Read Medumba Yob 10 Bible Online

Yob 10 - Medumba bible

Yob 10

¹Ntù àm ke' bèn nekô yôg. M'a' bote Nsi mb'a ko' ntù àm nà. M'a' tsin ntùm nge' z'a ntù àm nà ntshob nu.

²Kà bèn nema' ntsha tu àm me Nsi, a mba me nsi tshob yi là. Soṅ àm ju z'a ghù o nke nkam àm ntanta là.

³A tù' bwô o ndonni à neghùtni, nema'ni fa' se mbu mu fa' là ké? Ndù o nsi tù' ké' yu nelàn à num ntàmtenu ghatshùagntù ké?

⁴O ghù à miag mènntùn ké, k'o ke njen à mba mènntùn à?

⁵Tsho lé'njù b'a mba tse mènntùn nà ké, ke tsho ngu'njù b'a mba tse l'à?

⁶Numk'o nke ndiag mfànnu màm, nke nte lag num nukebwô àm à?

⁷Tu wul o lèn ndù me ke' vù ntsha, ndèn ndù sàm mèn ke bwe z'a b'a tshu' àm bu o là.

⁸Mbu mu na' mbèn mbom àm, mbèn nabt'àm. Mbu mu na' mbèn nabte njoṅ wul àm fa. Ndù o nsi bagt'àm ké?

⁹Kwimte ndù o lo bom àm à mba tsha' nete kab yi là. O bèn nkô nelo' àm nkaṅ à mbab yi ké?

¹⁰O lo ke ghù me swe' mba mbùn nà, ngù me saṅ mba mbùn mi a kut nta là ké?

¹¹O lo so ngub bo mbàb num àm. O lo so mvôg boa nga num àm;

¹²O lo kondèn màm mfà yôg me. O lo lem àm, ndôt'àm, nkabt'àm bam mbàb mu.

¹³Tshù ju z'o na' ndem me ntù o là. Tshù ju z'o na' ngù ntùm nkwatenu mu là.

¹⁴A be ze me ghù nukebwô là mb'o a' yen àm, ke lagte mfànnu màm me.

¹⁵Me b'a njennge', a be ze me vù ntsha là! A be ze me b'a mbu' là, mba me ke bù' tu àm nsi. Nummbe me ywèt tuswe, nge' àm bèn nkôg àm fa.

¹⁶A be ze me ta tu, mbù' tu àm nsi là, mb'o nsi yab njam àm mba ngwayit là. O nsi bèn tshùa njam tshu nekuni lab àm.

¹⁷O tshwèt ndo' tsemo' ghakwénta tse nswe nse' yi num àm, nke ngù tsho yantù nke njàm num àm be neyàme. O lo' nge' ke ndù i ntsho àm yi.

¹⁸Numk'o na' mbam me tum bam màa à? Me na' mbe tum nkwù mba lag sàm mèn lo ke te num àm;

¹⁹mba me be tshàm à mba me lo ke to' be là. Mba me lo tum bam màa nèn à ntùm fi.

²⁰Tshàm lé'njù yôg ke' vôgte ké? Mi mfaṅ àm nà me zwiag mba num yen metsit ngelaṅ ni,

²¹kà njôg nèn ke bèn nzi mbène. Nèn ntùm ngô njam bo netshaṅ vùkob.

²²Ngô ze dù' sènte bwe kua' neshu là. A bwe là ze netshaṅ vùkob se ka, va' tam tu' là. Nelàn ke ntù' fute ts'a njam ntùm yen ngô là.