Read Medumba Yob 19 Bible Online

Yob 19 - Medumba bible

Yob 19

¹Yob bùnte ntshob ndù:

²Bin nsi tshu ntù àm, lo' ntshob ma'ni àm yi tà kum à ndùke?

³Tshù, a ndonni yoṅ tse gham mba bin tshwèt ntut'àm nà. Numke bin nke ndo' ntshob nzwiaṅt'àm yi tuswe ke ko zin à?

⁴A be ze me ghù mba kua' nukebwô là, mba me be mfàn nu à tù' me.

⁵Bin ke ndiag nelo' à ka'te ngùtni àm yi ké? Bin kwate mbe bin ghù nela'te mbe me b'a ngwù kam ké?

⁶Bin yôg ndèn ndù Nsi bèn nke nta' àm, mba ndù a yi bèn ndàm àm fot se.

⁷Tshù, me tshwèt nkua' num nu nefètte lem, sàm mèn ke bùnte. Me tshwèt mbètte nunetsine, nunetsin ke be.

⁸Nsi fùn njoṅ nze fa mbwe àm, be me ke tôg nze. A lo' njam ndàm yàm manze yi fa.

⁹A kwé yàm ghamte fa me, A kwé yàm nku'ni fa mba lén sàm be nju'ni là.

¹⁰A tshètt'àm bag bag, me nèn tshàm nà. A tsho' yàm nenywinte kô tun mba ta' tù là.

¹¹Tonkèt yantù Nsi lo nsi num àm. Nsi ke ntù' ghù m'a mba mo' ta' ngakeban i là.

¹²A tum ze ntshu ntsho ndù bo se' nkam àm. Bo tswe' yub manze tà se' nkum num àm, bo diaṅ ntàb àm mbume.

¹³Fèt tshàm ke ntsin à ka'ku mbaṅ àm, Shun tshàm ghua' àm fa.

¹⁴Njoṅ tshàm ben fa kù àm, njoṅ tshàm kwùtshaṅ fa lagt'àm.

¹⁵Me tù' à ngùn num miag ghafa' tshàm tse bènnzwi boa tse bandum. Me tù' à ta' mfàm num miag mube.

¹⁶Me num ntsiaṅ ngafa' àm, a ke bùnte, ndabt'é ntshu i ndù a ywimt'àm a gha.

¹⁷Nsém àm tshwèt ndam nzwi àm. Mba kua' ko' fèt tshàm ke tshwèt nkô neghebte mbaṅ àm.

¹⁸Mba kua' bon bônke' tshwèt ngwag àm. Bo num ntut'àm ndùse me lo nsi là.

¹⁹Nu tshàm tshwèt mbag kua' tshàm kwùtshaṅ. Ben tse me na' nke nkô yub là tam àm mvèn yub.

²⁰Mvôg màm ṅab num ngub àm bo mbàb àm. Nda' mvôg màm bèn ntù' me.

²¹Shun tshàm, bin ko ndèn, bin ko ndèn màm. Nummbe bu Nsi lab àm.

²²Numke bin nke nta' àm mba Nsi l'à? Ndù bin ke' yoṅ njwèt neghùtni àm ké?

²³Wé! Me kô ndù bo kite ntshob màm, nkite njoṅ i fa ntùm ta' bu' ṅwa'ni.

²⁴Me kô ndù bo lo' ta' kekùt tùn bo tùn fôgtab ntshebte ntshob màm yi num gholoṅ.

²⁵Là me lèn ndù ngatshu' àm b'a ntùn, mba ndù a' be miagte ndo nsi num tsha'a.

²⁶A' lo nsi ndùse ngub àm nsi bi fa tsho'te là. M'a' yen Nsi ndùse mbàb àm nsi sàmte là.

²⁷Kua' tu wul àm a' bèn njen i. Miag màm nsi yen i, ke b'a mi mènghua. Ntù àm tshwèt ntam mvèt, nke nywinte mb'a yen i là.

²⁸Yen ngelaṅ nà bin a' tshob ndù: Bag na' nke njoṅ i à numke? Nummbe nunetsin z'a tomte yàm njam nà nsi la'te wul i.

²⁹Bin bwôg ṅwi num zin tu. Nummbe yantù Nsi be njab njam ghatshùagntù. A nsi tshùa ndùlala bin lèn ndù nunetsin num bwe.