Read Medumba Yob 23 Bible Online

Yob 23 - Medumba bible

Yob 23

¹Yob bùnte ntshob ndù:

²Mba ndonni màm njom nema' b'a tatu. Nda' ndù nge' tshwèt mfam nkua' màm.

³Wé! Me lo ndèn dù' be me yen i là, me lo nku'ni nezin nkum num diaṅkwa se,

⁴mb'a be me tshob ju num yàm nu mbwe i, mb'a be ntshob ta ntshu dun ntshu me.

⁵Mb'a be me lèn ju ze b'a bùnte me là, mb'a be me yen ju ze b'a tshob me là.

⁶Ndù a' sô njoṅ ze neta fa num nelo' nde' àm yi ké? Ndù b'a ke na' mi nju' mba me tshob yi là ké?

⁷Mb'a be bo mèn netsin bèn nsoṅte nu, yàm ngatshètte njam sô àm ntùm kam yoṅ ntshù'.

⁸Là, a be ze me nèn ntumnyam nà mba me ke yen i. A be ze me nèn mbinyam nà mba me ke yen i.

⁹A be z'a tshwèt mfa' tu là, mb'a be me ke yen i, mbe z'a b'a ntèn dù' z'a lem nà, mb'a be me ke fon i.

¹⁰A ne ndèn manze ze me tshùb là, mbe ndù a lo ndaṅt'àm mba m'a' làn à mba gol là.

¹¹Nku màm lo ke mbwe à kua' mi kà ke lo bwe. Me lo tshùb à kua' ze manze, ke tsho' ku àm bwe.

¹²Me ke' ghua' ntag mi a tum ntshu i là, ngù yàm nekô ke zin njam ntshob mi a tum ntshu i là.

¹³A yà ju' ze nu k'a ku', we z'a ghù nebù' tu i nsi num bwe à? Ntù i be nkô mba ke lo a ghù.

¹⁴Ndùlala, a nsi zwiagte njoṅ nka'ni mi fa num àm, bèn ghù memo' nka'ni yàm me.

¹⁵Tshù ju z'a ghù me nke njen i wul àm mfét là. Me num nkwate nu bwe mbwôg i.

¹⁶Nsi be' yàm fènntù. Nganeta Ntshùate ghù bwôg dun num àm.

¹⁷Nummb'a ke' b'a njam bèn nke mbiagt'àm. A ke' b'a dù' nesènte bèn nke nkabt'àm.