Read Medumba Yob 2 Bible Online

Yob 2 - Medumba bible

Yob 2

¹Tshù, bon Nsi lo bèn nse' mo' lé'njù ntsinte mbwe Tshùaben mfe kamànyam. Mba Satan bèn nse' ze ntsho netèt bo, num netsin mbwe Tshùaben.

²Tshùaben bètte Satan ndù: O fe à yà? A bùnte Tshùaben ndù: Me fe à num tsha' zinte tshàm bwe.

³Tshùaben bètte Satan ndù: O yen ngafa' àm Yob ké? Mfuni mi ke num nsitsha'a. A b'a mèn netsine, mbe mèn ndaṅndaṅ, nke mbwôg Nsi, mbèn nke ndo' mvèn i ntam nukebwô yi. A tàn tse ntùm ze nebe mèn netsine. O ke ntènt'àm me bi i banban.

⁴Satan bùnte Tshùaben ndù: Kua' tu mèn ta njoṅ yi neshu! Mèn ghù nefà mba ke lo z'a ghù là num yôg se.

⁵Là, laṅte nekwag ju z'a ghù là, mba me fiag nkuan ndù a nsi naṅ ndon tu o ndaṅndaṅ! Kua' nemagte ke bwe.

⁶Tshùaben tshob Satan ndù: tshù, me fà i wù ndù o ghù mba ke lo z'o kô là yi. Nda' ndù a bwô nezete num yôg se.

⁷Satan lo num miag Tshùaben. Yen nà be tôge, Satan kag mo' nkin kebwô num Yob, neto' num tun ku i tà nèn nkum tèt tu i.

⁸Yob lo' à ka ntshaṅ kà nke nkomte wul i yi, mbèn ntam tun i ntùm bwembwôge.

⁹Nzwi i tshob yi ndù: O kô nebe tsho à be mèn netsin ké? So ndon tu Nsi nkwù!

¹⁰Là Yob bùnte yi ndù: O ke ntshob à mba mènnzwi z'a ke' ghù zenu là. A b'a ndùke? Nsi ke na' mbèn mfà mebwô ben ké? Ndù mb'a bèn mfà kebwô là be ke kwé ké? Num njoṅ yen nu là fa, Yob ke lo' ntshu i mfàn nu yi.

¹¹Shun *gi*Yob tat, Elifaz ze Téman, Bildad ze Shuash bo Tsofar ze Naama ju' njoṅ nge' fa ts'a tsho num Yob là. Bo tshobte netèt bo, ndo la' bo nèn netshàm Yob mba nefite ntù i.

¹²Ndùse bo tsin ngùanesà ntam lag num i là, bo ke bèn nelèn i. Ndùlala bo tshag nze yub tù nkua'a. Bo fagte nkummbaṅ mube, ma' mbab tù mfe num tu bo.

¹³Bo tswete nsi mbaṅ i mum lé'njù sammbàa, mbwôgtshù bo tèttswe', ke tshob sàm nu, nummbe bo lo yen mba nge' i zi neshu là.