Read Medumba Yob 21 Bible Online

Yob 21 - Medumba bible

Yob 21

¹Yob bùnte ndù:

²Bin ju'u, bin ju' ntshob màm. Bin fite ntù àm mba nda' ndùlala.

³Me le'te zin ndù bin faṅ me tshob nu. Ndùse me miagte netshob là mba bin ghù netshabt'àm mba bin kô là.

⁴Me ke ma' màm njom à mènntùn ké? Nenywinte ghù nebe ke bwoṅ m'a ndùke?

⁵Bin lôt'àm ntshàm tsine, bin yab bu ntshu bin.

⁶Mba me num nkwimte nu bwe ntù àm tam, fétwut ghom àm tà wul àm vètte.

⁷A tshùa à ndùke kà ghatshùagntù nke njôge, nke njwène, neta yub ke kôg à?

⁸Nzwit yub num nke ntaṅ nga nsi be kua' num miag mube, bon bon tshob nke nsin be kua' mbwe bo.

⁹Ndà yub ke mb'a ntùm fite, bwôg ke ke mbe bwe. Shua' Nsi ke' be lab yube.

¹⁰Mfot mfô num ngù ngù', ke be bot. Bon tshab mfô tshob num njùm ke sô bam.

¹¹Bo num mfaṅ bon tshob nke ntam ngùa mba bon mbwe là. Bon num nyiaṅ sa num miag mube.

¹²Bo num njob kwi num nze ndam bo loṅe. Bo num ntsiaṅte num nze medub.

¹³Bo ke njù ntswe'njù mub à ntùm fu', nèn tshob ngô fe ben à ntùm mbotni.

¹⁴Mba tà ndùlala ghatshùagntù num ntshob Nsi ndù: Nèn ngùanesà mbaṅ bag, nummbe bag ke' kô nelèn tsho manze.

¹⁵Nganeta Ntshùate tshwèt ndiag mfa' be ké? A ywimte be à ke neke nde't'é à?

¹⁶A b'a ndùke! Bo ke' b'a ntùm fu' ké? A bwô ghatshùagntù nèn mub ntag ngùanesà num miag màm.

¹⁷Lambo sob num mbi ngelaṅ yàm ké? Nsi num mfa ntsho'fa' mub bo ntùm yantù i ké?

¹⁸Bo b'a mba nyi'nga ze fetmbaṅ tshwèt nket nèn yi là, mba nenà njum ze zim tshwèt nket là ké?

¹⁹Ndù Nsi lé' nevù kam num nukebwô tà num bon ké? A bwô ndù nevù kam tsho tu kua' ze tu wut, a ju' mb'a be là.

²⁰A lo mbwô ndù tu wul i tam lag num ze nevù, mbèn nu ntùm yantù Nganeta Ntshùate kà nu tum yi.

²¹A be bo keb njoṅ tse maṅwù yôg là, mba ba' i bèn mb'a ke ndùs'a yà tôg l'à?

²²Be mènntùn zi'te Nsi zenu ké? A yi bèn nke ntsho'te ywèt tse bo be kamànyam nà.

²³Mo' mèn ke nkwù à ntùm ntswe mebwô, ntùm fite bo fu',

²⁴ndù mfat mi dun nzile, mvôg mi ghù nzit ntùm bwe ndune.

²⁵Mo' bèn nkwù ze zwe ntùm ntù i, ke be ndù a to' tswe mebwô, ke to' zwi'te fu' sàm lé'njù.

²⁶Ntu tshob bàa fa ke nèn à be ntùm tsha'a, ntu tshob bàa fa num ntù' jujù ywèt.

²⁷M'a lèn nkwatenu mine, ndèn lèn tsho'te kebwô tse bin nsi lo' tèl àm yi là.

²⁸Bin be ntshob ndù: Ba' neta mènntùn b'a yà? Ntàb ze ben kebwô na' nke ntswe bwe là yà?

²⁹A tù' b'a ndùke? Bin lo ke bètte ben bo na' nèn nkatte là ké? Bin ke ndiag negha à ju ze bo tshob là ké?

³⁰A num mbe lé'njù nge', ngatshùagntù tum tse ntshu kame. A num mbe lé'njù yantù a yôg tse.

³¹We z'a num tshobt'é se se num nzin mi à? We z'a num njagte ju z'a num ngù là yi à?

³²Bo num nkel i nèn njab ntùm fi se, njab benntùn bo nke mbéb fi se.

³³Ntu' tsha' mi a tômbo' là fùag num i. Njoṅ benntùn fa be njab njam i. Ben tse bo na' mbe mbwe i là b'a tse yàm neshu.

³⁴Kua' lèn men ntag banban ni bagt'à ndùke? Njoṅ min mbùn ntshob fa b'a mi mfùm.