Read Medumba Yob 24 Bible Online

Yob 24 - Medumba bible

Yob 24

¹Numke Nganeta Ntshùate ke lem tsemo' ngelaṅ à? Numke ben tse bo lèn i mbe ke yen lé'njù tse à?

²Bo tshwèt ntsho' ndoṅ ndùnsi, nke njé bwoṅ nyàm, nke ntshagte yub bo mfèt nenà.

³Bo tshwèt nkwé kekwèn ménntse, nke nànte mfôg mènnzwi a lo' nyàmna' i njab tshwèt yi.

⁴Bo tshwèt ntèn bwoṅbwoṅ num manze ma' njam, nke ngù njoṅ ghayennge' fa nke ndeme.

⁵Bo num ntum nkebnjù nèn diag jujù mba nkekwèn tshwèt tse bo be kônkwa là. Be ghù nefon jujù à nda' num kônkwa, ndo' nkém bon tshob yi.

⁶Bo num nkeb nenà ntùm nà, nke nkàb ntàm ntùm nà ntù ndu' mèn kebwô.

⁷Bo ke nzi tèttswe' à banban, ke nzwe num bo, ke nzwe mfùag nekabte wut yub yi.

⁸Mbaṅ z'a swe' mfe num ba mbat là num nzwi' yube, bo nke ndem ntùm ngondoṅ, nummbe ndàlem ke' be bo.

⁹Bo num ntsho' ménntse num bùn, nke nkwé ba tshwèt num mbwoṅ.

¹⁰Bo ke nzin à tunntôg, nzwe ke be bo. Nziku' ya yube; bo nke nket ba nenà.

¹¹Bo num ntshàb tshab ntùm tshab mènghua, nke ntshàb ndu', là ntù yub nke nkù.

¹²Nkua' ghavùkob tshwèt nko' mà tusô, ben tse bo ket mfaṅ nà nke nkua' ntsiaṅ num ywimte. Là Nsi ke kù' ntoṅ num le'te yub.

¹³Tsemo' ben b'a ghakeban nelàne, bo ke' lèn tshob ba manze, ke ke nzin tshob num ba ntshagnze.

¹⁴Ngazwi mèn be ndo nsi mfôgnjù, nzwi mbwoṅ bo ke ju mbu, a be tèttswe' a yi.

¹⁵Lag ngaghù màndà ke mbéb dù' nkebnjù netam njam à nebébe. A num ntshob ndù: Sàm mèn ke nsi te lag num àm, ntshob ndùlala ma' nzwe se i.

¹⁶Bo num nto ndà njame, a be mbwôgtshù bo lem. Bo ke' lèn tshob nelàne.

¹⁷Nkebnjù ke ntswe bo à mba njam nà. Là njam ke' be lo' ba bwôg ngom yub yi.

¹⁸Bo ke mbi num ntse à mba ju z'a fùag neshu là. Bo so ndon num mub ntsi' num nsitsha'a. Bo ke' bèn nenèn ntùm yub nà ntù ndu', nelôte nà.

¹⁹Dù' nejum bo ndum nyam ton ntse nywinmbaṅ fa. Ngô fe ben mi njoṅ ben fa tse bo ghù nukebwô là.

²⁰A ndùke? Mba bam màab lagte i ké? Ba ywèt fèl i fa. Bo ke' bèn nekwimt'é. Bo tshet nukebwô mba ta' nta' tù là.

²¹A num ndag ntsha' mènnzwi z'a ke' bwe là, ke ke ngù sàm numebwô num mfôg mènnzwi!

²²Nga! Nsi be ntshùa njam neta i, nkwi'te ntswe'njù ghafètte lem, mèn be tshù njen yub tù ngelaṅ bo tshwèt magte yôg à nemagte là.

²³A num mfà netswe fite bo, ngù bo ke bèn nebwôge. A num nte lag num manze tshobe.

²⁴Bo lo bù' wut yub nsi, nkwù mba njoṅ benntùn fa là. Bo fag yub mba bo num mfag ko' ngefet là.

²⁵We z'a ghù nela'te mb'a ke' b'a ndùlili à? Be mèn tum ntshob mbe ntshob màm b'a mi tatte ké?