Read Medumba Yob 12 Bible Online

Yob 12 - Medumba bible

Yob 12

¹Yob bùnte ntshob ndù:

²Ṅ, bin b'a kum benntùn ta'! Bin kwù mba mba zenu a' kwù ze.

³Mba kua' tu wul àm ghù nkwate mba bin nà. Me ke' b'a kua' njam bin num nkwate. We z'a ke' lèn ze tshu tse bin tshwèt ntshob à?

⁴Me tù' b'a ju kom zwi num miag shun tshàm. Bo tshwèt nzwi, mba mba me be mèn netsine, mbe ke lo' là. Nda' ndù me num mbètte Nsi ndù a ywimt'àm.

⁵Mènntùn z'a tswe tse mebwô là num nkwate nezwi ngayennge', kà zwi ze ku i tswe tiag là, nke nké'te kob ben neta.

⁶Fite num bam ntàb ghalag ntsha', mbétni be ben tse bo num nkag sobni ntù Nsi là, ben tse yub neta tù' yub nsi là.

⁷Bètte ba nyàm bo a' tswit'o. Bètte nsaṅ mfe kamànyam bo a' zi't'o.

⁸Tshob tsha' a nsi tswit'o, ngontse ts'a dibantse là nsi soṅ o zenu.

⁹We z'a ke' yen keki num bo, ndèn ndù Tshùaben bèn nabte njoṅ yub fa à?

¹⁰A tshùb zwiag mba ke lo z'a be ntùn nà bu i, zwiag njoṅ benntùn fa.

¹¹Toṅ mèn ke' be ju' nze ntshob ndaṅndaṅ mba lém mèn be nju' njwèt jujù là ké?

¹²Zenu be mbe tu ywèn benntùn, ngu'njù yàm nke mfà nkwate.

¹³Nsi ghù zenu bo ngù'. A yi ke mfà ntag bo nesiaṅte.

¹⁴A be z'a sate là, mba mèn ke bèn nkule, a be z'a ma' mèn tsha là, mba mèn z'a kwé i kag là ke nsi be.

¹⁵Nsi num ntshùb ntse tsha' jum, nkag i a sate tsha' fafa.

¹⁶Nsi ghù neta, mbèn nke njob ngu' njoṅ ndù fa. A bèn ngù mba' ngatatte mba mèn bo tatt'é là.

¹⁷A num ngù ghafà ntag ngô nke nzin nku banban, ngù ghatsho'te tù' gha femni.

¹⁸A num nké' kob tun fenfen, ntaṅ mvèt zwe' bo.

¹⁹A num ngù ghafà tshule'te nke nzin nku banban. A num ntèn ghaghù neta ntam nsi.

²⁰A num nsô ntshob ntshu ben tse bo num nka'te là, nkwé zenu ywèn benntùn.

²¹A be naṅ tuswe tu ben ndùbndùb, nkiag kob ben neta.

²²A num mbù' fu num ju z'a lem ntùm njam nà. A num ndo' netshaṅ vùkob ntum yi num nelàne.

²³A num ngù ngôngô zi, a bèn mbiagte yube. A num ngù bo zi nèn ngùanesà, a bèn nsoṅ yub mbèn yi num tshob ndùnsi.

²⁴A num nkwé nkwate fenfen ngôngô, ntshag yub num kônkwa ke manze bo bi.

²⁵Bo num momte ntùm njame, ke yen ndaṅndaṅ. Nsi num ngù bo nke ntsha mba ghabum ndu' là.