kuan nà; ndonni me kwimte kàn sàm se bag à bo wat là.

⁶A ndùlala tshob bon Israél ndù me b'a Tshùaben, mbe ndù me nsi tshu' yub num mfa' mi ba Egipto tshwèt ma'ni yub yi là, tshu' yub ndà kuan, lo' bu àm ze me nsi nyit là yôg yub yi, ghù ndùlal'a njam netsho'te tse ndùbndùb.

⁷Me nsi lo' zin ghù yàm nzwit mèn yi, be zin Nsi, a tshùa ndùlala bin lèn ndù a b'a me Tshùaben. Nsi zin bèn ntshu' zin num mfa' mi ba Egipto tshwèt ma'ni zin bwe là.

⁸Me nsi ghù bin tsho ntùm ngô ze me na' nsaṅlaṅ bwe ndù me nsi fà Abraham, Isak mba Yakob là. Me Tshùaben nsi fà i bin a tù' zin ju.

⁹Mosé tshob bon Israél ndùlala, nda' ndù bo ke ju' tshob yen nu là Mosé, nummbe nu kuan lo lèt num bo neshu.

¹⁰Tshùaben tshob Mosé ndù:

¹¹Nèn ntshob nu Faraon mfen Egipto. A bwô ndù a faṅ bon Israél tum ntùm ze ngô.

¹²Là Mosé tshob mbwe Tshùaben ndù: Yen mbe bon Israél ke' ju' ju ze me tshob là. Be Faraon ju' ju ze me nsi tshob l'a ndùke? Me b'a mèn ze ntshob màm ke' làn nà.

¹³Tshùaben tshob nu Mosé bo Aron, ntshob nu tse bo nsi tshob bon Israél mba Faraon, mfen Egipto, ndù a ghù bon Israél tum ntùm ngô Egipto là.

¹⁴Tshù tà tunndà tse nshum Israél li: Tse nshum Rubèn, tuswe Israél: Hénok, Pallu, Hesron bo Karmi. Tshù tse tunndà Rubèn nà.

¹⁵Tse nshum Siméon: Yemuél, Yamin, Ohad, Yakin bo Tsokar, mbèn ngù Saul nshum ngon Kanaan. Tshù tse tunndà Siméon nà.

¹⁶Tshù ndèn tse nshum Lévi, mb'a ntùm tunndà tshob li: Guershom, Kehat bo Mérari. Ngu'njù yôg Lévi b'a ntshob sammbàa bon tat nkù.

¹⁷Tse nshum Guershom b'a: Libni bo Shimei, boa tshob tunndà.

¹⁸Tse nshum Kehat b'a Amram, Yitsehar, Hébron bo Uziél. Ngu'njù yôg Kehat b'a ntshob tat bon tat nkù.

¹⁹Bon Mérari b'a: Malki bo Mushi. Tshù tse tunndà Lévi là boa yub nzwit.

²⁰Amram so Yokebèd, mo' mfèt tàab, a bwe Aron bo Mosé yi. Tse ngu'njù yôg Amram b'a ntshob sammbàa bon tat nkù.

²¹Tse nshum Yitsehar b'a: Koré, Nefég bo Zikri.

²²Tse nshum Uziél b'a Mishaél, Eltsafan bo Sitri.

²³Aron so Elishéba, ngon Aminadab, ngon mà Nakshon; a bwe Nadab, Abiu, Eléazar bo Itamar yi.

²⁴Tse nshum Koré: Assir, Elkana bo Abiasaf. Tshù tse tunndà Koré là.

²⁵Eléazar, nshum Aron so mo' ngon Putiel, a bwe Finéas yi. Tshù tàndà tse tunndà Lévi là boa tshob tunndà.

²⁶Tshù, yen Aron ni bo yen Mosé li b'a ben tse Tshùaben na' ntshob bo ndù bo sô bon Israél Egipto, ntse'te yub mba ntshu ntsho là.

²⁷A b'a bo na' mbèn ntshob nu Faraon mfen Egipto, num nesô bon Israél Egipto. A na' mb'a bo, Mosé bo Aron.

²⁸Ndùse Tshùaben tshob nu Mosé Egipto là,

²⁹Tshùaben tshob Mosé ndù: Me b'a Tshùaben. Tshob njoṅ tshu fa tse me tshob wù là Faraon mfen Egipto.

³⁰Mosé bùnte mbwe Tshùaben ndù: Yen mbe me ke' ghù ntshu nefùage. Be Faraon bam ju ze me tshob l'a ndùke?