Read Medumba Yob 17 Bible Online

Yob 17 - Medumba bible

Yob 17

¹Zwiag sàm tsin, lé'njù tshàm mi tse. Fi tù' bèn nke mbéb àm.

²Ghatshabte lam àm mbume. Lag sàm zi à nge dù' ze bo tut'àm nà.

³Nsi àm, yab tshwèt. Be yàm tshwèt mbaṅ tu wul o.

⁴O fùn ntù yub nkwate ke bèn mbe bo. A ndùlala, o ke nsi bam bo yob ngu'u.

⁵Mo' mèn be ntsiaṅ shun tse bo à bo ghabte tshu tse, ndùse miag bon tse tshwèt ntshùaṅ nà.

⁶Nsi lo' àm nkaṅ ju komzwi yi mbwe benntùn. Me tù' à ju newage.

⁷Ntobni ma' fù lag àm. Njoṅ nkam wut màm fa ntù' b'a njame.

⁸Nu tshùa ben ndaṅndaṅ, mbu' kam yantù num mèn kebwô.

⁹Mba ndùlala mèn netsin bèn ntshùb ze nze kua' neta, mèn ze mbu mi làn nà bèn ndun fènntù.

¹⁰Là, a bwô njoṅ zin fa se'e, bin se' li, mba mba me ke' fon sàm nzenu netèt bin nà!

¹¹Tshàm lé'njù tôg ze, ntàmtenu màm vù nsi fa, ntàmtenu mi a dun ntù àm nà.

¹²Shun tshàm ke ndo' njam ngù à mbwôgtshù yi. Bo tshwèt mbwe njam nke ntshob mbe nelàn ghebte.

¹³Be me bèn nke nywinte ké? Yàm dù'ntswe b'a ngô fe ben. Me ke nabte sàm kunndà ntùm netshaṅ njame.

¹⁴M'a tshob fi ndù a bèn mbe tàa, ntshob ba ywèt ndù bo bèn mbe màa bo mfèl àm ze mènnzwi.

¹⁵Yàm nenywinte yôg mb'a yà? We z'a tam lag num sàm fu' à?

¹⁶Bag yàm nenywinte nsi swe' ntùm nzendà ngô fe ben, ndùse bag yi nèn fite tshag ntùm mbab là.