Read Medumba Yob 28 Bible Online

Yob 28 - Medumba bible

Yob 28

¹Silba ghù tô se bo num ntswe' i bwe là. Gol ghù dù' ze bo num sô i kà ntswite là.

²Bo ke nsô tùn à ntùm mbabe. Bo num nton loṅ a yag kà nkaṅ ntù' tùn meba.

³Mènntùn be nké' nka' njam ke bèn mbe. A num ntswe' dù' tà nkum num dù' ts'a bam nsi là, nkum num ndoṅ mi a lem ntùm dù' nesènte, ntùm netshaṅ vùkob là.

⁴A num ntswe' tô ngùanesà num dù' benntùn be ntswe là. Nku mi ke' bèn mbe ywimt'é, bo ghel i tù, a nke nshùme, mbe ngùanesà mbaṅ benntùn.

⁵Tsha' ts'a num mfà jujù là kamte tà bam bwe mba mbwôg là.

⁶Bo num njen ndoṅ fôgtab ntùm bwe, mbèn nke mfon mbab gol ntùm bwe.

⁷Saṅ s'a num ngom ju là ke' be lèn manze. Lag saṅ mbwe ke' be tam num i.

⁸Nyàm tse bo num nka'te là lo ke to' tshùa bwe. Ngwayit ke' to' tôg bwe.

⁹Mènntùn num njab bu i num gholoṅ ntèn ba mbat fe num nga tse ntam nsi.

¹⁰A num ntoṅ nsam ntùm ba ngondoṅ, lag se nke ndôte njoṅ tshu tanjoṅ fa ts'a bwe là.

¹¹A num ntshèt ba ntse bo ke bèn nke nswe'e, ndo' ju z'a lem nà ntum yi ntùm nelàne.

¹²Là zenu b'a yà? Dù'ntswe nesiaṅte b'a yà?

¹³Mènntùn ke' lèn ntshu ntàn i. Zenu ke' b'a num tsha' ben tse bo be ntùn nà.

¹⁴Ghem num ntshob ndù: zenu ke' be ts'a num àm. Dibantse nke ntshob ndù: bag yi ke bèn mbe tshage.

¹⁵Be bo ke lo' gol nelàn mbate zenu yi, be bo ke fi' silba ndo' njun i yi;

¹⁶be bo ke fi' gol Ofir ndo' mbat'é yi, ke lo' loṅ tanjoṅ ndo' mbate zenu yi.

¹⁷Zenu tanjoṅ tshùa gol bo yente. Be bo ke lo' kab ntùn ndo' mbat'é yi.

¹⁸Mbùm bo loṅ tanjoṅ ke' b'a sàm ju mbaṅ zenu. Zenu tanjoṅ ntshùa ntôgtse.

¹⁹Topaze z'a fe Etiopia là ke' b'a sàm ju num i. Be bo ke yab zenu bo gol nelàn num kilô ntshù'.

²⁰Kà zenu fe z'a yà? Dù'ntswe nesiaṅte b'a yà?

²¹A lemte num miag mba zit mènntùn no. A lemte num miag nsaṅ mi a kamànyam nà.

²²Ghem bo vùkob num ntshob ndù: Bag ju' bo tshob nu num bwe.

²³Nsi bèn ndèn manz'é, A b'a yi bèn ndèn dù'ntswe i.

²⁴Nummb'a num njen nze tà nkum num ntôg tsha'a. A num njen njoṅ tshu fa bam kamànyam.

²⁵Ndùse Nsi na' nke ntsiagte njoṅ ze nelèt fetmbaṅ, nke nte mfi' ba ntse,

²⁶nke mfà nkàn mbaṅ, nke ntàmte manze beba' mbaṅ bo fetmbaṅ nà,

²⁷yen ngelaṅ nà o lo yen zenu, nda't'é, ntaṅ nga tse nsi, ndaṅt'é.

²⁸Yen ngelaṅ nà Nsi tshob mènntùn ndù: Nebwôg Tshùaben b'a zenu. Nekù nukebwô b'a nesiaṅte.