Read Medumba Yob 16 Bible Online

Yob 16 - Medumba bible

Yob 16

¹Yob bùnte ntshob ndù:

²Me num nto' nju' lèn men ntshob là. Njoṅ zin fa b'a ghafà ntag tshùagntù.

³Men ntshob tùtù là nsi mi à ndùke? Numk'o nke mfa'te ntùm nu mbùn ntshob ndù à?

⁴Mba me lo ngù netshob be ndaṅndaṅ ndùse bin lo mbèn mbe num yàm dù' là! Mba me lo' ntshob ma'ni zin yi, mba me ko' nshua' mbe' màm num bin.

⁵Mba me ywimte zin ntshu, mba me kum nkub ntshu màm num nelo' ntomte zin yi.

⁶A be ze me tshob là, mba nge' ke nsi fite. Me mi ntswe be netswe mba ke z'a nsi sébte bwe à?

⁷Ndonni Nsi lab yàm nenywinte, a biagte yàm tunndà fa.

⁸O lo tshùb àm. O b'a yàm ngakeban. Yàm bwoṅ lo nsi num àm, nke mbot'àm se se.

⁹Nsi tshwèt nsé't'àm, nke njoṅ àm ntùm yantù i. A tshwèt mfèt nsô num àm, a tshwèt nkam àm, nke ndo' se i ntsho' àm yi nsi.

¹⁰Ghamaṅt'àm gha' ntshu yub num àm. Bo tam bu toṅ àm, ntut'àm. Njoṅ yub fa tam bwoṅ neghù ndù me bi.

¹¹Nsi swèn àm mbu ben kebwô, a ma' àm ntùm mbu ghatshùagntù.

¹²Me lo tswe tshàm fite, Nsi be't'àm; a lo ghom àm ntôntô, mfam àm, nte àm tù me tù' dù' neke ma' nkét mi bwe.

¹³Nkét mi tamt'àm bag bag, ntote zwe' àm ke ko ndèn. Ndù tum bam àm nsa num tsha'a.

¹⁴A tote fa num àm ntôntô, a tsho' ngwù num àm à mba soyé là.

¹⁵Me kwitte ta' bàm num ngub àm, me so se àm ntùm mbabe.

¹⁶Ntsenyà lo' se àm fa, netshaṅ vùkob ghet num miag màm.

¹⁷Ne mbe be ndù mbu màm ke' fètte lem. Yàm le'te ze me num ntshag Nsi là b'a nelàne.

¹⁸Tsha', kà kabte lem tshàm! A bwô ndù nkua' màm ko' ndaṅndaṅ, ke sàm ju tshètt'é.

¹⁹ndonni me ghù yàm nkwénta mfe kamànyam, me ghù ta' ngatshètte njam àm tà mfe tù.

²⁰Me tshwèt ntsiaṅ Nsi ndù a yen ntsenyà màm, nju' yàm le'te.

²¹Me tshwèt ndiag mènntùn z'a zin kam Nsi num tu àm, ndaṅndaṅ mba mènntùn num nzin kam num mo' mènntùn mba yi là.

²²Nummbe bo yà siaṅte ngu'njù tshàm. Ndonni me ke ntsho à num manze ze be me ke bèn mbèn njam num bwe là.