Read Medumba Yob 11 Bible Online

Yob 11 - Medumba bible

Yob 11

¹Tsofar ze Naama tshob ndù:

²Men bwoṅ ntshob mi o tshwèt ntshob là nsi ghù mbùn ntshob ké? A netshob yàm bèn ghù kà mèn jù tô ké?

³Yob, mb'o tshwèt ntshu' là bèn ghù benntùn mi ntswe ké? O kwate mb'o nsi tshabte benntùn sàm mèn be ke tshobt'o ké?

⁴O num ntshob ndù: Yàm neyen tsin ndaṅndaṅ, me b'a nelàn num miag wù Nsi.

⁵Wé! A lo mbe ndù be Nsi tshob nu, a lo mbe ndù b'a gha' ntshu i mbùnte wù,

⁶a lo mbe ndù b'a la'te mesin zenu wù, zenu i z'a tsho nyàm neshu là, mba tu wul o ku'ni neyen ndù a ke' ghù wù à mfi' mba mfànnu mu be yi là.

⁷O ke mbab ndù' à mb'o lèn nkwatenu Nsi ké? O ke mbab ndù' a mb'o ghù nelèn Nganeta Ntshùate kua' mebwô ké?

⁸O nsi ghù à ndùke mba nelèn Nsi sag nèn tù ntshùa kamànyam à? A tsho nèn ntshùa ngô fe ben, ke z'o nsi lèn bwe à?

⁹Mfi' Nsi sag ntshùa tsha'a, bam mfi' Nsi ghu' ntshùa dibantse.

¹⁰A be ze Nsi tshùa, ngome, nsoṅ nke nèn yi ntùm ze ndà ntsha là, mba we z'a ghù netshètt'é à?

¹¹Nummbe Nsi lèn ben kebwô. A num njen ghavù ntsha ndende.

¹²Mbe se' mba mènntùn nà, ze zenu b'a ze mbabune, bo bwe i à mba mén kekwèn tshwèt là.

¹³Mba wù là, lo' ntù o nèn yi mbaṅ Nsi, nyit mbu mu ntshag yi.

¹⁴A bwô ndù o kù nukebwô, ke bam ndù nu z'a ke' tsin nà tswe bam yu ntàb.

¹⁵O nsi bù' se o nsi yen ngelaṅ nà ke lo', ghù fènntù, ke ke mbwôge.

¹⁶O nsi lagte nge' tsho, tù' ke kwimt'a ntse mi a swe' kà ntôg là.

¹⁷Yôg so nsi ziag mba lag nyam num nziag njag nyam nà. Njam nsi fét tù' mfôgnjù.

¹⁸A bwô neghù bamntù, ndun nenywinte. Nsi a' béb o, mfà fite wù.

¹⁹O nsi fite, ke bwôg sàm mèn, benntùn yàm nsi fute se o mbu.

²⁰Là, miag ghatshùagntù nsi tam njame. Dù' nelem ke nsi be bo. Bo nsi tù' nywinte yub à nda' vùkob.