Read Medumba Yob 26 Bible Online

Yob 26 - Medumba bible

Yob 26

¹Yob bùnte ntshob ndù:

²O lèn neywimte mèn z'a bot là be! O lèn neywimte mbu mi neta bwoṅ yi là be!

³O tshwèt mfà ntag ntùn ze nkwate bwoṅ yi là ta! O tshwèt nsô zenu yàm neshu be!

⁴O ke ntshob mu ntshob à we? A we bèn nke mfà men ntshob là wù à?

⁵Bildad tshob ndù: Ba netshaṅ tshwèt mvètte mbwe Nsi, bam ntse boa ba la' tse.

⁶Ngô fe ben be mbwe i tunntôg, ghem ke' bèn ngù kam nzwe num i.

⁷Nsi ghet kamànyam bag mfe tu num dù' banban. A ghet tsha' a num dù' banban.

⁸A num nkùmte ntse, mfùn yub ntùm tse ndot, ndot ke ne mbèle, mba mba bo lèt neshu là.

⁹Nsi num nkabte se diaṅkwa se, ndo' ndol i mfim i yi.

¹⁰A lo kùa màkwa num ntse, ndo' ngù ndùnsi yi netèt nelàn bo njame.

¹¹Ba ntom kamànyam tshwèt nyi'te, nke ntshàm mb'a tshwèt nkam ntanta là.

¹²A num ndo' ngù' i nkamte dibantse yi, ndo' zenu i ntshet ko'tewut Rahab yi.

¹³Ywèt ntshu tse num ngù kamànyam làn, bu i to nyu z'a tshwèt nkù là.

¹⁴Tshen nà b'a nkaṅ mfa' mi. A b'a metsit tshu'te z'a tam toṅ be là. Là, we z'a nsi ju' fambaṅ z'a nsi tum ntùm ngù' i à?