Read Medumba Yob 15 Bible Online

Yob 15 - Medumba bible

Yob 15

¹Elifaz ze Téman tshob ndù:

²Yob, ntshob mu b'a nge, kua' nenùn ntshob mu mi mbe tse. Nzenu mèn be ndo' kagni mbùnte nu yi ké? A ghù neke ndo' nko' nko' ntshob ntshètte wul i yi ké?

³B'a ke lo' ntshob banban nke ntshètte ze njam yi, ke ntshob men nà mi ntun mi ke bwe lo.

⁴O tshob tà mbiagte nebwôg Nsi, ngù tà nebwôg Nsi tù' ju banban.

⁵Mfànnu mu bèn nke ntshagt'o. ntshob ghazete.

⁶A ke' b'a me bèn nke nso ntsha tu o, a ntshu o. A b'a nkub ntshu mu bèn nke mbot'o.

⁷Bo lo bwôg bwe o tsemo' benntùn ké? Bo lo bwôg bwe o kà nkônga mbe ké?

⁸O lo tsho ntùm tsham Nsi ké? O lo' njoṅ zenu fa tù' wù ké?

⁹Ke z'o lèn mbe ndù bag ke' yà lèn à? Ke z'o zi'te mbe ndù bag lo ke yà zi't'à?

¹⁰Ywèn benntùn num netèt bag ndù tu tshob fôg, ndù bo ghù lé'njù yàm ntshùa tse tàan.

¹¹O ke' lo' ntag Nsi mba sàm ju là ké, ke lo' batte ntshob mi bag tshob wù là mba mo' ju là ké?

¹²Numk'o nke ntam mfèt ntù o ndù à? Yen neke mbùnte miag mu ndù b'a mbe ke?

¹³A ndùke? O tù' yantù à num Nsi ndonni ké? A kua' ntshu o bèn nke ntshob lèn tshen tshu li ké?

¹⁴Be mènntùn be kua' mèn nelàn ké? Be mén ze mènnzwi bwe là be mèn netsin ké?

¹⁵Yen mbe Nsi ke' be yab ntù i mba kua' num Angél tse. Mba kua' kamànyam ke' làn num miag mi.

¹⁶Kà njôg mbe se' mènntùn, mèn kebwô z'a bag neshu là! Mènntùn ke mi mfàn nu à ndaṅndaṅ mb'a num mi ntse là!

¹⁷Yob, ju' me tshob ju ze me lène, ju ze me yen nà wù.

¹⁸A b'a ze ghazenu tswite là, ze bo la'te là, ndù tu wut yub na' nzi't'a tà tshobe.

¹⁹Ngô na' mb'a mum mbu mub tù' bo. A lo be ndù sàm ngùn ke' yoṅ mbe netèt bo.

²⁰Ngatshùagntù ke njôg à ntùm nge' num njoṅ lé'njù yôg tse fa. A b'a njoṅ ngu'njù fa ts'a be mi ntsi' mèn kebwô là.

²¹Nze bwôg be ntam num ntoṅ mi. Ngasate dù' be nkab mbu num i mba ntùm ngelaṅ fite.

²²A ke' bèn nywinte netum ntùm njame. Tu wul i yen ṅwi z'a tshwèt nse' num i là.

²³A tshwèt nkù nèn bag bag nediag ze bàn. A lèn mbe lé'njù njam tshwèt mbéb i.

²⁴Ntobni bo nge' kag bwôg yi, ngom i mba ta' mfen z'a tshwèt nèn nema' ntsho là.

²⁵Tshù, a bù' bu i nsi num Nsi. A tshùa tse Nganeta Ntshùate.

²⁶A lo bàb ndù' nkù nde nèn mbaṅ i, ndù a ket ntshètntsho mi mi tshub be bwe là mvèn i.

²⁷Ntswe mebwô lo be num se i, nzit tse'te num mfat mi.

²⁸A ke ntswe ndonni à ntùm ntusô mi a tù' fam nà, ntùm mba' mi gha tse ke' bèn mbe là. Men mba' là nsi vùte, tù' ta' fèt se.

²⁹A ke nsi bèn be ngaju, fa se ke nsi bèn lo tù. Fen se ke nsi bèn lo' dù' num nsitsha'a.

³⁰B'a ke bèn ntum ntùm njame; lagmbwôg nsi kù tob tse, Nsi lo' ywèt ntshu tse mbiagt'é yi a bi.

³¹A be z'a yab ntù num nukebwô là mb'a fùt'a wul i, nummbe nukebwô a' bèn mbe mi ntsho'fa'.

³²Ngelaṅ nsi be se' ndù ze nu yà mi. Nkaṅ mi ke nsi bèn tobe.

³³A nsi tswe b'a mba ntù ndu' mi bo kab ntàm mi a ke yoṅ ntswe là, b'a mba tù tshom se bo na' ndab nsàm mi naṅ nsi là.

³⁴Nummbe tunndà mèn kebwô ke nsi ghù mén. Mbwôg a' kù ba' mèn ze nu i ke' tsin nà.

³⁵Mèn z'a jùm nukebwô là mb'a bwe nge' Nekôg mèn num mbit ntùm ntù yen mèn nà.