Read Medumba Yob 27 Bible Online

Yob 27 - Medumba bible

Yob 27

¹Yob bèn nèn ntshob mbwe ntshob ndù:

²Nsi z'a gha nunetsin me là b'a ntùn! Nganeta Ntshùate z'a be ntùn nà ghù zwe dun ntù àm.

³Njoṅ ngelaṅ fa ze zwiag sàm nsi ke' me, ywèt Nsi ke nke' ntôg ntselag àm nà,

⁴mba nkub ntshu màm ke nsi tshob nukebwô, ntshu àm ke bèn ntshob sàm tatte.

⁵Kà nkwate netshob ndù bin bèn mbe num nze nenùn se' tu àm. M'a' tshètte yàm njam ndù me b'a mbu' tà nkum ndùse zwiag mi num àm nà.

⁶M'a' ke nda'te ndù me b'a netsin ke bot. Ntù àm ke tshwèt nda'te lo' me num sàm ta' lé'njù ntshù', num yàm ngelaṅ ntùm njù.

⁷A bwô ndù ngakeban àm be mba ngatshùagntù là. Ngamaṅt'àm be mba mèn kebwô là.

⁸Ke ze mèn kebwô num nywinte ndùse Nsi keb ndeb yôg i, nsô zwiag num i l'à?

⁹Nsi num nju' nkua' mi, ndùse nge' kab mbu num i là ké?

¹⁰A ghù neke njab ntù i num Nganeta Ntshùate, nke nkô i ké? A num nke nde'te Nsi njoṅ ndù fa ké?

¹¹M'a' zi'te zin tse manze Nsi. Me ke nsi lem zin ntàmtenu Nganeta Ntshùate.

¹²Bin lèn njoṅ i fa, ne mbe ntshu ntshù' num bwe. Numke bin nke mfaṅ nkwate banban nke nsoṅ zin bag bag à?

¹³Tshù ju ze Nsi yab ngatshùagntù li, ntsi' mi Nganeta Ntshùate yab mèn kebwô li:

¹⁴Nshumnshum tse yàm be neyàm mba bo nsi vù num ṅwi. Bon bon tshob nsi bwoṅ jujù.

¹⁵Tse bo tum ntshu ṅwi là nsi kwù keya' bonfôg tshob be ke làn yube.

¹⁶A tse'te nkàb be mba mbabe, a ghù ba nzwe ntùn a yàm be ndùke lo, njàm be mba netob là,

¹⁷mba yi z'a tse'te là ke bèn ghù tshen tshu là, là mèn netsin bèn ma' nzwe, mèn nenùn bèn ngù nkàb a be mi ntsi'i.

¹⁸Ba' z'a kut là ke ntswe à mba ntàm lam nkiaṅnkiaṅ là, mba ntàb ze ngabéb dù' num nkut là.

¹⁹Ngatshùagntù num mbe nô nsi mbe ngaju, ntù' kwù à mbu ndaṅe. A num mbe gha' miag mi sàm ju ke bèn mbe.

²⁰Ba bwôg num ngom i à mba ntse là; ta' zim ke nkel i tshaṅ tèttswe' nèn yi.

²¹Fetmbaṅ z'a fe ntumnyam nà num nkel i nèn yi. A num ntsho' i nsi kô tun ntùm dù'ntswe i.

²²Nsi num ndo' nkô nke ntam i yi ke ko ndèn, ndùlala ngatshùagntù nke ndiag nele'te men nkô là, nke nkù.

²³Bo num mbu'te mbu mb'a vù là, nke ntôte fin ndùs'a nèn nà.