Read Medumba Yob 13 Bible Online

Yob 13 - Medumba bible

Yob 13

¹Lag sàm lo yen yen nà fa, a lo tam toṅ àm me tshùb.

²Ju ze bin lèn nà, mba me yàm lène. Bin ke' tshùa àm num sàm nu.

³Là me diag netshob yàm nu à Nganeta Ntshùate, me ke ndiag neta ntshu à bag Nsi.

⁴Nummbe bin b'a ghatshob tatte, mbe ghanyu' fu banban.

⁵Bin lo tswe ntshu mi' mb'a mbe bo yen zin mba ghazenu là.

⁶Bin ju' mba me tshob yàm nu là, bin kù' ntoṅ mba me ma' njom wut màm nà.

⁷Bin nsi lo' à ba tatte tshètte ze njam Nsi yi ké? Bin a' lo' à fùte ntomte Nsi yi ké?

⁸Bin diag netshètt'a ze njam Nsi ké? Bin diag netù' à tse mba'sa' ké?

⁹Nsi tsha' zin mb'a tèt nu ntùn num bin ké? Ke bin ke nediag nefùt'é mba bo num mfùte mènntùn n'à?

¹⁰Mba' i ke nsi nyi'te zin ké?

¹¹Bwôg i ke nsi kab mbu num bin ké?

¹²Min ntshob ngùm b'a tànkùt nkwango'. Min mbùn ntshob b'a mba kàbngô tse bo kul à tsha' là.

¹³Bin mi tswe, mfaṅ àm nà me tshob yàm nu! Bin faṅ nà mba ke lo z'a tsho àm nà tsho.

¹⁴M'a' lo' nsô màm mfét mbàb wul àm yi à numke? M'a' yèn à nda' yôg sàm.

¹⁵Tshù, Nsi a' zwi àm! Me ke tshwèt mbèn nywinte sàm ju. Nda' ndù m'a' tshètte yàm njam mbwe i num nzin màm.

¹⁶Yen nebab ndù' là ghù nete tshwèt num yôg sàm, nummbe mèn kebwô ke' ghù netsin mbwe Nsi.

¹⁷Bin ju'u, bin ju' ntshob màm. Bin kù' ntoṅ num ju ze m'a' tshob là.

¹⁸Tshù me li, m'a' ma' njom wut màm. Me lèn ndù m'a' loṅ kame.

¹⁹Mèn bwe z'a diag neta ntshu num àm nà ké? A be ndùlala mba m'a' tswe ntshu mi'i, nkwù tshàm.

²⁰Bam me ndù me bètte tshu bàa, bam tshen tshu là. A nsi tshùa ndùlala me tù' ke ngebt'a mbaṅ o, ke bèn nèn ngùanesà.

²¹Lé' bu o num àm, kà bèn nelo' fétwut ntsho àm yi.

²²Nsi, bwôgmbwe ntshob m'a' bùnte. Ntag ndùlala, o faṅ me tshob o bùnte me.

²³Mfànnu màm boa nukebwô tshàm b'a si'i? Ghù me lèn mfànnu màm boa nukebwô tshàm.

²⁴Numk'o ndem se o ntù' ke ndo' àm mba ngakeban à?

²⁵O kô neta' fu tù se fetmbaṅ tshwèt nkel i nèn yi là ké? ke netam njam ntàn nyi'nga njum no l'à? O nediag nebwe't'àm ké? Me ke' b'a sàm ju, là me b'a fu tù. O tshwèt njab njam ntàn nyi'nga njum.

²⁶Numk'o ndo' zwe nge' ntsho àm yi num nukebwô tse me na' ngù ntùm tshàm lé'njù' nshum à?

²⁷O ma' nku màm ntùm nkebu' numke? Numk'o nke ndôte nzin màm ndù à? O num nke ntsha' tun nku màm ndùse me nèn nà.

²⁸Yen mbe wul àm ke ngwù nsi à mfémfé mba ntshwèn ze mbé' fèl i là, nke ntsho' naṅ nsi mba nzwe ze kùafe tshùb i là.