Read Medumba Netume 7 Bible Online

Netume 7 - Medumba bible

Netume 7

¹Tshùaben tshob Mosé ndù: Me lo' o ngù nsi yi mbwe Faraon; mfèl o Aron nsi be yu ngatshob ntshob Nsi.

²O nsi ke ghù mba ke lo ze me nsi tshob wù là; mfèl o Aron nsi ke tshob Faraon ndù a faṅ bon Israél tum ntùm ze ngô.

³Tu wul àm nsi kag sagntù ntù Faraon, ke kwi'te nkeki boa nsà ntùm ngô Egipto.

⁴Faraon ke nsi ju' ju ze bin tshob là. Me nsi yab bu àm mum ngô Egipto, ghù tshàm ntshu ntsho, yàm nzwit mèn, bon Israél tum Egipto. Me nsi tshùa njam netsho'te tse ndùbndùb kà ghù ndùlala.

⁵Ba Egipto nsi lèn ndù me b'a Tshùaben, ngelaṅ ze me nsi nyit bu àm num Egipto, ghù bon Israél tum netèt bo là.

⁶Mosé bo Aron ghù ju ze Tshùaben na' ntshob bo là, ngù be ndaṅndaṅ.

⁷Mosé lo ghù ngu'njù ṅam fome, Aron ghù ngu'njù ntshob tat ṅam fome, ndùse bo ke ntshob nu Faraon nà.

⁸Tshùaben tshob Mosé bo Aron ndù:

⁹Faraon ntshob ndù bin ghù ta' nsà, o tshob Aron lo' kôg se ma' mbwe Faraon. Kôg là nsi tù' ta' nyu.

¹⁰Mosé bo Aron nèn mbaṅ mfen Faraon, ngù mba Tshùaben tshob bo là. Aron ma' kôg se mbwe Faraon mba mbwe ghafa' tse, kôg là tù' ta' nyu.

¹¹Là Faraon tsiaṅ ghazenu boa ghaka, mba ghangàm tse bo be Egipto là; mba bo yub lo' nka ngù yub be ndaṅndaṅ.

¹²Bo ma' njoṅ nkôg mub fa nsi, njoṅ i fa tù' nyu. Nda' ndù se kôg Aron mi njoṅ mub nkôg fa.

¹³Mba tà ndùlala, ntù Faraon nke nsag be nesage, a ke bam ju ze Mosé bo Aron tshob ndaṅndaṅ mba Tshùaben na' ntshob là.

¹⁴Tshùaben tshob Mosé ndù: Faraon tshwèt mfèn ntù; a gha nefaṅ nzwit mèn àm nène.

¹⁵Nèn mbaṅ Faraon kua' mà nkebnjù, ndùs'a nsi tum nèn mbaṅ ntse là. Béb i mbaṅ ta'ntse. Tshùb kôg s'a lo nkaṅ ntù' nyu là bu o.

¹⁶Tshob Faraon ndù: Tshùaben, Nsi ba Héber lo tum àm ndù me tshob wù ndù o faṅ ze nzwit mèn tum nèn mfa' yi num kônkwa. Tà nse' nkum ndonni o ke' kô nebame.

¹⁷Ndùlala Tshùaben tshob ndù: A nsi tshùa njam yen nu li o lèn ndù me b'a Tshùaben. Me nsi lo' kôg s'a bu àm nà lab ntse mi a ta'ntse là yi, ntse kaṅ ntù' lem.

¹⁸Ngontse ts'a ntùm ta'ntse là nsi kwùte, ta'ntse ke ndame; ba Egipto nsi kagtùn nenu ntse mi a tum ta'ntse là ke ku'ni.

¹⁹Tshùaben tshob Mosé ndù: Tshob Aron ndù a lo' kôg nshù bu i num ntse ba Egipto, num bon ntse, num bon netsha' ntse, num ntam ntse mub boa njoṅ ntô ntse mub fa. Njoṅ i fa nsi kaṅ tù' lem; lem nsi be ntùm njoṅ ngô Egipto fa, ntùm nkab ntù boa nkab ndoṅ.

²⁰Mosé bo Aron ghù mba Tshùaben tshob bo là. Aron bù' kôg tù, ndab ntse mi a ta'ntse là yi num miag Faraon mba num miag ghafa' tse; ndùlala njoṅ ntse fa kaṅ ntù' lem.

²¹Ngontse ts'a be ntùm ta'ntse là kwùte, ta'ntse nke ndame, ba Egipto ke bèn nku'ni nenu ntse mi a tum ta'ntse là. Lem be ntùm njoṅ ngô Egipto fa.

²²Là tse ghangàm ba Egipto bèn ngù yub be ndaṅndaṅ njam nka mube. Ntù Faraon sag, a ke ju' ju ze Mosé bo Aron tshob ndaṅndaṅ mba Tshùaben tshob bo là.

²³Faraon lo, mbèn njam ndà i, ke lo' tshen tshu là mba ju là.

²⁴Njoṅ ba Egipto fa tswe' ntse mbaṅ ta'ntse, num neghù ntse nenu; nummbe bo lo ke ku'ni nenu ntse mi a tum ntùm ta'ntse là.

²⁵Tshùaben lo lab ta'ntse a tswe lé'njù sammbàa.

²⁶Tshùaben tshob Mosé ndù: Tsho ndà Faraon ntshob yi ndù: Tshù mba Tshùaben tshob li: Faṅ yàm nzwit mèn ndù a ke mfa' me.

²⁷A be z'o ke nke' nga nefaṅ i a nèn nà, mba me nsi lo' metu' kag nge' yi ntùm njoṅ ngô Egipto fa.

²⁸Mba metu' nsi gha' mbu ntùm ta'ntse, bo ke nko' ntsho ntùm ndà o, ntùm to'ndà o z'o be nzi bwe là, num kunndà su, ntùm ndà ghafa' tsho, ntùm ngô o, ntùm mu ntômbwôg neton tag, ntùm dù' netébte tag bwe.

²⁹Ba metu' nsi ko' num o, num yu ngô, num njoṅ ghafa' tsho fa.