Read Medumba Yob 14 Bible Online

Yob 14 - Medumba bible

Yob 14

¹Mènntùn ze mènnzwi bwe i là, lé'njù yôg tse kag; là yôg se b'a be ntùm nge' ke faṅ lé'njù.

²A num nsàm mba nsàm tù là, mbèn ntsho' ngwù nsi. A num nkù, ndiaṅ mba netshaṅ nà.

³Là o ke nga' lag so à num i nke ndo' àm nèn yi naṅ ntsha tu àm mbwe o!

⁴We z'a ghù nesô ju nelàn ntùm ze kelàn à? Sàm mènntùn ke bwe.

⁵Mb'o siaṅte lé'njù yôg tse; njab njoṅ maṅwù tse, njab ta' ndù z'a b'a ke dut là,

⁶a bwô ndù o tsho' lag so num i; ndù a miagte se lé'njù fa' mba ta' ngalo' nkàb ṅwù là.

⁷Tù se bo keb ma' nsi là num nke nke' nywinte, nummb'a ghù nebèn nte'e, ntob tob se.

⁸Ndùse nga i ywèn ntùm tsha', nko' i kwù ntùm mbab là,

⁹mb'a' bèn nte' ndùs'a nsi ju' ntse là, mbèt mbu mi mba ta' metshab tù là.

¹⁰Mènntùn num nkwù mba ze njoṅ i ku'u. Ndùs'a zwiag matmat là mb'a bèn mb'a zit dù' à?

¹¹Ntse num ntum ntùm diaṅnkat ntse, nta'ntse tsin ke neswe'e, ntse jum.

¹²Be ndaṅndaṅ mènntùn be nkwù ke bèn nzi ndo. A ke' ghù nelo ndùse kamànyam ke' là. A ke nsi lo num miaglo mi a tshwèt nzi là.

¹³Me kô ndù o lem àm ntùm ngô fe ben. Lem àm tà nkum ndùse yantù o tshùa là. Yen nà mbe tôg o yab ngelaṅ z'o nsi kwimt'àm nà.

¹⁴A lo mbe ndù be mènntùn kwù mbèn nse'e, mb'a be me nke nywinte num njoṅ yàm ngelaṅ nge' fa, tà nkum ndùse yàm nebe nsi bèn bate là.

¹⁵Yen ngelaṅ nà mb'o nsi tsiaṅ àm me bùnte, o bèn nkù ntù neyen fa' se mbu mu na' mfa' là.

¹⁶Là ndonni o tshwèt nsiaṅ nku màm, nke ntsha' nukebwô tshàm.

¹⁷O kut nukebwô tshàm ntùm bàm nte màkwa bwe.

¹⁸Mba tà ndùlala mbat kôge, gholoṅ tsho' num ze dù' ntsin dù' ghua.

¹⁹Ntse num ntshu loṅ, neta mbaṅ nke ṅwat tsha' nèn yi, a b'a ndùlala z'o num mbiagte nenywinte mènntùn num nu yôg là.

²⁰O num ndo' mba' o nte ku yi tu mènntùn, ntshag i tà ngùanesà.

²¹Ke bo nyàmte nshumnshum tse lo, mb'a ke nsi lène; ke bo wag yub newag lo, mb'a ke lèn tu i num bwe.

²²A ke njen njoṅ ze ntobni f'a ntùm mbàb wul i. A ke ntsham zwe ntù i a be kua' num se zwiag.