Read Medumba Yob 22 Bible Online

Yob 22 - Medumba bible

Yob 22

¹Elifaz ze Téman tshob ndù:

²Be mènntùn be ju neywimte Nsi ké? Nga, nzenu ke mbe ju neywimt'a be kua' ze tu wut.

³O be mèn netsin mba yen nà a' kwi'te sàm ju num Nganeta Ntshùate ké? O be mèn nenùn ntùm tsho manze mb'a jù bin à numke?

⁴A ke' b'a mb'o num mbwôg Nsi là bèn ngù k'a nke ntshobt'o, nke ndo' o nèn yi ndà ntsha.

⁵Yu tshùagntù ke' ghu' neshu ké? Mfànnu mu yàm nga' mbu.

⁶O lo ke nkwé tshwèt fèt tsho ke ntun mi, nkwé nzwe ben tse bo be tunntôg là bo.

⁷O lo ke ke mfà lèn ntse mèn ze ntù i kù là, nke nga nefà jujù mèn ze nziku' ya i là.

⁸Ngô lo ta neshu, kà neta mèn bèn nke nte bwe.

⁹O lo ke nta' fôg bènnzwi, bo nèn mbu ndaṅe, nke mbe' mbu bontse kà bo nène.

¹⁰A ndùlala ze njwi' diaṅ o mbume, bwôg ghom o yoṅ ntshù' là.

¹¹O ke' yen njame, ke yen ba ntse mba bo lam o mbum nà ké?

¹²Nsi ke b'a mfe tù, mfe kamànyam ké? Lôte ntôg nsa njen mb'a nèn tù njene!

¹³O tshwèt ntshob ndù: Ke ze Nsi lèn à? B'a tsin njam ndot z'a tam njam nà ntsho'te mènntùn ké?

¹⁴Ndot kabte miag mi, ngù à ke neyene. A ke nzint'a nda' mfe num kamànyam.

¹⁵A b'a ndùke? O ke ndiag netsho à num njwèn nze ze ben kebwô na' nke nzin bwe là ké?

¹⁶Bo lo ket yub nèn yi à ke ngelaṅ yoṅ nku'u, nèn bo à mba koṅ ntsit mbaṅ be ntôg là.

¹⁷Bo lo ke ntshob Nsi ndù: Sô wul o num bag. Ke ze Nganeta Ntshùate ku'ni neghù num bag à?

¹⁸Mba tà ndùlala, Nsi lo so fu' ntùm ndà tshob k'a dun. A bwô ntag ghatshùagntù nèn ngùanesà mbaṅ àm.

¹⁹Ben netsin tse bo be ghakwénta yub nevù là nsi tsiaṅte, mbu' ke ntshabte yub ntshob ndù:

²⁰Tshù ghamaṅte yag là ze bo biagte yub là! Tshù tshunkàb tshob là tse mbwôg tsham njoṅ i fa là.

²¹Yob, a bwô ndù o so mbu bin Nsi ndonni. A nsi tshùa ndùlala o be ntùm fu'.

²²Bam ndù a tswit'o. Lem ntshob mi ntùm ntù o.

²³A be z'o bèn mbèn njam ntèt Nsi là, mb'a nsi te o nsi, a be z'o sô nukebwô ndà o ntshag ngùanesà là.

²⁴Ma' gol ntùm mbabe, Gol Ofir z'a be netèt nkwango' mi à ntùm mfub là.

²⁵Yen ngelaṅ nà Nganeta Ntshùate nsi be yu gol, yu silba, mba yu ju nkàb.

²⁶Nganeta Ntshùate nsi be tsho tsiaṅte, o ke mbù' tu o nsi ndôte miag Nsi.

²⁷O a' ke nde't'é a bùnte mfà wù; o nsi zwiagte mu nka'ni mi o na' nka' là.

²⁸Mba ke lo z'o tàmte là nsi vù lag, nelàn bèn nke nké' num manz'o.

²⁹Ndùs'o vù nsi là, mb'o a' le'te Nsi ndù a bù' o. Nsi ke njwimt'a mèn ze ntshù mi tshùaṅ nà.

³⁰A nsi tshu' mba mèn z'a vù kam nà. A nsi tshùa njam mbu mu mi nelàn k'o yôge. A nsi lagt'o, a be z'o b'a mbu' là, a be ze ju z'o ghù b'a ze netsin nà.