Read Medumba Yob 20 Bible Online

Yob 20 - Medumba bible

Yob 20

¹Tsofar ze Naama tshob ndù:

²Yàm nevôgte ke' bam ndù me tshùb ntù àm.

³Me ju' mba bo tshobt'àm, ntut'àm nà, là ywèt ts'a num àm nà a' fà mbùnte mi me.

⁴O lèn kua' ndù fe mbwe, fe mba mènntùn be num tsha' là,

⁵ze tsiaṅte ghatshùagntù ke' be tswe yàme. Yub neyob ngu' ke' be ghubte.

⁶A be ze ntse wul i nèn tù nkum mfe kamànyam, tu i kwag mba ndot là,

⁷mb'a nsi bi à be nebi mba bwe tse là, ben tse bo na' nke njen i là nke ntshob ndù: A b'a yà?

⁸A nsi tôg à mba njem nà, bo be ke bèn njen i. A' bi nsi mba ta' njem tswe' là.

⁹Lag s'a ke ndôt'é là ke nsi bèn yen i. Dù' z'a ke ntswe bwe là ke nsi bèn tam lag num i.

¹⁰Nshumnshum tse a' lo' ju z'a yi mbwoṅ nà ngù mebwô yi. Mbu mi a' ba' ju z'a fètte lem kà ndo' là.

¹¹Ngù' nshum z'a ndun ntùm nkam wut mi là nsi nô kunndà ntshù' bo yi ntùm mbabe.

¹²Nukebwô lo ke mbotte ntshu i.

¹³A lo ke mfint'é ke kô neghua' i. A lo ke mfaṅ ntag mi.

¹⁴Yen jujù là nsi tsho bam i bate, kaṅ tù' njoṅ swenyu.

¹⁵Ngatshùagntù nsi ywi' tshunkàb ts'a na' njé là. Nsi a' sô njoṅ i fa bam i ma' nsi.

¹⁶A lo finte njoṅ nswenyu, ndonni lém mbanyu nsi zwi i.

¹⁷A ke nsi bèn te lag num bon netsha' ntse, num ba mfube, num ba nta'ntse ṅwa' bo mbùn.

¹⁸A nsi ba' ju z'a lo' là ke tshag lèn i ntshu i, ngua' yube. A ke nsi jù bin num ju z'a ghù mba ze bin ntàn nà.

¹⁹Nummb'a lo fétte bwoṅbwoṅ ngua' yube. A lo yi ba' ze tu wul i na' mbe ke bèn nkut là.

²⁰Là, b'a ke yôg ju z'a tanjoṅ yi là, nummb'a b'a jùkeywèt ze lèn i ke' be là.

²¹Sàm ju lo ke be tôg ze netshàm ntù. Là se fu' ke nsi tswe yàme.

²²A nsi b'a ntùm nge' netèt fu'. Mbu njoṅ ghayennge' fa nsi yab num i.

²³Nsi a' lo' mbwôg yantù i nkém i yi kà bam se dun. Nkét Nsi a' naṅ num i mba mbaṅ nà.

²⁴A be z'a tum ntshu tshu ntshùag tùn nà, mba nkét tùn fôgtab nsi tot'é.

²⁵A num ntsho' két num wul i, a nke nke' ma' nsa ndùs'a tum bam i là. Bwôg vùkob tshwèt ma'ni i kua' kebwô.

²⁶Njoṅ nge' fa tshwèt mbéb tshunkàb tse. A ke mènntùn bèn te mbwôg z'a kù i là. Ju z'a nsi tù' ntùm ntàb i là nsi kù mbwôge.

²⁷Kamànyam a' bù' fu num mfànnu mi, tsha' lo nsi num i.

²⁸Bo nsi lo' tshundà tse nèn yi. Tshundà tse nsi mi yub num lé'njù yantù Nsi.

²⁹Tshù bag i ze Nsi yab ngatshùagntù là. Tshù mi ntsi' mi Nsi yab yi là.